ខេត្តប៉ៃលិន៖ គេសង្កេតឃើញសំរាមជាច្រើន ត្រួវបានយកមកបោះចោលពាសពេញស្របតាមដងផ្លួវ តាមទីសាធារណៈក្នុងភូមិ បង្កឱ្យជះក្លិនយ៉ាងអាសោច៍ប៉ះពាល់ដល់ការរស់នៅរបស់ប្រជាពលរដ្ឋនៅក្បែរភូមិ និងអ្នករស់នៅក្បែរគំនរសម្រាម ដែលការដឹកសម្រាមយកទៅចោល
យ៉ាងអនាធិបតេយ្យនេះ បានកើតឡើងជារៀងរាល់ថ្ងៃ ហើយមិនទានមានអាជ្ញាធរពាក់ព័ន្ធណា ចាត់វិធានការដើម្បីចាប់អ្នកប្រព្រិត្តមកដាក់ទោស ឬអប់រំ ណែនាំ នៅឡើយនោះទេ ។
ប្រភពពត៌មានពីប្រជាពលរដ្ឋរស់នៅភូមិផ្សារព្រំ បានឲ្យអ្នកយកពត៌មានកម្ពុជាថ្មីដឹងកាលពីថ្ងៃទី១៦ ខែមិនា នេះថា៖ ភូមិផ្សារព្រំជាភូមិមួយដែលមានព្រំប្រទល់ជាប់និងប្រទេសថៃ មានច្រកទា្វអន្តរជាតិមួយ ដែលមានភ្ញៀវទេសចរជាតិ-អន្តរជាតិឆ្លងកាត់ មិនដែលដាច់នោះទេ ។ ហើយភ្ញៀទេសចរទាំងនោះតែងតែរអូរទាំពេលពួកគេធ្វើដំណើរ តាមផ្លួវថា មានក្លិនស្អុយសឹងតែទ្រាំមិនបានក្នុងការធ្វើដំណើរ ។ប្រភពបន្តទៀតថា៖ជារៀងរាល់ថ្ងៃគេសង្កេតឃើញអ្នករត់ម៉ូតូឌុប បានជិះម៉ូតូដឹកសំរាមយកទៅបោះចោលនៅក្បែរផ្លូវ ដែលប្រជាពលរដ្ឋធ្វើដំណើរឆ្លងកាត់, ហើយសំរាមទាំងនោះភាគច្រើនដាក់ការ៉ុង ឬថង់ដែលមានកំទេចកាកសំណល់ផ្ទះបាយ សំបកបន្លែ កាកអំពៅ សំបកពងមាន់ ពងទា ស្រកាត្រី និងថង់ដែលមានក្លិនស្អុយស្ទើរតែទ្រាំមិនបាន។សម្រាមទាំងនេះគឺអ្នកម៉ូតូឌុបបានស៊ីឈ្នួលពីអាជីវករ ដោយឌុបទាំងការ៉ុៗ យកទៅចាក់ចោល ខណៈដែលស្ងាត់មនុស្ស ដោយមិនគិតខ្វល់ពីផលប៉ះពាល់ដល់បរិស្ថានអ្វីបន្តិចសោះឡើយ ។ ទោះបីជាបែបនេះក្តីគេមិនឃើញមានខាងបរិស្ថាន ឬអាជ្ញាធរភូមិ សង្កាត់ណាម្នាក់ចុះទៅ ពិនិត្យមើលនោះឡើយ ដោយបណ្តោយឱ្យគេយកសំរាមទៅចោលយ៉ាងគ្មានសណ្តាប់ធ្នាប់ ។ ចំណែកប្រជាពលរដ្ឋក្នុងក្រុងប៉ៃលិន ក៏បានលើកឡើងមិនខុសគ្នានោះដែរ ពួកគាត់បានឲ្យដឹងថា សំរាមដែលមានស្របតាមផ្លួវធ្វើដំណើរនេះ ភាគច្រើនជាសំរាមដែលអាជីវករ និងអ្នកម៉ូតូឌុបយកមកចោល ។
ប្រភពបន្តទៀតថា៖ ប្រការនេះវាផ្ទុយពីគោលនយោបាយរបស់រាជរដ្ឋាភិបាលកម្ពុជា ដែលមានសម្តេចអគ្គមហាសេនាបតីតេជោ ហ៊ុន សែន ជាប្រមុខដឹកនាំ ដែលសម្តេចជំរុញឲ្យមានចលនាទីក្រុងស្អាតទូទាំងប្រទេស ហើយខេត្តប៉ៃលិនជាខេត្តមួយ ក្នុងចំណោមខេត្តទាំង២៥ ដែលទទូលបាននូវផ្ការំដួលមួយទងផងដែរ ។
ពួកគាត់បានសំណូរពរដល់អាជ្ញាធរខេត្ត ក្រុង មេត្តាចាត់វិធានការលើជនដែលប្រព្រត្តិ ដើម្បីដាក់ទោស ឬអប់រំ ណែនាំ ឲ្យស្គាល់ពីបញ្ហាបរិស្ថាន និងលើកកំពស់ទីស្អាត ស្របតាមគោលនយោបាយរបស់រាជរដ្ឋាភិបាលកម្ពុជា ផងដែរ ៕
