សៀមរាប: នៅព្រឹកថ្ងៃអាទិត្យ ទី២២ ខែមីនាឆ្នាំ២០១៥វេលាម៉ោងជិត១០ លោកស្រីទី១អាមេរិក មីស្សែល អូបាម៉ា ( Michelle Obama ) បានបញ្ចប់ដំណើរទស្សនកិច្ចរយៈពេល ៣ ថ្ងៃ នៅកម្ពុជាហើយលោកស្រី បានឡើងយន្តហោះ ចាកចេញពីព្រលានយន្តហោះខេត្តសៀមរាប 
ការជូនដំណើរលោកស្រី មីស្សែល ឡើងយន្តហោះនោះដែរមានវត្តមាន សម្តេចកិត្តិព្រឹទ្ធបណ្ឌិត ប៊ុនរ៉ានី ហ៊ុនសែន រដ្ឋមន្ត្រីក្រសួងអប់រំ អភិបាលខេត្តសៀមរាប ព្រមទាំងឯកអគ្គរដ្ឋទូតអាមេរិក ប្រចាំកម្ពុជា និងមន្ត្រីអ្នកមុខអ្នកការជាច្រើនរូបផង ដែរ។
នៅ ព្រឹកថ្ងៃទី២១មីនា ឆ្នាំ២០១៥លោកស្រីទី១សហរដ្ឋអាមេរិក មីស្សែល អូបាម៉ា បានជំរុញឲ្យសិស្សនារីកម្ពុជា បន្តការសិក្សា និងស្វែងរកសេរីភាពបន្ថែមទៀត។ ការលើកឡើងរបស់ជំទាវទី១អាមេរិកដូច្នេះ បានធ្វើឡើង ក្នុងពេលលោកស្រី ជួបជាមួយសម្តេច កិត្តិព្រឹទ្ធបណ្ឌិត ប៊ុនរ៉ានី ហ៊ុនសែន និងសិស្សនារី នៅវិទ្យាល័យ ហ៊ុនសែន បាគង ក្នុងខេត្តសៀមរាប។
លោកស្រី មីស្សែល អូបាម៉ា បានចំណាយពេលបីថ្ងៃ ដើម្បីទស្សនកិច្ចនៅទីរួមខេត្តសៀមរាប។ លោកស្រី បានមកដល់ទីរួមខេត្តសៀមរាប កាលពីយប់ថ្ងៃទី២០ ខែមីនា ឆ្នាំ២០១៥ បន្ទាប់ពីលោកស្រី ទស្សនកិច្ចនៅប្រទេសជប៉ុន កាលពីថ្ងៃពុធ ទី១៨មីនា។កាលពីព្រឹកថ្ងៃទី២១មីនា លោកស្រី មីស្សែល អូបាម៉ា ក៏បានជួបក្រុមអ្នកស្ម័គ្រចិត្តអាមេរិក Peace Corp នៅខេត្តសៀមរាបផងដែរ។ នៅរសៀលថ្ងៃសៅរ៍ លោកស្រី ក៏បានទៅទស្សនាប្រាសាទអង្គរវត្ត។
មុនពេលមកដល់កម្ពុជា លោកស្រីទី១ របស់អាមេរិក មីស្ហ៊ែល អូបាម៉ា បានទស្សនកិច្ចនៅប្រទេសជប៉ុន ចាប់តាំងពីថ្ងៃពុធ ដោយបានជួបលោកស្រីទី១ របស់ជប៉ុន គឺលោកស្រី អាគី អាបេ ភរិយាលោកនាយករដ្ឋមន្ត្រីជប៉ុន ហ្ស៊ីនហ្ស៊ូ អាបេ។ ដំណើរទស្សនកិច្ចនៅតំបន់អាស៊ី រយៈពេល ៥ ថ្ងៃ គឺនៅជប៉ុន និងកម្ពុជា របស់លោកស្រី មីស្ហ៊ែល អូបាម៉ា បន្ទាប់ពីលោកស្រី និងលោកអូបាម៉ា បើកយុទ្ធនាការមួយ ក្នុងខែមីនានេះ មានឈ្មោះថា “Let Girls Learn”។ ជាយុទ្ធនាការ ដើម្បីជួយក្មេងស្រី ប្រមាណ ៦២ លាននាក់ នៅទូទាំងពិភពលោក ឲ្យបានចូលរៀន តាមរយៈសកម្មភាពរបស់ក្រុមអ្នកស្ម័គ្រចិត្តអាមេរិក Peace Corp៕
