គ្រោះធម្មជាតិរញ្ជួយផែនដី កម្រិតរហូតដល់ ៦,៦ នៃរង្វាស់រ៉ិចទ័រ បានវាយប្រហារ ភាគឦសាន នៃ ប្រទេសកូឡុំប៊ី ដែលក្នុងនោះ ក៏រួមមានរដ្ឋធានីបូហ្គោតាផងដែរ កាលពី ថ្ងៃទី១០ ខែមីនា ឆ្នាំ២០១៥ ។ នេះបើតាម ការផ្សាយពីភ្នាក់ងារព័ត៌មានក្នុងតំបន់ ។
ទីភ្នាក់ងារព័ត៌មាន ចិនស៊ិនហួ ដកស្រង់របាយការណ៍ ពីសេវាកម្មផ្នែកភូមិសាស្ត្រកូឡុំប៊ី (CSS) បាននិយាយថា គ្រោះ រញ្ជួយដីបានកើតឡើង កាលពីវេលាម៉ោង ៤ រសៀល ថ្ងៃអង្គារ ម៉ោងនៅតំបន់អាមេរិកឡាទីន ដោយវារញ្ជួយចេញពី ក្នុងជម្រៅដី ៧,៤ គីឡូម៉ែត្រ បណ្តាលឲ្យទីប្រជុំមួយចំនួន ទទួលរងការខូចខាត ដូចជាអគារលំនៅដ្ឋានយ៉ាងដំណំ។
ដោយឡែករដ្ឋធានី បូហ្គោតាវិញ ក៏បានទទួលរងគ្រោះ រញ្ជួយដីនេះដែរ ប៉ុន្តែមានកម្រិតតែ ៦,១ រ៉ិចទ័រប៉ុណ្ណោះ ដែល នាំឲ្យប្រជាជន ក្នុងទីក្រុងទាំងអស់ ភ័យស្លន់ស្លោ រត់ចេញពីអគារនានា មកឈរត្រៀបត្រាតាមដងផ្លូវដើម្បីសុវត្ថិភាព។ មកដល់ពេលនេះ គេពុំទាន់បានទទួល សេចក្តីរាយការណ៍បន្ថែមទៀត អំពីមនុស្សស្លាប់ ឬ របួស និង ការខូចខាតគិត ជារួមឡើយ ៕
