ការប្រយុទ្ធគ្នាដ៏កាចសាហាវ បានបន្តនៅស្រុក ឡកកៃ នៃតំបន់កូកាំង ស្ថិតនៅក្នុង រដ្ឋសាន ភាគឦសាន ប្រទេសមីយ៉ាន់ម៉ា។ នេះបើតាមការអះអាង ពីកងកម្លាំងកម្លាំង រដ្ឋាភិបាល ដែលកំពុងតែ វាយដណ្តើមតំបន់យុទ្ធសាស្ត្រ ពីក្រុមជនជាតិភាគតិច នៅតំបន់ខ្ពង់រាប 1479។
ទីភ្នាក់ងារព័ត៌មានចិនស៊ិនហួ ចេញផ្សាយនៅថ្ងៃសុក្រ ទី២០ ខែមីនា ឆ្នាំ២០១៥ នេះ ដោយ ដកស្រង់សម្តីពីអ្នកនាំពាក្យ យោធាទៀតថា ការវាយប្រហារកើតឡើងស្របពេលនៃ កិច្ចពិភាក្សា សន្តិភាពកំពុងរៀបចំឡើងនៅទីក្រុងរ៉ង់ហ្គូន រវាងរដ្ឋាភិបាលមីយ៉ាន់ម៉ា និង ក្រុមប្រដាប់អាវុធ ជនជាតិភាគតិច MNDAA ឈានចូលដល់ថ្ងៃទី៣ ទៅហើយនោះ។
បើតាមការអះអាងពីយោធារដ្ឋ ឲ្យដឹងថា កងកម្លាំងរបស់ខ្លួនម្នាក់បានបាត់បង់ជីវិត និង ៣០ នាក់ទៀតរងរបួស ប៉ុន្តែសម្រាប់ ខាងភាគីជនជាតិភាគតិចវិញ មិនទាន់មានព័ត៌មានណាមួយ បញ្ជាក់ពីការខូចខាតនោះឡើយ។ ការប្រយុទ្ធគ្នា បន្តអូស បន្លាយជាង ២សប្តាហ៍មកហើយ ដោយកងកម្លាំងរដ្ឋាភិបាល ១០១ នាក់បានបាត់បង់ជីវិត និង ២៧៦ របួស។
ដោយឡែកសម្រាប់ខាងក្រុម MNDAA វិញ ក្រោយរដ្ឋាភិបាលវាយលុកចូលតំបន់ខាងលើនេះ គេបានរកឃើញសាកសពចំនួន ១០៤នាក់ និង ចាប់ខ្លួនទាំងរស់បាន ៣០នាក់៕
