រថភ្លើងដឹកអ្នកដំណើរមួយគ្រឿងបានបុកទៅនឹងរថយន្ត សណ្តោងកន្ទុយ នៅលើដងផ្លូវឆ្ពោះទៅកាន់ ភាគខាងជើងរដ្ឋ Carolina បណ្តាលឲ្យទូរថភ្លើងចំនួន២ក្រឡាប់ធ្លាក់ចេញពីផ្លូវដែក បណ្តាលឲ្យមនុស្ស៤០នាករងរបួស ។រថភ្លើងជួបគ្រោះថ្នាក់ខាងលើជារបស់ក្រុមហ៊ុន
ដឹកជញ្ចូន Amtrak ។ក្រោយការប៉ះទង្គិច ក្បាលរថភ្លើងពីរកំណាត់មុខ បាន ភ្លាត់ធ្លាក់ចេញពីផ្លូវតែម្តង បណ្តាលឲ្យមនុស្សជាច្រើនរងរបួសធ្ងន់ រួមទាំងអ្នកបញ្ជារថភ្លើងផងដែរ។ អ្នករង របួសចំនួន ២៥នាក់ត្រូវបាន បញ្ជូនទៅកាន់មជ្ឈមណ្ឌលវេជ្ជសាស្ត្រ ហាលីហ្វាក តាមរថយន្ត ក្រុងដើម្បីព្យាបាល និង ១៥នាក់ទៀតត្រូវបានដឹក តាម រថយន្តសង្គ្រោះរបស់ពេទ្យ ក្រោយ គ្រោះថ្នាក់កើតឡើងកាលពីល្ងាចថ្ងៃចន្ទ ទី០៩ ខែមីនា។
ដោយឡែកអ្នកដំណើរផ្សេងទៀតចំនួន ១៧៣នាក់ នៅលើរថភ្លើង បានបង្ហាញពីអារម្មណ៍ តក់ស្លុតពីគ្រោះថ្នាក់ ដែលអាច គម្រាមកំហែងដល់អាយុជីវិតនេះ ដូច្នេះពួកគេក៏បានសម្រេច ចិត្តជិះរថយន្តក្រុងបន្តទៅកាន់ទីក្រុង រីចម៉ុនដ៍ នៃរដ្ឋ វើជីនីញ៉ា វិញ។ តាមសម្តីពីសាក្សីដែល បាន ឃើញហេតុការណ៍ផ្ទាល់ភ្នែកឲ្យដឹងថា អ្នកបើករថភ្លើងពេលនោះ ពិតជាពិបាករកវិធីដើម្បី គេចចេញពីគ្រោះថ្នាក់ខ្លាំងណាស់ ដូច្នេះគេបានលោតចេញពីលើរថភ្លើងមុននឹងវាបុករថយន្ត ដឹកទំនិញ។
មន្ត្រីក្នុងតំបន់ក៏បានទៅដល់កន្លែងកើតហេតុភ្លាមៗ ហើយ បញ្ចាក់ឲ្យធ្វើការជួយសង្គ្រោះបន្ទាន់ដល់អ្នករងរបួស។ មូលហេតុបណ្តាលឲ្យមានហេតុការបុកគ្នាខាងលើកើតឡើងនៅមិនទាន់ដឹងនៅឡើយ ប៉ូលិសកំពុងធ្វើការស្រាវជ្រាវ ថាអាចបណ្តាលមកពីរថយន្តសណ្តោងកន្ទុយឬក៏រថភ្លើង៕
