កំពង់ឆ្នាំង៖អាគារសិក្សាថ្មីមួយខ្នង៦បន្ទប់នៃសាលាបឋមសិក្សាទឹកហូត ស្ថិតក្នុងឃុំទឹកហូត ស្រុករលាប្អៀរ ដែលជាអំណោយរបស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ត្រូវបានដាក់សម្ភធអោយប្រើប្រាស់ជាផ្លូវការនៅព្រឹកថ្ងៃទី១៨ ខែមិនា ឆ្នាំ២០១៥ ក្រោមអធិបតីភាពសម្តេចចៅហ្វាវាំង គង់ សំអុល អនុ ប្រធានអចិន្ត្រៃយ៍នៃគណៈកម្មាធិការកណ្តាលកាកបាទក្រហមកម្ពុជា ដោយមានការអញ្ជើញចូលរួមពី លោកជំទាវ ពុំ ចន្ទីនី អគ្គលេខាធិការកាកបាទក្រហមកម្ពុជា ឯកឧត្តមអភិបាលខេត្ត ឯកឧត្តម លោកជំទាវ លោក លោកស្រី និងប្រជាពលរដ្ឋសិស្សនុសិស្សចូលរួមសរុបចំនួន២០៤៦នាក់។
ឯឧត្តម ឈួរ ច័ន្ទឌឿន អភិបាលខេត្តបានថ្លែងអោយដឹងថា៖ វិស័យអប់រំនៅក្នុងខេត្តកំពង់ឆ្នាំងមានសាលាមតេយ្យសរុបចំនួន២០៤កន្លែង ស្មើនឹង២៩៦បន្ទប់ សាលាបឋមសិក្សាមាន២៦៩កន្លែង ស្មើនឹង២១៦៨បន្ទប់ គ្រឹះស្ថានមធ្យមសិក្សាមាន៧៥កន្លែង ក្នុងនោះមានអនុវិទ្យាល័យ៦០កន្លែងស្មើនឹង២៧៥បន្ទប់ វិទ្យាល័យមានចំនួន១៥កន្លែងស្មើនឹង២០៧បន្ទប់ សិស្សានុសិស្សកំពុងសិក្សាមាន១១៤.៩៨១នាក់ ស្រីមាន៥១.៦៧០នាក់។ដោយឡែកអាគារសិក្សាដែលជាអំណោយផ្ទាល់របស់សម្តេចតេជោ និងសម្តេចកិត្តិព្រឹទ្ធបណ្ឌិត ក្នុងខេត្តកំពង់ឆ្នាំងសរុបមានចំនួន១៤០ខ្នង ស្មើនឹង៧៤១បន្ទប់ ក្នុងស្រុករលាប្អៀរមានចំនួន៣៤ខ្នង ស្មើនឹង១៨១បន្ទប់។ដោយឡែកក្នុងពេលនេះអាគារថ្មីមួយខ្នងមាន៦បន្ទប់ និងគ្រឿងបំពាក់ទាំងអស់នៅក្នុងបន្ទប់សិក្សា ដែលជាអំណោយដ៍ថ្លៃថ្លារបស់សម្តេចកិត្តិព្រឹទ្ធបណ្ឌិត បានសាង សង់រួចហើយ ត្រូវបានសម្ភោធដាក់ប្រើប្រាស់ក្នុងថ្ងៃនេះ។
សម្តេចចៅហ្វាវាំង គង់ សំអុល អនុប្រធាន អចិន្ត្រៃយ៍នៃគណៈកម្មាធិការកណ្តាលកាកបាទក្រហមកម្ពុជា តំណាងអោយសម្តេចកិត្តិព្រឹទ្ធបណ្ឌិតប្រធានកាកបាទក្រហមកម្ពុជា បានមានប្រសាសន៍នៅក្នុងពិធីសម្ភោធអាគារសិក្សានេះថា៖សមិទ្ធិផល និងការរីកចំរើនលើវិស័យអប់រំខាងលើនេះ ជាសក្ខីភាពបញ្ជាក់យ៉ាងច្បាស់ថា សម្តេចនាយករដ្ឋមន្ត្រី និងសម្តេចកិត្តិព្រឹទ្ធបណ្ឌិតប្រធានកាកបាទក្រហមកម្ពុជា ជានិច្ច ជាកាលបានគិតគូរចំពោះការអភិវឌ្ឍន៍លើវិស័យអប់រំនៅគ្រប់មូលដ្ឋាន ដើម្បីអោយកូនចៅប្រជាពលរដ្ឋនៅតាមជនបទបានចូលរៀនសូត្រគ្រប់ៗគ្នា បង្កើនចំណេះដឹង បង្កើនធនធានមនុស្ស និងមានឱកាសស្មើៗគ្នាក្នុងការរួមចំណែកអភិវឌ្ឍន៍ប្រទេសជាតិលើគ្រប់វិស័យ នឹងបានរីកចំរើនបន្ថែមទៀត។
ក្នុងនោះដែរសម្តេចចៅហ្វាវាំងបានពាំនាំការនឹករលឹក និងសួសុខទុក្ខពីសំណាក់សម្តេចទាំង២ចំពោះបងប្អូនប្រជាពលរដ្ឋក្នុងស្រុករលាប្អៀរ ក៍ដូចជាក្នុងខេត្តកំពង់ឆ្នាំងទាំងអស់ផងដែរ ដែលកន្លងមកសម្តេចកិត្តិព្រឹទ្ធបណ្ឌិតតែងបានផ្តល់អំណោយមនុស្សធម៌ ជូនដល់ជនរងគ្រោះគ្រប់ប្រភេទដោយមិនប្រកាន់នយោបាយ និងជំនឿសាសនាអ្វីឡើយ។
នៅក្នុងពិធីនេះដែរសម្តេចកិត្តិព្រឹទ្ធបណ្ឌិត ប៊ុនរ៉ានី ហ៊ុនសែន ប្រធានកាកបាទក្រហមកម្ពុជាបានប្រគល់អំណោយជូនសាលាបឋមសិក្សាទឹកហូតនូវថវិកាចំនួន២លានរៀល,វិទ្យាល័យទឹកហូត២លានរៀល,លោកគ្រូអ្នកគ្រូ៥២នាក់ ម្នាក់ៗទទួលបាន២ម៉ឺនរៀល,យុវជនកាកបាទក្រហម និងយុវជនកាយរិទ្ធ១០០នាក់ ម្នាក់ៗទទួលបាន១ម៉ឺនរៀល។ក្នុងនោះផងដែរសម្តេចទាំង២បានប្រគល់ជូនអំណោយដល់សិស្ស បឋមសិក្សាទឹកហូត និងសិស្សវិទ្យាល័យទឹកហូត៧១០នាក់ ម្នាក់ៗទទួលបានសៀវភៅ២ក្បាល ប៊ិច១ដើម និងប្រាក់៥ពាន់រៀល។ចំណែកសម្តេចចៅហ្វាវាំងបានប្រគេនបច្ច័យប្រគេនព្រះសង្ឃ និងឧបត្ថម្ភថវិ ការមួយចំនួនថែមទៀតដល់សិស្សានុសិស្ស លោកគ្រូអ្នកគ្រូ យុវជនកាយរិទ្ធ យុវជនកាកបាទក្រហម ដែលបានចូលរួមនៅក្នុងកម្មវិធីនេះផងដែរ៕ 
