នយោបាយដាក់ទណ្ឌកម្មរបស់សហភាពអឺរ៉ុប ប្រឆាំងនឹងប្រទេសរុស្ស៊ី ជុំវិញ វិបត្តិនៅប្រទេសអ៊ុយក្រែននោះ នឹងត្រូវភ្ជាប់ទៅជាមួយការអនុវត្ត នូវកិច្ចព្រមព្រៀង ទីក្រុង មីងក៍ រហូតដល់ដំណាច់ឆ្នាំ ២០១៥ខាងមុខនេះ។ នេះបើតាមអ្វីដែលមេដឹកនាំអឺរ៉ុបទាំងអស់ បាន សម្រេចរួមគ្នា
ក្នុងកិច្ចប្រជុំកាលពីថ្ងៃព្រហស្បតិ៍ ទី១៩ ខែមីនា។
ទីភ្នាក់ងារព័ត៌មានចិនស៊ិនហួ បានចេញផ្សាយបន្តទៀតថា មេដឹកនាំសហភាពអឺរ៉ុបបានធ្វើ ការបញ្ជាក់អំពីទណ្ឌកម្មដែលនឹងត្រូវដាក់ ដើម្បីអនុវត្តន៍ឲ្យបាននូវ កិច្ចព្រមព្រៀងទីក្រុង មីងក៍ ប្រទេសបេឡារុស ក្រោមកិច្ចខិតខំប្រឹងប្រែងរបស់អធិការបតីអាល្លឺម៉ង់ អេនជេឡា ម៉ាគែល, និង ប្រធានាធិបតីបារាំង ហ្វ្រង់ស័រ ហូឡង់ ដែលមានការចូលរួមពីភាគីពាក់ព័ន្ធ គឺ រុស្ស៊ី និង អ៊ុយក្រែន។
លោកប្រធានក្រុមប្រឹក្សាអឺរ៉ុប ដូណាល់ដ៍ ទូស បានថ្លែងក្នុងកិច្ចប្រជុំថ្ងៃទីមួយនោះថា “អឺរ៉ុប បានព្រមព្រៀងគ្នាហើយ អំពីការដាក់ទណ្ឌកម្មផ្នែកសេដ្ឋកិច្ច ដែលនឹងត្រូវផ្សា ភ្ជាប់ជាមួយនឹង កិច្ចព្រមព្រៀងទីក្រុងមីងក៍ កន្លងមក។ វាគឺជារឿងដែលគ្រប់គ្នាត្រូវចងចាំក្នុងចិត្ត រហូតដល់ ដំណាច់ឆ្នាំ ២០១៥ ខាងមុខ។ ដោយឡែកសេចក្តី សម្រេចផ្សេងទៀត ត្រូវតែឆ្លងកាត់ក្រុម ប្រឹក្សាអឺរ៉ុបជាមុនសិន។”
គួរបញ្ជាក់ថា កាលពីថ្ងៃទី១៧ ខែមីនា ឆ្នាំ ២០១៤ សហភាពអឺរ៉ុបបានប្រកាសទណ្ឌកម្មប្រឆាំង រុស្ស៊ីជាលើកដំបូងដូចជា ការហាមប្រាមការធ្វើដំណើរ, និង បង្កកទ្រព្យសម្បត្តិ ចំពោះមន្ត្រី រុស្ស៊ី និង អ៊ុយក្រែនមួយចំនួន ដែលមានជាប់ពាក់ព័ន្ធនឹងការក្តោបក្តាប់ដោយខុសច្បាប់លើ តំបន់គ្រីមា។ ក្រោយមកទណ្ឌកម្មដទៃទៀត ត្រូវបានធ្វើឡើង ក្រោយពីមានការចោទប្រកាន់ ថារុស្ស៊ីជាអ្នកបង្កការអុកឡុកនៅភាគខាងកើតអ៊ុយក្រែន៕
