សាធារណរដ្ឋ ប្រជាធិបតេយ្យ ប្រជាមានិតកូរ៉េ នៅថ្ងៃពុធ ទី១១ ខែមីនា ឆ្នាំ ២០១៥ នេះ បានប្រកាសជា ឱឡារិកថា ឆ្នាំ ២០១៥ គឺជាឆ្នាំនៃទំនាក់ទំនងមិត្តភាព រវាងកូរ៉េខាងជើង និង រុស្ស៊ី ។
ទីភ្នាក់ងារព័ត៌មាន ចិនស៊ិនហួ បានដកស្រង់ការផ្សាយ ពីសារព័ត៌មានរដ្ឋកូរ៉េខាងជើង KCNA ទៀតថា នេះគឺជាឆ្នាំ ដំបូងហើយ នៃទំនាក់ទំនងមិត្តភាព រវាងប្រទេសទាំងពីរ ដែលត្រូវបានប្តេជ្ញា ឆ្ពោះទៅរកការអភិវឌ្ឍទំនាក់ទំនងទ្វេភាគី ឲ្យបានកាន់តែប្រសើរឡើងជាងមុន លើគ្រប់វិស័យ ដូចជា នយោបាយ, សេដ្ឋកិច្ច និង វប្បធម៌ជាដើម ។
ក្រៅពីនេះប្រទេសជិតខាងទាំងពីរ បានរៀបចំគម្រោងផងដែរ ក្នុងការផ្លាស់ប្តូរប្រេសិតទស្សនកិច្ចគ្នាទៅវិញទៅមក និង រួមគ្នាបង្កើតឡើង នូវព្រឹត្តិការណ៍វប្បធម៌ក្នុងរដ្ឋធានី ព្យុងយ៉ាង និងមូស្គូថែមទៀត។ សម្រាប់ឆ្នាំ ២០១៥ នេះដែរ គឺ ត្រូវនឹងខួបលើកទី៧០ឆ្នាំ បន្ទាប់ពីមានការរួបរួមឡើងវិញ នៃតំបន់ឧបទ្វីបកូរ៉េ ហើយក៏ជាខួបទី៧០ឆ្នាំសម្រាប់រុស្ស៊ី ផង ដែរ ដែលបានឈ្នះសង្គ្រាម ដើម្បីការពារមាតុភូមិដ៏អស្ចារ្យរបស់ខ្លួន ។
គួរបញ្ជាក់ថា កាលពីថ្ងៃទី២៨ ខែមករា កន្លងទៅនេះ វិមានក្រិមឡាំង បានប្រកាសថា ប្រមុខដឹកនាំកូរ៉េខាងជើង គីម ចុងអ៊ុន នឹងមកបំពេញទស្សនកិច្ចជាលើកដំបូង នៅទីក្រុង មូស្គូ នៅខែឧសភាខាងមុខ ដើម្បីចូលរួមកម្មវិធីរំឮកខួប លើកទី ៧០ នៃជោគជ័យរបស់សហភាពសូវៀត ទៅលើរបបណាស៊ីស អាល្លឺម៉ង់ និង សម្ព័ន្ធមិត្តរបស់ពួកគេ ៕
