តាកែវ៖បុរសម្នាក់បានរងរបួសធ្ងន់ ហើយបានស្លាប់ពេលបញ្ជូនទៅមន្ទីពេទ្យភ្នំពេញ ដោយសារតែជិះម៉ូតូក្នុងល្បឿនលឿន ហើយបានជ្រុលទៅបុករថយន្តពេញទំហឹង ក្នុងទិសដៅបញ្ច្រាស់គ្នា នៅតាមបណ្ដោយផ្លូវជាតិលេខ៣ ស្ថិតក្នុងភូមិអង្គត្នោតខាងកើត ឃុំអង្គតាសោម
ស្រុកត្រាំកក់ ខេត្តតាកែវ ។
លោក យ៉ង់ វណ្ណធី អធិការស្រុកត្រាំកក់ បានអោយដឹងថា រថយន្តម៉ាកហ៊ីណូ ពណ៌លឿង ពាក់ស្លាកលេខ ភ្នំពេញ 3C-6128 បើកបរដោយជនមិនស្គាល់អត្តសញ្ញាណ ក្រោយពេលកើតហេតុ បានរត់គេចខ្លួនបាត់ បន្សល់ទុករថយន្តនៅកន្លែងកើតហេតុ ចំណែកម៉ូតូម៉ាក ឌូក ពណ៌ខ្មៅលាយស គ្មានស្លាកលេខ បើកបរដោយឈ្មោះ យ៉េន ហ៊ួ ហៅហ៊ូល ភេទប្រុស អាយុ២៧ឆ្នាំ រស់នៅភូមិក្រសាំង ឃុំចំប៉ី ស្រុកអង្គរជ័យ ខេត្តកំពត បានស្លាប់នៅតាមផ្លូវ ពេលបញ្ជូនទៅមន្ទីពេទ្យភ្នំពេញ ។
បើតាមអ្នកឃើញហេតុការណ៍ បាននិយាយប្រាប់ប៉ូលីសថា មុនពេលកើតហេតុ គេឃើញម៉ូតូមួយគ្រឿង បើកបរយ៉ាងលឿន ក្នុងទិសដៅពីលិចទៅកើត លុះមកដល់ចំណុចកើតហេតុ បានវ៉ារថយន្តមួយគ្រឿង ក៍វ៉ាក់ជាមួយរថយន្តមួយគ្រឿងទៀត ក៏ជ្រុលទៅបុករថយន្តហ៊ីណូពេញទំហឹង បណ្ដាលអោយម៉ូតូ និងមនុស្សខ្ទៀត ជាង៤០មែត្រ រងរបួសធ្ងន់ និងបានស្លាប់តាមផ្លូវខណៈពេលដែលបញ្ជូនទៅសង្គ្រោះនៅមន្ទីរពេទ្យភ្នំពេញ ៕
ក្រោយពេលកើតហេតុ សមត្ថកិច្ចចរាចរណ៍ សហការជាមួយជំនាញ បានចុះមកដល់កន្លែងកើតហេតុ និងបានធ្វើការវាស់វែង អូសយករថយន្ត និងម៉ូតូ ទៅរក្សាទុកនៅការិយាល័យ នគរបាលចរាចរណ៍ស្រុកត្រាំកក់ ដើម្បីរង់ចាំដោះស្រាយនៅពេលក្រោយ ៕
