ភ្នំពេញ ៖ បុរសជនជាតិវៀតណាម២នាក់ស្រវឹងជោកជាំជិះរថយន្តលុចស៊ីសធ្វើដំណើរតាមផ្លូវកកស្ទះចរាចរខ្លាំងពេក ក៏ថយរថយន្តវិញបំរុងបត់ត្រឡប់ក្រោយមិនប្រយ័ត្នក៏ជ្រុលទៅបុកចំរថយន្តកាមរីបាឡែនមួយបើកបរដោយនារីម្នាក់រងការខូចខាត។ ហេតុការណ៍នេះបាន
កើតឡើងកាលពីវេលាម៉ោង៩និង៣០នាទីយប់ ថ្ងៃទី១៥ ខែមិនា ឆ្នាំ២០១៥ ត្រង់ចំណុចក្បែរហាងអង្គរមានជ័យ តាមបណ្ដោយផ្លូវមុនីរ៉េត ស្ថិតក្នុងសង្កាត់ស្ទឹងមានជ័យ។
ប្រភពព័ត៌មានពីកន្លែងកើតហេតុបានអោយដឹងថា មុនពេលកើតហេតុបុរសជនជាតិវៀតណាម២នាក់ជិះរថយន្ត លុចស៊ីសRX300មួយគ្រឿង ពណ៌ស ពាក់ស្លាកលេខ ភ្នំពេញ 2U-2066 ធ្វើដំណើរតាមបណ្ដោយផ្លូវមុនីរ៉េត ទិសដៅ ពីកើតទៅលិច ស្រាប់តែមកដល់ចំណុចកើតហេតុចរាចរមានការកកស្ទះនិងការដ្ឋានផ្លូវចាក់បេតុងថ្មីរថយន្តលុចស៊ីស ក៏បើកយឺតៗហើយឈប់ មិនដឹងថាយ៉ាងមិចស្រាប់តែរថយន្តលុចស៊ីសបើកថយក្រោយមកវិញទំនងចង់បត់ត្រឡប់ ក្រោយ ក៏បុកប៉ះនិងរថយន្តកាមរីបាឡែន ពណ៌សមួយគ្រឿង ពាក់ស្លាកលេខ ភ្នំពេញ 2V-3515 ដែលនៅពីក្រោយ បើកបរដោយនារីម្នាក់ធ្វើអោយរងការខូចខាត។ ភ្លាមនោះនារីជាម្ចាស់រថយន្តក៏ចុះទៅសួរនាំក៏ត្រូវបុរសជនជាតិ វៀតណាមរុញសឹងដាច់ផ្ងារ ថែមទាំងចង់រកវាយនារីជាម្ចាស់រថយន្តថែមទៀត ក៏ត្រូវនារីជាម្ចាស់រថយន្តស្រែកអោយ អ្នកដំណើរតាមផ្លូវជួយ ហើយបុរសជនជាតិវៀតណាមទាំង២នាក់ក៏ព្យាយាមចង់បើករថយន្តរត់ ស្រាប់តែឃើញច្រក ហាងផឹកស៊ីអង្គមានជ័យធំល្អស្មានតែជាផ្លូវក៏បើកចូលទល់ទៅមុខមិនកើតក៏ត្រូវប្រជាពលរដ្ឋនិងនារីជាម្ចាស់រថយន្ត ឃាត់ហៅសមត្ថកិច្ចមកជួយដោះស្រាយ។
បន្ទាប់ពីកើតហេតុសមត្ថកិច្ចមូលដ្ឋានក៏បានចុះមកដល់ ហើយភាគីទាំង២ក៏ធ្វើការសម្របសម្រួលគ្នាមិនត្រូវក៏ សម្រេចយករថយន្តទាំង២គ្រឿងទៅរក្សាទុកដើម្បីធ្វើការដោះស្រាយតាមច្បាប់៕
