សៀមរាប ប្រធានបទ ( កីឡាដើម្បីសុខភាព ) ដែលជាប្រធានបទទី៤ នៃយុទ្ធនាការ ( សៀមរាបផ្ទះខ្ញុំ ) ក្រោមការរៀបចំឡើងដោយសហភាពសហព័ន្ធយុវជនកម្ពុជា(ខេត្តសៀមរាប) ជាមួយនឹងកិច្ចសហការដោយសមាគមកីឡាបាល់បោះខេត្តសៀមរាបផងដែរ ការប្រកួតកីឡាបាល់បោះ ដណ្តើមពានរង្វាន់ សៀមរាបផ្ទះខ្ញុំ រដូវកាលដំបូង ឆ្នាំ២០១៤-២០១៥ បានរកឃើញម្ចាស់ពានរង្វាន់នេះហើយ បន្ទាប់ពីបានឆ្លងកាត់កម្មវិធីប្រកួតរៀងរាល់ថ្ងៃអាទិត្យ ចំនួន១០សប្តាហ៍ កន្លងមក នៅលើតារាងបាល់បោះវិទ្យាល័យ១០មករា ១៩៧៩ ក្រុងសៀមរាប ។
នៅរសៀលថ្ងៃទី១៤ ( ចុងសប្តាហ៍ទី២ ខែមិនា ឆ្នាំ២០១៥ ) ក្រុមបាល់បោះចំនួន២ក្រុម ដែលបានឆ្លងកាត់ការប្រកួតដណ្តើមពិន្ទុជាលក្ខណៈវិលជុំអស់រយៈពេល១០សប្តាហ៍កន្លងមកហើយនោះ បានច្រានទម្លាក់គូប្រកួតរបស់ខ្លួនអស់ចំនួន៤ក្រុម ដែលក្នុងនោះក្រុមបាល់បោះ Siem Reap DRAGONS បានតោងជាប់ពិន្ទុ ចំណាត់ថ្នាក់លេខ៣ ដោយបានប្រកួតយកឈ្នះក្រុមកីឡាបាល់បោះ Siem Reap REAPERS នៅក្នុងវគ្គពាក់កណ្តាលផ្តាច់ព្រ័ត កាលពីថ្ងៃទី០៨ ខែមិនាកន្លងមកនេះ ។
នៅក្នុងវគ្គប្រកួតផ្តាច់ព្រ័តនេះ ក្រុមកីឡាបាល់បោះ Angkor Youth បានប្រកួតយកឈ្នះក្រុមកីឡាបាល់បោះ Siem Reap TITANS ក្នុងពិន្ទុ ០០ ទល់នឹង ០០ ។
ការប្រកាសលទ្ធផលចុងក្រោយ ! ក្រុម Angkor Youth ដែលជាក្រុមទទួលបានចំណាត់ថ្នាក់លេខ ១ ទទួលបានពានជ័យលាភី០១ និងមេដាយមាសបំពាក់ជូនកីឡាករគ្រប់រូបក្នុងក្រុម អមដោយថវិកាចំនួន១លានរៀល ។ ក្រុម Siem Reap TITANS ដែលជាក្រុមទទួលចំណាត់ថ្នាក់លេខ ២ ទទួលបានការបំពាក់ មេដាយប្រាក់ និងថវិកា ៨ សែនរៀល ។
ចំណាត់ថ្នាក់លេខ ៣ ( ក្រុម Siem Reap DRAGONS ) ទទួលបាន ការបំពាក់មេដាយសំរិទ្ធ និងថវិកា ៦សែនរៀល ។នៅក្នុងការប្រកួតតនេះផងដែរ ក្រុម Siem Reap REAPERS ត្រូវបានទទួលការវាយតម្លៃ និងប្រគល់ពានរង្វាន់ ជាក្រុមដែលគោរពវិន័យ ចេះសាមគ្គីគ្នាក្នុងការលេង ប្រធានក្រុមដឹកនាំបានល្អ ផងដែរ ។ ជាមួយគ្នានេះ កីឡាករ១រូប ដែលជាកូនក្រុម
របស់ Angkor Youth ដែលក្រុមជាប់ចំណាត់លេខ១ក្នុងការប្រកួតនេះ ត្រូវបានគេ ជ្រើសរើស វាយតម្លៃថា ជាកីឡាករឆ្នើមក្រោមអាយុ២០ឆ្នាំ ហើយត្រូវបានគេប្រគល់ពានរង្វាន់ ១ អមដោយស្បែកជើងកីឡា ១គូ ព្រមទាំងមានរង្វាន់លើកទឹកចិត្ត ជូនចំពោះកីឡាករយុវជនចំនួន ៣ រូបទៀត រួមមាន អាវមួយ កងដៃយុវជន និងថវិកា ៥ ម៉ឺនរៀល ៕ ដោយគឿនវ៉េត
