ខេត្តកំពង់ធំ= បុរសម្នាក់បានស្លាប់ភ្លាមៗនៅក្នុងហេតុការណ៍គ្រោះថ្នាក់ចរាចរណ៍មួយបង្កឡើងដោយរថយន្តហ្វតរបស់ក្រុមហ៊ុនឡាវីតា បុកគ្នាជាមួយរថយន្ដកាមរីឆ្លាមមួយគ្រឿងផ្សេងទៀតហើយជ្រុលទៅបុកម៉ូតូវ៉េវពេញទំហឹងក្នុងទិសដៅបញ្ចាស់ទិសគ្នាពីជើងទៅត្បូង ក្នុងហេតុការណ៍ដ៏រន្ធត់
នេះបានកើតឡើងកាលពីវេលាម៉ោង៦និង៣៥នាទីព្រលប់ថ្ងៃទី១០ខែមិនាឆ្នាំ២០១៥ស្ថិតនៅលើកំណាត់ផ្លូវជាតិលេខ០៦ក្នុងភូមិ ថ្នល់បែក ឃុំត្រពាំងឬស្សីស្រុកកំពង់ស្វាយ ខេត្តកំពង់ធំ។
ប្រភពព័ត៌មានពីកន្លែងកើតហេតុបានឲ្យដឹងថាមុនពេលកើតហេតុគេឃើញរថយន្តហ្វតមួយគ្រឿងពណ៌ទឹកប្រាក់ពាក់ស្លាកលេខភ្នំពេញ 2Y 0464 បុកគ្នាជាមួយរថយន្ដកាមរីឆ្លាមពណ៍ស្ករ ពាក់ផ្លាកលេខ ភ្នំពេញ 2A 9413 រួចជ្រុលចង្កូតទៅបុកម៉ូតូដែលពាក់ផ្លាកលេខ 1D 2506 កំពុងតែជិះដឹកកូនស្រីហើយជ្រុលបន្ដទៅបុករថយន្ដពណ៍ក្រហមដឹកដីរបស់ក្រុមហ៊ុនចិនធ្វើថ្នល់ដែលបានចត់ចោលពេញទំហឹង បណ្តាឲ្យបុរសអ្នកជិះម៉ូតូស្លាប់ភ្លាមៗនៅនឹងកន្លែងកើតហេតុតែម្តង។
ប្រភពបន្ថែមលោក ហេន ឈុន គ័រ អធិការស្រុកកំពង់ស្វាយបានអោយដឹងថា ជនរងគ្រោះដែលស្លាប់បាត់បង់ជីវិតមានឈ្មោះសាត បៀន ភេទប្រុសអាយុ២៩ ឆ្នាំ បានជិះម៉ូតូជាកូនស្រីអាយុ៤ឆ្នាំ រងរបួស រស់នៅភូមិ រ៉ូង ឃុំត្រពាំងឬស្សី ស្រុកកំពង់ស្វាយ ខេត្តកំពង់ធំ ។ដោយឡែកអ្នកបើកបររថយន្តបង្កត្រូវបានរត់គេចខ្លួនបាត់បន្សល់ទុកតែរថយន្ត២គ្រឿងនៅកន្លែងកើតហេតុតែប៉ុណ្ណោះ។
បន្ទាប់ពីកើតហេតុសមត្ថកិច្ចបានចុះមកធ្វើការវាស់វែងរួចអូសយករថយន្តនិងម៉ូតូជនរងគ្រោះទៅរក្សាទុក ដើម្បីរងចាំការដោះស្រាយតាមផ្លូវច្បាប់។រីឯសាកសពជនរងគ្រោះត្រូវបានក្រុមគ្រួសារយកទៅធ្វើបុណ្យតាមប្រពៃណី ចំណែកអ្នករងរបួសត្រូវបញ្ចូនទៅមន្ទីរពេទ្យ។
ប៊ុនរិទ្ធី
