ខេត្តព្រះសីហនុ៖ កាលពីថ្ងៃទី១៥ ខែមិនា ឆ្នាំ២០១៥ រដ្ឋបាលជលផលកំពង់សោម បាននឹងកំពុងបំផុសចលនាប្រជាពលរដ្ឋក្នុងមូលដ្ឋាន និងក្នុងខេត្តព្រះសីហនុ ឪ្យចូលរួមដាំដុះកូនកោងកាងឡើងវិញ ដើម្បីប្រយោជន៌បង្កើតជម្រកមច្ឆាជាតិពង កូន និងជម្រកសត្វបក្សាបក្សី
ឪ្យសម្បូរឡើងវិញ ។
លោក នេន ចំរើន នាយខណ្ឌរដ្ឋបាលជលផលកំពង់សោម បានឪ្យដឹងថា ខណ្ឌរដ្ឋបាលជលផលបានបង្កើនសួនអាពាហ៍ពិពាហ៍ក្នុងឆ្នាំ២០១៤ លើផ្ទៃដីចំនួន០២ហិកតា ក្នុងសហគមន៌នេសាទព្រៃនប់២ ស្ថិតក្នុងភូមិព្រែកសង្កែ ឃុំទឹកថ្លា ស្រុកព្រៃនប់ ខេត្តព្រះសីហនុ ដោយបានការគាំទ្រពីអាជ្ញាធរមូលដ្ឋាន ពិសេសឯកឧត្តម អភិបាលខេត្តព្រះសីហនុ ។ ហើយនៅថ្ងៃនេះមានគូស្វាមីភរិយាចំនួន៥គូបានស្មគ្រ័ចិត្តចូលរួមដាំកូនកោងកាងនៅក្នុងសហគមន៌នេសាទព្រៃនប់២ ព្រោះការបង្កើនសួនអាពាហ៍ពិពាហ៍នេះ ក្នុងគោលបំណងឱ្យគូស្វាមីភរិយា ដែលបានរៀបអាពាហ៍ពិពាហ៍ចូលរួមដាំកូនកោងកាងក្នុងសួននេះម្នាក់មួយដើម ដើម្បីជានិមិត្តរូបក្នុងការរួមចំណែកថែរក្សាការពារបរិស្ថាន និងការដាំដុះព្រៃលិចទឹកឡើងវិញ ជាពិសេសរក្សាបាននូវគម្របព្រៃឈើ និងជម្រកសម្រាប់ពួកមច្ឆជាតិពង កូន និងជាជម្រកសត្វបក្សាបក្សីកាន់តែថែមទៀត ។
លោក នេន ចំរើន បានឱ្យដឹងបន្តទៀតថា ការដាំកូនកោងកាងនៅក្នុងសួនអាពាហ៍ពិពាហ៍ មិនមែនសម្រាប់តែយុវវ័យដែលត្រូវរៀបអាពាហ៍ពិពាហ៍នោះទេ ប៉ុន្តែប្រជាពលរដ្ឋពួកគាត់ក៏អាច មកដាំកូនកោងកាងនៅក្នុងសួនអាពាហ៍ពិពាហ៍នេះបានផងដែរ ឱ្យតែពួកគាត់មានបំណងចូលរួមដាំដុះកូនកោងកាង ដោយមន្ត្រីរបស់យើងនៅរង់ចាំសហការក្នុងដាំដុះកូនកោងកាងនេះ តាមគោលនយោបាយរបស់រាជរដ្ឋាភិបាលកម្ពុជា ក្នុងការគ្រប់គ្រងថែរក្សាព្រៃលិចទឹកនៅក្នុងដែនសហគមន៍នេសាទ ក៏ដូចជាក្នុងដែនគ្រប់គ្រងរបស់សមត្ថកិច្ចរដ្ឋបាលជលផលកំពង់សោមឱ្យមាននិរន្តរភាព ។
លោក នេន ចំរើន បានបន្តថា រដ្ឋបាលជលផលបានធ្វើការផ្សព្វផ្សាយជាប្រចាំដល់ប្រជាពលរដ្ឋក្នុងសហគមន៍នេសាទទាំងអស់ឱ្យចូលរួមថែរក្សាការពារព្រៃកោងកាង និងចូលរួមដាំដុះកូនកោងកាងដែលជាជម្រកត្រីពងកូន យើងក៌មានគម្រោងសហការជាមួយមន្ទីរទេសចរ ដើម្បីទាក់ ទាញភ្ញៀវទេសចរជាតិ និងអន្តរជាតិដែលបានមកលេងខេត្តព្រះសីហនុ អញ្ជើញចូលរួមដាំកូនកោងកាងម្នាក់មួយដើម ដើម្បីចូលរួមថែរក្សាការពារបរិស្ថាន និងការដាំដុះព្រៃលិចទឹកឡើងវិញដើម្បីបង្កើនជាជម្រកពួកមច្ឆាជាតិ ក៌ដូចពួកសត្វស្លាបផងដែរ ។
លោកនេនចំរើនបានបញ្ជាក់ថា មកដល់ពេលនេះមានគូស្វាមី ភរិយាចំនួន១៥គូ បានមកដាំកូនកោងកាងនៅក្នុងសួនអាពាហ៍ពិពាហ៍នេះ ហើយសង្ឃឹមថានៅរដូវប្រាំងនេះនឹងមានគូស្វាមី ភរិយាដែលបានរៀបអាពាហ៍ពិពាហ៍ នឹងចូលរួមដាំកូនកោងកាងនៅក្នុងសួនអាពាហ៍ពិពាហ៍នេះកាន់តែច្រើនបន្ថែមទៀត៕ 
