កំពង់ឆ្នាំង៖ជនសង្ស័យសញ្ជាតិវៀតណាមកំណាចម្នាក់ ត្រូវបានសមត្ថកិច្ចនគរបាលក្រុងកំពង់ឆ្នាំងចាប់ខ្លួន បន្ទាប់ពីរូបគេបានយកដំបងឬស្សី វាយបែកក្បាលជនរងគ្រោះម្នាក់ទៀតសញ្ជាតិ្តវៀតណាមដូចគ្នា បណ្តាលអោយរងរបួសធ្ងន់ធ្ងរ។ ករណីចាប់ខ្លួននេះបានធ្វើឡើង
នៅវេលាម៉ោង៩និង៣០នាទីព្រឹកថ្ងៃទី១៥ ខែមិនា ឆ្នាំ២០១៥ នៅក្នុងភូមិកណ្តាល សង្កាត់កំពង់ឆ្នាំង ក្រុងកំពង់ឆ្នាំង។ លោក ម៉ា យន្ត នាយផ្នែកនគរបាលព្រហ្មទណ្ឌ័ក្រុងកំពង់ឆ្នាំងបានអោយដឹងថា៖ ជនសង្ស័យរូបនោះមានឈ្មោះ ចាំង យ៉ាំងគួ អាយុ២៨ឆ្នាំ ចំណែកជនរងគ្រោះមានឈ្មោះ ឡេ យ៉ាំងថេម អាយុ២៤ឆ្នាំ គេទាំង២នាក់ស្នាក់នៅភូមិកណ្តាល សង្កាត់ផ្សារឆ្នាំង ក្រុងកំពង់ឆ្នាំង។មុនពេលកើតហេតុ នៅល្ងាចថ្ងៃទី១៤ ខែកុម្ភះឆ្នាំ ២០១៥ ជនសង្ស័យទាំងពីរនាក់បានផឹកស៊ីជា មួយគ្នា រហូតដលម៉ោងជាង៨យប់ក៏មានទំនាស់ពាក្យសំដីនឹងគ្នា ពេលនោះ ជនសង្ស័យឈ្មោះ ចាំង យ៉ាំងគួ បានទាញយកដំបងឬស្សីពីងពុងមកវាយសំពងក្បាលជនរងគ្រោះបណ្តាលអោយរងរបួសបែកក្បាលយ៉ាងធ្ងន់ ហើយត្រូវបានក្រុមគ្រួសារដឹកមកយកសង្គ្រោះនៅមន្ទីរពេទ្យខេត្តកំពង់ឆ្នាំង តែដោយរបួសធ្ងន់ពេក គ្រូពេទ្យបានបញ្ជូនទៅសង្គ្រោះនៅមន្ទីរពេទ្យក្នុងភ្នំពេញជាបន្តទៀត។
ក្រោយពេលកើតហេតុជនដៃដល់បានគេចខ្លួនបាត់មួយយប់ លុះព្រឹកឡើងត្រូវសមត្ថកិច្ចក៏បានចុះស្រាវជ្រាវរុរកចាប់ខ្លួនគេបានតែម្តង យកមកសាកសួរកសាងសំណុំរឿងតាមផ្លូវច្បាប់។ ជនសង្ស័យរូបនោះត្រូវបានកម្លាំងសមត្ថកិច្ចនគរបាលក្រុងកំពង់ឆ្នាំង កសាងសំណុំរឿងចោទប្រកាន់ពីបទ ហឹង្សាដោយចេតនាមានស្ថានទម្ងន់ទោស បញ្ជូនខ្លួនទៅកាន់ស្នងការដ្ឋាននគរបាលខេត្ត ដើម្បីបំពេញសំណុំបែបបទបន្ថែមតាមនិតិវិធី បញ្ជូនទៅតុលាការខេត្តផ្តន្ទាទោសតាមបញ្ញត្តិច្បាប់ ៕
