ក្រចេះ ៖ លោកជំទាវ ឧបនាយករដ្ឋមន្ត្រី ម៉ែន សំអន រដ្ឋមន្ត្រីក្រសួងទំនាក់ទំនងព្រឹទ្ធសភា រដ្ឋសភា និងអធិការកិច្ច អមដំណើរដោយលោក ថោង ខុន រដ្ឋមន្ត្រីក្រសួងទេសចរណ៍ រួមនិងអាជ្ញាធរខេត្ត កាលពីព្រឹកថ្ងៃទី ១២ មិនា ឆ្នាំ ២០១៥ បានអញ្ចើញចូលរួម ដាំដើមឈើប្រមាណជា៦០០ដើមនៅតំបន់រមនីយដ្ឋានទេសចរណ៍ធម្មជាតិ សហគមន៍កោះទ្រុង ដើម្បីចូលរួមអបអរសាទរ បុណ្យទន្លេនៅខេត្តក្រចេះ។
លោក ស ចំរ៉ុង អភិបាល នៃគណៈអភិបាលខេត្តក្រចេះ បានមានប្រសាសន៍ថា ការជម្រុញឲ្យមានការដាំដើមឈើ ឡើងវិញនាពេលនេះ គឺសំដៅការចូលរួមចំណែកអភិរក្សធនធានធម្មជាតិ ឡើងវិញក្រោមពាក្យស្លោក ទេសចរណ៍ម្នាក់ ដើមឈើមួយដើម។
លោក ថោង ខុន មានប្រសាសន៍ថា ការដាំដើមឈើថ្ងៃនេះគឺជាការអនុវត្តន៍តាមអនុសាសន៍ដ៏ខ្ពង់ខ្ពស់របស់សម្ដេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបានថ្លែងក្នុងឱកាសផ្សព្វផ្សាយចលនាប្រឡងប្រណាំងទីក្រុងស្អាតនិងពិធីប្រកាសជាផ្លូវការនូវចលនាប្រឡងប្រណាំងទីក្រុងស្អាតដោយសម្ដេចបានស្នើរឱ្យជម្រុញអនុវត្តតំបន់
បៃតងឱ្យបានគ្រប់គ្រាន់នៅតាមក្រុងនីមួយៗហើយលើកទឹកចិត្តឱ្យមានយុទ្ធនាការដាំដើមឈើក្រោមពាក្យស្លោកដាំដើមឈើ ផ្ដើមចេញពីអ្នក ឬ ទេសចរម្នាក់ដើមឈើមួយដើម គូរស្រករមួយគូរដើមឈើពីរដើម ដោយតម្រូវឱ្យក្រសួងទេសចរណ៍សហការជាមួយក្រសួងពាក់ព័ន្ធវិស័យ ឯកជន និងអង្គការអន្តរជាតិ អង្គការជាតិទាំងអស់រៀបចំយន្តការបទដ្ឋានគតិយុត្តិពាក់ព័ន្ធ សម្រាប់ជាមូលដ្ឋានទ្រងទ្រង់យុទ្ធនាការនេះឱ្យប្រព្រឹត្តទៅដោយជោគជ័យរលូននិងប្រកបដោយនិរន្តរភាព។
លោកជំទាវ ឧបនាយករដ្ឋមន្ត្រី ម៉ែន សំអន បានចាត់ទុកសហគមន៍ទេសចរណ៍កោះទ្រង់ ជាសហគមន៍មួយរឹងមាំ ទទួលផលប្រយោជន៍ផ្ទាល់ពីលំហូរភ្ញៀវទេសចរណ៍ ដែលមកទស្សនាក្នុងសហគមន៍ នេះជាសមិទ្ធផលមួយបានរីកចំរើនអភិវឌ្ឍន៍ ដោយផ្តើមចេញពីកត្តាសន្តិភាពស្ថេរភាពនយោបាយ ក្រោមការដឹកនាំរបស់ប្រមុខរាជរដ្ឋាភិបាលកម្ពុជាបច្ចុប្បន្ន។ តាមរយៈបុណ្យទន្លេនេះដែរ លោកជំទាវ ឧបនាយករដ្ឋមន្ត្រី បានសំបួងសំរូងដល់ម្ចាស់ទឹកម្ចាស់ដីថែរក្សាតាមដងទន្លេមេគង្គសុំឲ្យជួបនូវជ័យជំនៈគ្រប់ប្រការ និងសុំឲ្យការរៀបចំពិធីបុណ្យទន្លេនេះឲ្យទទួលបានជោគជ័យ។
ក្នុងនោះលោកជំទាវ ឧបនាយករដ្ឋមន្ត្រីបានអំពាវនាវអ្នកកោះទ្រង់ ឲ្យរក្សាមុខរបរប្រពៃណីដាំក្រូចថ្លុង ដែលមានរស់ជាតិឆ្ងាញ់ រក្សាបរិស្ថាន អនាម័យ និងបៃតង បំរើសេវាកម្មដល់ភ្ញៀវទេសចរណ៍ទាំងការធ្វើដំណើរ ស្នាក់នៅ ហូបចុក ឲ្យបានសមរម្យដើម្បីលើកកម្ពស់ជីវភាពរស់នៅប្រចាំថ្ងៃ៕
ហើយនៅល្ងាចថ្ងៃដ៍ដែលនោះដែរ លោកជំទាវ ឧបនាយករដ្ឋមន្ត្រី ម៉ែន សំអន ក៍បានអញ្ចើញចូលរួម ធ្វើពិធីក្រុងពលីសុំសេចក្តីសុខដើម្បីចាប់ផ្តើមដំណើរការកម្មវិធីបានល្អគ្រប់យ៉ាង ។
