កំពង់ឆ្នាំង៖ជនម្នាក់ជិៈម៉ូតូទៅទាក់និងដៃចង្កូតម៉ូតូមួយគ្រឿងផ្សេងទៀតដែលជិៈទន្ទឹមគ្នា បណ្តាលអោយជ្រុលចង្កូតទៅខាងឆ្វេងដៃបុកជាមួយរថយន្តមួយគ្រឿងទៀតក្នុងដំណើរច្រាស់ទិសគ្នា ធ្វើអោយយុវជនរងគ្រោះស្លាប់ភ្លាមៗ។ គ្រោះថ្នាក់នេះបានកើតឡើងនៅវេលា
ម៉ោង ៦និង ៣០នាទីល្ងាច ថ្ងៃទី១៥ ខែមិនា ឆ្នាំ ២០១៥ នៅលើផ្លូវជាតិលេខ៥ ក្នុងចន្លោះគីឡូម៉ែត្រលេខ ៤៤ និងលេខ៤៥ ស្ថិតក្នុង ភូមិចំការស្វាយ ឃុំសេដ្ឋី ស្រុកសាមគ្គីមានជ័យ ។
លោក ដួង ហុង អធិការនគរបាល ស្រុកសាមគ្គីមានជ័យ បានអោយដឹងថា៖ ជនរងគ្រោះមាន
ឈ្មោះ ជរ សុគារ៉ា អាយុ២២ឆ្នាំ មានទីលំនៅ ភូមិជំទាវជ្រែង ឃុំក្រាំងល្វា ស្រុកសាមគ្គីមានជ័យ ជិៈម៉ូតូម៉ាក ហុងដា ឌ្រីម សេរី០១៥ ពាក់ស្លាកលេខ កំពង់ឆ្នាំង 1E. 3311 ។
លោក អធិការបានអោយដឹងទៀតថា៖មុនពេលកើតហេតុ ជនរងគ្រោះបានជិៈម៉ូតូ ក្នុងដំណើរពីត្បូងមកជើង លុះ មកដល់ចំណុចកើតហេតុ បានបើកវ៉ានិងម៉ូតូមួយគ្រឿងទៀតក្នុងដំណើរស្របទិសគ្នា ហើយក៏បានទាក់ដៃចង្កូតម៉ូតូជាមួយគ្នា បណ្តាលអោយម៉ូតូជនរងគ្រោះច្រឡោតមកឆ្វេងដៃ ស្របពេលជាមួយគ្នានោះ ស្រាប់តែមានរថយន្តមួយគ្រឿង ម៉ាកហ៊ីយ៉ាន់ដាយ ចំណុះ៣តោន គ្មានស្លាកលេខ បើកបរដោយជនពុំស្គាល់ឈ្មោះបើកមកពីមុខក្នុងដំណើរច្រាស់ទិសគ្នា ក៏បានបុកជាមួយម៉ូតូពេញទំហឹងតែម្តងបណ្តាល អោយជនរងគ្រោះស្លាប់នៅនឹងកន្លែងកើតហេតុ ចំណែកម៉ូតូបានអូសជាប់រថយន្ត ជាង១០ម៉ែត្រ អ្នកបើកបររថយន្តបានចុះគេចខ្លួនបាត់ទុករថយន្តចោលនៅកម្នលែងកើតហេតុ។
ចំណែកសពជនរងគ្រោះត្រូវបានក្រុមគ្រួសារដឹកយកទៅធ្វើបុណ្យតាមប្រពៃណីនៅលំនៅ ដ្ឋាន។រថយន្តនិងម៉ូតូត្រូវបានសមត្ថកិច្ចនគរបាលនាំយកមករក្សាទុកនៅការិយាល័យចរាចរណ៏ផ្លូវគោក
នៃស្នងការដ្ឋាននគរបាលខេត្ត កាសងសំនុំរឿងរង់ទុកដោះស្រាយតាមផ្លូវច្បាប់៕
