ពោធិ៍សាត់ ៖ វារីអគ្គិសនីស្ទឹងអាតៃដែលមានកម្លាំងអនុភាព១២០មេហ្គាវ៉ាត់រួម ជាមួយខ្សែបញ្ជូនភ្នំពេញ កំពង់ឆ្នាំង ពោធិ៍សាត់ បាត់ដំបង ក្រោមកិច្ចសហការរវាងក្រសួងរ៉ែ និងថាមពលជាមួយក្រុមហ៊ុនចិនចំនួនពីរត្រូវបានសម្ពោធដាក់ឲ្យ ប្រើប្រាស់ជាផ្លូវការក្រោមអធិបតីភាពសម្តេចអគ្គមហា សេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជានាព្រឹកថ្ងៃទី២៧ ខែមីនា ស្ថិតក្នុងសង្កាត់រលៀប ក្រុងពោធិ៍សាត់ ខេត្តពោធិ៍សាត់។
លោក ស៊ុយ សែម រដ្ឋមន្ត្រីក្រសួងរ៉ែ និងថាមពលមានប្រសាសន៍ថា គម្រោងវារីអគ្គិសនីស្ទឹងអាតៃ គឺជាគម្រោងមួយស្ថិតនៅតំបន់ត្រីកោណនៃខេត្តកំពង់ស្ពឺ កោះកុង ពោធិ៍សាត់ ដែលមានស្ថានីយក្នុងឃុំអូរសោម ស្រុកវាលវែង ខេត្តពោធិ៍សាត់ក្នុងចំងាយប្រមាណ១៧៥គីឡូម៉ែត្រពីទីរួមខេត្ត ពោធិ៍សាត់។
លោកបន្តថា ជារៀងរាល់ឆ្នាំស្ទឹងអាតៃមានផ្ទៃរងទឹកភ្លៀង៥៩០គីឡូម៉ែត្រក្រឡា ដែលអាចត្រង់យកទឹកភ្លៀងប្រមាណ៥១០លានម៉ែត្រគីបដែលបរិមាណទឹកនេះ បានហូរចូលក្នុងសមុទ្រដោយពុំមានប្រើប្រាស់អ្វីទេ ដោយឃើញស្ថានភាពធម្មជាតិ និងភូមិសាស្ត្ររបស់ស្ទឹងនេះអាចផ្តល់លទ្ធភាពឲ្យយើងសាងសង់ជា ទំនប់ដើម្បីស្តុកទឹកបង្កើតជាវារីអគ្គិសនីមួយយ៉ាងប្រសើរដែលមាន ឈ្មោះថា ទំនប់វារីអគ្គិសនីស្ទឹងអាតៃ។
យោង តាមកិច្ចព្រមព្រៀងគម្រោងវារីអគ្គិសនីស្ទឹងអាតៃមានទំហំវិនិយោគ សរុបមានចំនួនជាង២៥៥លាន ក្នុងនោះទំហំវិនិយោគសំរាប់វារីអគ្គិសនីស្ទឹងអាតៃមានចំនួនជិត ២០០លានដុល្លារ និងសម្រាប់អនុស្ថានីយរួមអូរសោម និងខ្សែបណ្តាញបញ្ជូនទៅអនុស្ថានីយពោធិ៍សាត់មានចំនួនជាង៥៥លាន ដុល្លារអាមេរិកក្រោមរូបភាពសាងសង់ ដំណើរការ និងផ្ទេរ (BOT)។
ដោយឡែកគម្រោងខ្សែបណ្តាញបញ្ជូនភ្នំពេញ កំពង់ឆ្នាំង ពោធិ៍សាត់ បាត់ដំបង ត្រូវបានវិនិយោគក្នុងទំហំទឹកប្រាក់ប្រមាណជាង១១៣លានដុល្លារ អាមេរិកដែលមានរយៈពេលសម្បទាន២៧ឆ្នាំ ក្នុងនោះ២ឆ្នាំសម្រាប់ធ្វើការសាងសង់ និង២៥ឆ្នាំសម្រាប់ធ្វើអាជីវកម្ម។
គម្រោងវារីអគ្គិសនីនេះមានលទ្ធភាពផលិតអគ្គិសនីជាមធ្យមប្រចាំ ឆ្នាំមានចំនួន៤៦៥លានគីឡូវ៉ាត់ក្នុងមួយឆ្នាំ ហើយតម្លៃថាមពលអគ្គិសនីមូលដ្ឋានដែលត្រូវលក់នោះមានចំនួន៧,១៤សេនក្នុងមួយគីឡូវ៉ាត់ម៉ោង ក្នុងនោះ៥,៨សេនគឺថ្លៃផលិតដោយវារីអគ្គិសនី និង១,៣៤ សេនក្នុងមួយគីឡូវ៉ាត់ម៉ោង គឺជាថ្លៃរំលោះលើការវិនិយោគខ្សែបណ្តាញបញ្ជូនភ្ជាប់មកអនុ ស្ថានីយពោធិ៍សាត់។ វារីអគ្គិសនីស្ទឹងអាតៃបានបើកការដ្ឋានសាងសង់កាលពីថ្ងៃ១០ ខែវិច្ឆិកា ឆ្នាំ២០០៩ និងបញ្ចប់ការសាងសង់ព្រមជាមួយនឹងការធ្វើអាជីវកម្មជាធរមាននៅ ថ្ងៃទី០១ ខែកញ្ញា ឆ្នាំ២០១៣ ពោលសាងសង់រួចរាល់មុនការកំណត់៦ខែ៕
