ខេត្តព្រះវិហារតាមសេចក្ដីរាយការណ៍បានអោយដឹងថានៅវេលាម៉ោង១០យប់ថ្ងៃទី១១មិនា២០១៥មានរថយន្ដល្មើសសុទ្ធតែស៊េរីទំនើបដឹកជញ្ជូនឈើគ្រញូងពេញៗណែនចេញពីតំបន់ព្រំដែនប្រាសាទព្រះវិហារឆ្លងកាត់ក្រុងព្រះវិហារឆ្ពោះទៅកាន់ខេត្តកំពង់ធំដោយសុវត្ថិភាព។ការដឹកជញ្ជូនឈើគ្រញូងអស់រយះពេលជិត៧ឆ្នាំយ៉ាងសេរីដូច្នេះព្រោះតែមានមេខ្លោងសមត្ថកិច្ចជើងខ្លាំងក្នុងទីរួមខេត្តព្រះវិហារមួយចំនួនជាអ្នកស៊ីឈ្នួលកាងផ្លូវនិងមានភាគហ៊ុនរកស៊ីជួញដូរឈើគ្រញូងជាមួយថៅកែគ្រញូងថែមទៀត។
ប្រជាពលរដ្ឋបានរាយការណ៍ថាសព្វថ្ងៃនេះនៅតាមដងផ្លូវជាតិលេខ៦២តភ្ជាប់គ្នាជាមួយខេត្តកំពង់ធំលេខ៦៤ឆ្ពោះទៅខេត្តឧត្តរមានជ័យនិងផ្លូវជាតិលេខ៩ឆ្ពោះទៅកាន់ខេត្តស្ទឹងត្រែងយើងសង្កេតឃើញមានការសង់រោងមានលក្ខណះមិនស្របច្បាប់ចំពីមុខទីស្នាក់ការគ្រប់ស្ថាប័នសមត្ថកិច្ចរួមទាំងមន្ដ្រីរាជការជំនាញបរិស្ថានសំរាប់ចងអង្រឹងដេកយាមទាំងយប់ទាំងថ្ងៃប្រៀបដូចកុងត្រូលជជុះប៉ុន្ដែបទល្មើសព្រៃឈើគ្រប់ប្រភេទនៅតែអាចដឹកចេញរួចផុតគគ្រឹកគគ្រេងដដែល។
តាមសេចក្ដីរាយការណ៍ពីភ្នាក់ងារបានអោយដឹងថាមានរថយន្តល្មើសចំនួន៥គ្រឿងម៉ាកហៃទ្បេនឌ័រ,លុច្ចស៊ីសនិងកាមរីបាទ្បែនដឹកឈើគ្រញូងគេចពន្ធពេញៗណែនរត់តាមផ្លូវជាតិលេខ៦២ឆ្លងកាត់ក្រុងព្រះវិហារឆ្ពោះទៅកាន់ខេត្តកំពង់ធំដោយសុវត្ថិភាពរីឯក្រុមសមត្ថកិច្ចគេចយករួចខ្លួនមិនបង្ក្រាបទប់ស្កាត់អ្វីទាំងអស់។
ភ្នាក់ងារដដែលនិយាយថាបទល្មើសដឹកជញ្ចូនឈើគ្រញូងគេចពន្ធនៅតែដឹកជញ្ចូនចេញដូចភ្លៀងរលឹមពីខេត្តព្រះវិហារដែលឈើគ្រញូងទាំងនោះមានប្រភពចេញពីតំបន់ព្រំដែនប្រាសាទព្រះវិហារជាប់ជាមួយប្រទេសថៃដែលឈើគ្រញូងមួយចំនួនធំក្រុមឈ្មួញបាននាំគ្នាប្រមូលទិញស្តុកទុកនៅក្នុងភូមិធម្មជាតិសម្ដេចតេជោតែម្ដង។
អាជ្ញាធរខេត្តព្រះវិហារដែលជាប្រធានគណះបញ្ជាការឯកភាពខេត្តកាន់ច្បាប់អាជ្ញាសឹកប្រៀបដូចជាជនពិការមាត់ម្នាក់គ្មានសមត្ថភាពស្រែកបញ្ជាទៅកាន់កងកំលាំងនៅក្រោមឱវាទអោយចុះបង្ក្រាបទប់ស្កាត់ការដឹកជញ្ចូនឈើគ្រញូងគេចពន្ធបានមួយករណីណាទ្បើយដែលបទល្មើសទាំងនេះឆ្លងកាត់ទឹកដីខេត្តព្រះវិហារដែលខ្លួនគ្រប់គ្រងរដ្ឋបាលយ៉ាងណែនក្នុងដៃ។
ពិសេសអាជ្ញាធរខេត្តមិនហ៊ានអាសាច់ស្អុយមួយដុំធំចេញបានទ្បើយពាក់ព័ន្ធសមត្ថកិច្ចកងកំលាំងមានអំណាចបុណ្យសក្ដិមួយចំនួននៅក្រោមឱវាទរបស់ខ្លួនជាឈ្មួញឈើគ្រញូងទុច្ចរិតដុះស្លែនោះ៕
បញ្ជាក់ក្នុងរូបភាពជារោងយាមមានទាំងចងអង្រឹងដេកនៅខាងមុខទីស្នាក់ការរដ្ឋបាលព្រៃឈើគ្រប់គ្រងដោយលោកជ័យរ៉េតនាយសង្កាត់រដ្ឋបាលព្រៃឈើកន្ទួតក្នុងឃុំស្រអែមស្រុកជាំក្សាន្តខេត្តព្រះវិហារប្រៀបដូចកុងត្រូលមានលក្ខណះមិនស្របច្បាប់៕
