ខេត្តប៉ៃលិន ៖ ខណ្ឌរដ្ឋបាលព្រៃឈើប៉ៃលិន ស្ទាក់ចាប់រថយន្តមួយគ្រឿងដែលដឹកបាច់ឫស្សីចំនួន៩០បាច់ និងបង្គោលរបងចំនួន៥០ដើម អត់មានច្បាប់អនុញ្ញាត ព្រមទាំងឃាត់ខ្លួនស្ត្រីម្នាក់ និងម្ចាស់រថយន្តច្នៃ យកមកស្នាក់ការខណ្ឌរដ្ឋបាលព្រៃឈើប៉ៃលិន ។ ហេតុការណ៍ចាប់ឃាត់រថយន្តខាងលើ បានធ្វើឡើងកាលពីវេលាម៉ោង៤ និង៣០នាទី រសៀលថ្ងៃទី១៥ ខែមីនា ឆ្នាំ២០១៥ តាមបណ្តោយផ្លូវជាតិលេខ៥៧ ស្ថិតក្នុងភូមិដីក្រហម សង្កាត់អូរតាវ៉ៅ ក្រុងប៉ៃលិន ខេត្តប៉ៃលិន ។
ស្ត្រីដែលត្រូវខណ្ឌរដ្ឋបាលព្រៃឈើប៉ៃលិន ចាប់ឃាត់បង្គោលរបង និងបាច់ឫស្សី ឈ្មោះ ស្រីម៉ៅ អាយុ៤៨ឆ្នាំ ជាកសិករ ,ចំណែកម្ចាស់រថយន្តកែច្នៃ ឈ្មោះ ប៊ុន ថន ភេទប្រុស អាយុ៤៩ឆ្នាំ ទាំងពីរនាក់ រស់នៅភូមិអូរពឺត សង្កាត់ទួលល្វា ក្រុងប៉ៃលិន ខេត្តប៉ៃលិន ។
ប្រភពពត៌មានពីកន្លែងកើតហេតុ បានឲ្យដឹងថា៖ មុនពេលកើតហេតុគេឃើញរថយន្តកែច្នៃមួយគ្រឿង ដឹកបាច់ឫស្សីមួយចំនួន និងបង្គោលរបងដែលមានការបិទបាំង នៅខាងក្រោមបាច់ឫស្សី ដោយបើកបរតាមបណ្តោយផ្លួវជាតិលេខ៥៧ ក្នុងទឹសដៅពីកើតទៅលិច លុះមកដល់ចំនុចកើតហេតុក៏មានមន្ត្រីប៉ូលីស និងរដ្ឋបាលព្រៃឈើ សួររកលិខិតអនុញ្ញាត តែដោយមិនមានឯកសារគ្រប់គ្រន់ ក៏ធ្វើការឃាត់រថយន្ត និងអ្នកជិៈតែម្តង ។ ប្រភពបន្តថា៖ ក្រោយពីធ្វើការឃាត់រួច មន្ត្រីសមត្ថកិច្ចទាំងនោះ បានយករថយន្តខាងលើទៅរក្សាទុកនៅខណ្ទរដ្ឋបាលព្រៃឈើប៉ៃលិនតែម្តង ។
ប្រភពព័ត៌មានពីស្ត្រីដែលត្រូវខណ្ឌរដ្ឋបាលប៉ៃលិនចាប់ឃាត់រថយន្តបានរៀបរាប់ឱ្យដឹងថា គាត់បានទិញបង្គោលពីប្រជាពលរដ្ឋរស់នៅភូមិតាគ្រក់ ខេត្តបាត់ដំបង ដែលមានព្រំប្រទល់ជាប់ខេត្តប៉ៃលិន ដោយបង្គោល១ដើម ទិញថ្លៃ៤.០០០រៀល និងឫស្សី១បាច់ ទិញថ្លៃ៥.៥០០រៀល ដើម្បីយកទៅទល់ដើមតាង៉ែននៅក្នុងចម្ការកុំឱ្យដួលរលំ ។ ប្រភពបន្តទៀតថា តែដោយសារគាត់អត់ដឹងច្បាប់ទម្លាប់អ្វីឱ្យបានត្រឹមត្រូវនោះ ទើបទិញពីគេរួច ក៏ដឹកតាមផ្លូវជាតិលេខ៥៧ ក្នុងទិសដៅពីកើតទៅលិច ក៏ត្រូវខណ្ឌរដ្ឋបាលព្រៃឈើប៉ៃលិនស្ទាក់ចាប់យកទៅរក្សាទុកនៅស្នាក់ការតែម្តង ។
តាមប្រភពពីមន្ត្រីខណ្ឌរដ្ឋបាលព្រៃឈើប៉ៃលិន បានឲ្យអ្នកយកពត៌មានកម្ពុជាថ្មីដឹងថា៖ ការដឹកឈើ ឬបង្គោលរបងពេញរថយន្តបែបនេះ ហើយអត់ឃើញមានធ្វើច្បាប់ត្រឹមត្រូវ លុះមន្ត្រីជំនាញសួរនាំទៅគ្មានលិខិតអនុញ្ញាតក៏ត្រូវឃាត់រថយន្តយកមកសួរនាំ និងធ្វើកំណត់ហេតុឱ្យបានត្រឹមត្រូវតាមផ្លូវច្បាប់នៅស្នាក់ការតែម្តង ៕
