ភ្នំពេញ៖ បុរសម្នាក់បានស្លាប់កៀបជាប់ជាមួយម៉ូតូរីឯម្នាក់ទៀតខ្ទាចចេញពីម៉ូតូប្រមាណ២០ម៉ែត្រស្លាប់ដូគ្នាដោយសារជិះម៉ូតូគេចពីក្រុមក្មេងស្ទាវដេញវាយបើកជិះម៉ូតូលឿនជ្រុលចូលទៅបុកក្បាលរថយន្តកូរ៉េដឹកទឹកកកចំពីមុខពេញទំហឹងកាលពីវេលាម៉ោង១និង៣៥នាទីអាធ្រាត្រឈានចូលថ្ងៃ ទី១១ ខែមិនា ឆ្នាំ២០១៥ នៅមុខវិទ្យាស្ថានអភិវឌ្ឈន៍ធនធាននិស្សិតក្នុងភូមិទួលគោកតាមបណ្តោយផ្លូវលេខ៧០ សង្កាត់ទួលសង្កែខណ្ឌឬស្សីកែវ។
តាមសាក្សីនៅកន្លែងកើតហេតុបានឲ្យដឹងថាមុខពេលកើតហេតុគេបានឃើញមនុស្សមួយក្រុមបាន ជិះម៉ូតូដេញគ្នាមិនត្រឹមតែប៉ុណ្ណោះថែមទាំងលឺពួកគេស្រែកថាចោរៗទៀតធ្វើអោយអ្នកនៅជិតទីនោះមានភ្ញាក់ផ្អើលយ៉ាងខ្លាំងហើយស្រាប់តែបុរសទាំង២នាក់ជិះម៉ូតូមួយគ្រឿងម៉ាក
សង់កូរ៉េពណ៌ក្រហម ឌុបគ្នាបានធ្វើដំណើរតាមផ្លូវ៧០ទិសដៅពីលិចទៅកើតក្នុងល្បឿនលឿននោះក៏ជ្រុលទៅបុកចំក្បាលរថយន្តកូរ៉េដឹកទឹកកកមួយគ្រឿងពណ៌ ខៀវលាយសពាក់ស្លាកលេខភ្នំពេញស៊េរី ក៧២៣៣-ភ ដែលបើកបរដោយបុរសម្នាក់ ក្នុងបញ្ច្រាស់ទិសគ្នាចំពីមុខពេញទំហឹងបណ្តាលឲ្យបុរសម្នាក់ស្លាប់ កៀបជាប់ជាមួយម៉ូតូគួរអោយរន្ធត់និងម្នាក់ទៀតខ្ទាត
ចេញពីម៉ូតូប្រមាណ២០ម៉ែត្រស្លាប់ដូចគ្នាផង ដែរ។ ក្រោយកើតហេតុចំពោះម្ចាស់រថយន្តកូរ៉េដឹកទឹកកកក៏បើកទ្វារថយន្តខ្លួនឡើងជិះម៉ូតូឌុបចេញ ទៅបាត់ រីឯក្រុមក្មេងស្ទាវដែលបានជិះម៉ូតូដេញវាយគ្នានោះបានជិះគេចខ្លួនបាត់ស្រមោល ដូចគ្នាដែរ។ ប្រភពបានបន្តទៀតថាចំពោះករណីគ្រោះថ្នាក់ចរាចរណ៏ខាងលើនេះប្រហែលជាពួកគេ ជិះម៉ូតូដេញវាយគ្នាហើយទើបធ្វើអោយជនរងគ្រោះភ័យពេកទើបជិះម៉ូតូចូលបុករថយន្តគេបណ្តាលស្លាប់ភ្លាមៗតែម្តង ។
មន្ត្រីនគរបាលចរាចរជើងគោករាជធានីភ្នំពេញដែលចុះទៅដល់កន្លែងកើហេតុបាននិយាយថានៅលើសពជនរងគ្រោះមិនមានអ្វីសំគាល់ពីអត្តសញ្ញាណរបស់សពនោះទេដូច្នេះសមត្ថកិច្ចសូមធ្វើការអំពាវនាវដល់ប្រជាពលរដ្ឋបងប្អូនណាដែលបាត់សាច់ញាតិរបស់ខ្លួនឲ្យមកត្រួតពិនិត្យមើលសពដែលសមត្ថកិច្ចបានយកទៅតម្កល់ទុកនៅវត្តទឹកថ្លាដើម្បីយកទៅធ្វើបុណ្យតាមប្រពិណី ។
ក្រោយពេលកើតហេតុសមត្ថកិច្ចបានចុះទៅវាស់វែងហើយយករថយន្តនិងម៉ូតូជនរងគ្រោះទៅកាន់ការិយាល័យចរាចរផ្លូវគោកនៃស្នងការដ្ឋាននគរបាលរាជធានីភ្នំពេញដើម្បីដោះស្រាយតាមនិតិវិធីច្បាប់ផងដែរ ៕
