រាជធានីភ្នំពេញ៖ ហេតុការភ្ងាក់ផ្អើលមួយបានកើតឡើងកាលពីវេលាម៉ោង13និង00នាទីថ្ងៃទី27 ខែមិនាឆ្នាំ2014 នៅចំណុចលើស្ពានលីយ៉ុងផាត់(ស្ពានព្រែកព្នៅ)ត្រើយខាងលិច ស្ថិតក្នុងសង្កាត់ស្វាយប៉ាក់ ខណ្ឌឬស្សីកែវ រាជធានីភ្នំពេញ បន្ទាប់ពីយុវជនម្នាក់បានលោតពីលើស្ពានបំរុងនិងសម្លាប់ខ្លួន។
យុវជនដែលបានសម្រេចចិត្តលោតទឹកសម្លាប់ខ្លួននោះឈ្មោះ ភី សាវុធ ភេទប្រុស អាយុ25ឆ្នាំ មុខរបរមិនពិតប្រាកដ ស្នាក់នៅក្នុងក្រុមទី5 ភូមិឡកំបោរ សង្កាត់ស្វាយប៉ាក ខណ្ឌឬស្សីកែវ រាជធានីភ្នំពេញ។ បើតាមសាក្សីដែលឃើញហេតុការនេះបានអោយដឹងថា៖
មុនពេលកើតហេតុគេឃើញយុវជនរូបនេះបានដើរឆ្លងស្ពានពីលិចទៅកើតលុះដល់ពាក់កណ្ដាលស្ពានស្រាប់តែយុវជនរូបនេះបានលោតពីលើស្ពានដើម្បីសម្លាប់ខ្លួនពេលដែលយុវជនរូបនោះធ្លាក់មកដល់ក្នុងទឹកគាប់ជួនពេលនោះមានទូកអ្នកនេសាទជនជាតិអ៊ុស្លាមជាច្រើនកំពុងតែនេសាទត្រីបានឃើញយុវជនរូបនោះលោតទឹកសម្លាប់ខ្លួនក៍នាំគ្នាជួយស្រងយកមកលើគោកបានទាន់ពេលវេលាហើយក៍រត់ទៅរាយការណ៍ប្រាប់សមត្តកិច្ចដែលកំពុងយាមនៅក្រោមស្ពានលីយ៉ុងផាត់នោះអោយមកជួយ។
ពេលដែលសមត្តកិច្ចមកដល់ក៍បានហៅរថយន្តសាម៉ុយមន្ទីពេទ្យបង្អែកព្រែកព្នៅដឹកយកទៅសង្គ្រោះដោយអាការះរបស់យុវជនរូបនោះមានអាការះធ្ងន់ធ្ងរហើយចេះតែស្រែកឈឺទ្រូងខ្លាំងពេកទើបរថយន្តសាម៉ុយបានដឹកយុវជនរូបនោះទៅកាន់មន្ទីពេទ្យកាលម៉ែត្រវិញ។
បើតាមស្ត្រីម្នាក់ឈ្មោះ ភី សុឃឿន ហៅច្រឹប ភេទស្រី អាយុ36ឆ្នាំត្រូវជាបងស្រីបានអោយដឹងថា៖ គាត់ក៍ពុំដឹងមូលហេតុអីបានជាប្អូនប្រុសរបស់គាត់គិតខ្លីយ៉ាងដូច្នេះទេគឺមុនពេលកើតហេតុប្អូនប្រុសរបស់គាត់បានអង្គុយហូបបាយជុំគ្នាពេលដែលហូបបាយហើយស្រាប់តែបាត់គេរហូតគាត់ក៍ពុំបានសង្ស័យអ្វីដែលព្រោះអីនេះគឺជាទម្លាប់ប្អូនប្រុសរបស់គាត់ហើយមិនដែលនៅផ្ទះបានមួយម៉ោងឡើយហើយក៍ពុំរកការងារអ្វីធ្វើដែលគឺគេដើរលេងបាត់ៗពីផ្ទះភាគច្រើនគេតែងតែទៅលេងបាល់ទះនៅក្រោមស្ពានលីយ៉ុងផាត់ហើយអង្គុយផឹកកាហ្វេនៅក្បែរស្ពាននោះគេធ្លាប់ប្រាប់គាត់ថា គេស្រលាញ់នារីម្នាក់ប៉ុន្តែនារីនោះអត់ស្រលាញ់រូបគេទេដោយសាររូបគេគ្មានការងារធើ្វ។
ស្ត្រីរូបនោះបានបន្តថា គាត់មានការប្លែកចំពោះប្អូនប្រុសរបស់គាត់រយះពេល2ទៅ3ថ្ងៃកន្លងមកនេះពុំសូវនិយាយស្ដីអ្វីនោះទេដូចជាមនុស្សខូចចិត្តអញ្ចឹងគាត់សង្ស័យថា មូលហេតុដែលប្អូនប្រុសគាត់គិតខ្លីសម្រេចចិត្តលោតទឹកសម្លាប់ខ្លួននោះគឺដោយសារតែស្រលាញ់គេហើយត្រូវគេបដិសេធន៍នោះក៍មិនដឹង៕ 
