សៀមរាបៈជនរងគ្រោះម្នាក់មិនស្គាល់អត្តសញ្ញាណត្រូវបានជនមិនស្គាល់មុខមួយក្រុមចាក់និងវាយដោយបង្គោលរបងថ្មយ៉ាងព្រៃផ្សៃស្លាប់នៅនឹងកន្លែង លុះព្រឹកឡើងទើបអ្នកភូមិប្រទះឃើញ ធ្វើឲ្យមានការភ្ញាក់ផ្អើល។
ហេតុការភ្ញាក់ផ្អើលនេះធ្វើឡើងនៅម៉ោង៦និង៣០នាទីព្រឹក ថ្ងៃទី១៨ខែមិនាឆ្នាំ២០១៥ នៅចំណុចផ្លូវលំមួយខ្សែស្ថិតក្នុងភូមិត្រពាំងសេះ សង្កាត់គោកចក ក្រុងសៀមរាប។
មន្ត្រីកងរាជអាវុធហត្ថបានឲ្យដឹងថាពិតជាមានអំពើឃាតកម្មទៅលើបុរសម្នាក់មែន ដោយនៅម៉ោង៦និង៣០នាទីព្រឹកថ្ងៃទី១៨ខែមិនាអ្នកភូមិបានប្រទះឃើញ ហើយផ្តល់ព័ត៏មានមកសមត្ថកិច្ច។តែរហូតមកទល់ពេលនេះសមត្ថកិច្ចនៅមិនទាន់រកអត្តសញ្ញាណសាកសពជនរងគ្រោះឃើញនៅឡើយទេថា គាត់មានឈ្មោះអ្វី អាយុប៉ុន្មាន មុនពេលស្លាប់រស់នៅភូមិស្រុកខេត្តណា។ សាកសពមានស្នាមរបួស កាប់ពីក្រោយដោយកាំបិតតូច និងវាយដោយរបងថ្មបាក់ឆ្អឹងជំនីជាច្រើន និងវាយផ្នែកក្បាល។ លោកបន្តថា ឃាតករមានគ្នាលើសពី២នាក់ ពីព្រោះតាមការសាកសួរ នៅមុនពេលកើតហេតុអ្នកភូមិបញ្ជាក់ថា គេឃើញមានម៉ូតូចំនួនពីរគ្រឿង បានជិះមកឈប់នៅទីនោះ បន្ទាប់មកក៏ចេញទៅបាត់ តែមិនបានដឹងថាមានរឿងអ្វី ហើយក៏មិនមានឮសម្លេងស្រែកអ្វីដែរ។ សាកសពបុរសខាងលើមានកំពស់១,៦៨ម៉ែត្រស្លៀកខោរខូវបូយខៀវពាក់អាវយឺតពណ៏ខ្មៅដៃខ្លី កាត់សក់ខ្លី មានចាក់សាក់នៅលើដើមទ្រូង រូបបេះដូងនិងរូបពូថៅ។
មន្ត្រីកងរាជអាវុធហត្ថបន្តឲ្យដឹងទៀតថា តាមការស៊ើបអង្កេត ជនរងគ្រោះនិងជនដៃដល់ជាក្រុមតែមួយ ចឹងទេក្រោយរកអត្តសញ្ញាណជនរងគ្រោះឃើញ គឺអាចរកមុខឃាតករឃើញ។ ពេលនេះសមត្ថកិច្ចកំពុងដុតដៃដុតជើង ស្វែងរកអត្តសញ្ញាណជនរងគ្រោះ ដើម្បីឈានទៅចាប់ខ្លួនក្រុមជនដៃដល់យកមកផ្តន្ទាទោសតាមច្បាប់៕
