នៅថ្ងៃទី១១ ខែមីនា កាលពី ៤ឆ្នាំមុន ភាគឦសានប្រទេសជប៉ុន បានទទួលរងនូវ គ្រោះរញ្ជួយដីដ៏កក្រើក និង បង្កជារលកយក្សស៊ូណាមិកម្ពស់ ១៧ម៉ែត្រ ព្រមទាំងរោងចក្រ នុយក្លេអ៊ែរ ហ្វ៊ូគូស៊ីម៉ា បានផ្ទុះឆេះ និងបែកធ្លាយសារធាតុវិទ្យុសកម្ម បណ្តាលឲ្យមនុស្ស ស្លាប់ និង បាត់ខ្លួនជាង ១៨.០០០នាក់។ទីភ្នាក់ងារព័ត៌មានជប៉ុនក្យូដូ ចេញផ្សាយនៅថ្ងៃពុធ ទី១១ ខែមីនា ឆ្នាំ២០១៥ នេះថា ពីធីរំឭក ខួបដ៏ជូរចត់នេះ ធ្វើឡើងនៅក្នុងខេត្ត អ៊ីវ៉ាតេ, មីយ៉ាគិ, និង ហ្វ៊ូគូស៊ីម៉ា ដែលទទួលរងគ្រោះថ្នាក់ ខ្លាំងជាងគេបំផុតកាលពីថ្ងៃទី១១ ខែមីនា ឆ្នាំ ២០១១ នោះ។ ចាប់តាំងពីពេលព្រឹកព្រលឹម មកម្ល៉េះ សាច់ញាតិជនរងគ្រោះ និង ប្រជាជនក្នុងតំបន់បានប្រមូលផ្តុំគ្នា គោរពវិញ្ញាណក្ខន្ធ ដល់ជន រងគ្រោះសរុបជាង ១៨.០០០នាក់។
បើតាមសម្តីរបស់អ្នករស់នៅតំបន់នោះ បានលើកឡើងប្រកបដោយភាពក្រៀមក្រំបំផុតថា មហន្តរាយបានកន្លងផុតទៅ ៤ឆ្នាំក៏ពិតមែន តែពួកយើងនៅតែមានអារម្មណ៍ដិតដាម ថាវាទើបតែ បានកើតឡើងម្សិលមិញនេះប៉ុណ្ណោះ។ យើងបានបាត់បង់សាច់ញាតិ និង ក្រុមគ្រួសារ ដោយអ្នកខ្លះសូម្បីតែសាកសព ក៏យើងមិនដឹងថាទៅដល់ទីណាផង។
គួរបញ្ជាក់ថា គ្រោះធម្មជាតិរញ្ជួយដីកម្រិត ៩,០ នៃរង្វាស់រ៉ិចទ័រ បានវាយប្រហារភាគឦសាន ប្រទេសជប៉ុន កាលពីវេលាម៉ោង ២ និង ៤៦នាទីរសៀលថ្ងៃសុក្រ ទី១១ ខែមីនា ឆ្នាំ២០១៥ ដោយពេលនោះបណ្តាលឲ្យមនុស្ស ១៥.៨៩១នាក់ស្លាប់ និង ២.៥៨៤នាក់ទៀតបាត់ខ្លួន។ គ្រោះមហន្តរាយនុយក្លេអ៊ែរ ក្នុងប្រវត្តិសាស្ត្រ ក៏បានកើតឡើងព្រមគ្នាផងដែរ៕
