សៀមរាប ៖ ឯកឧត្តមនាយឧត្តមសេនីយ៍ សេង ផល្លី ប្រធានបណ្ឌិត្យសភានគរបាលកម្ពុជាបានមានប្រសាសន៍នៅក្នុងពិធីប្រកាសតាំងស៊ប់ក្នុងក្របខ័ណ្ឌមន្ត្រីនគរបាលជាតិនៅសាលានគរបាលជាតិភូមិភាគ៤ខេត្តសៀមរាបនៅព្រឹកថ្ងៃទី១២ខែមីនានេះថា មន្ត្រីនគរបាលកម្ពុជា
ទាំងអស់ត្រូវបង្កើនចំណេះដឹងបន្ថែមដើម្បីដើរឲ្យទាន់បរិបទនៃភាពរីកចំរើនរបស់សង្គម និងប្រព័ន្ធបច្ចេកវិទ្យា។
ឯកឧត្តមបានពន្យល់ថា នៅខែធ្នូចុងឆ្នាំ២០១៥នេះប្រទេសនៅក្នុងតំបន់និងធ្វើសមាហរណកម្មពេលនោះប្រជាពលរដ្ឋនៅក្នុងតំបន់ជាច្រើនលាននាក់និងធ្វើចរាចរពីប្រទេសមួយទៅប្រទេសមួយដោយសេរី ហើយពេលនោះបទល្មើសនិងកើតឡើងច្រើននូវរាល់បទល្មើសនិងមានភាពប្លែកៗដោយប្រើប្រាស់បច្ចេកវិទ្យាទំនើបៗ ដូច្នេះបើនគរបាលជាតិកម្ពុជាយើងមិនមានជំនាញ និងចំណេះដឹងគ្រប់គ្រាន់ទេយើងច្បាស់ជាជួបបញ្ហាធំហើយ។
ឯកឧត្តមបានជំរុញឲ្យមន្ត្រីនគបាលថ្មីទាំងអស់ត្រូវគោរពឲ្យបាននូវវិន័យ និងត្រូវចេះស្វែងយល់អំពីភាពរីកចំរើននៃបរិបទសង្គម និងយើងមានសមត្ថភាពគ្រប់គ្រាន់ក្នុងការទប់ស្កាត់នូវរាល់បទល្មើសផ្សេងៗដែលកើតឡើង។
បើតាមរបាយការណ៍លោកវរៈសេនីយ៍ឯក ហុង ណារ៉ុង នាយកសាលានគរបាលជាតិភូមិភាគ៤ខេត្តសៀមរាបមន្ត្រីនគរបាលដែលទើបបញ្ចប់វគ្គបណ្តុះបណ្តាលនិងប្រកាសតាំងស៊ប់ក្នុងក្របខ័ណ្ឌមន្ត្រីនគរបាលជាតិនៅពេលនេះមានចំនួន១៨៤នាក់ ស្រី២៤នាក់ ក្នុងនោះមកពីខេត្តសៀម រាបចំនួន៩៥នាក់ ខេត្តកំពង់ធំ៣៩នាក់ មកពីខេត្តព្រះវិហារ៣២នាក់ និងមកពីខេត្តឧត្តរមានជ័យ១៨នាក់។ហើយមន្ត្រីនគរបាលទាំងនេះសុទ្ធតែបានឆ្លងការហ្វឹកហាត់មានសមត្ថភាពគ្រប់គ្រាន់ជាមន្ត្រីនគរបាលជាតិពិតប្រាកដ។
ដោយ លោកព្រិន្ទបាលទោ ខេង ខេមរា
