រាជធានីភ្នំពេញ៖បុរសម្នាក់ក្នុងជីវភាពក្រីក្រគ្មានលទ្ធភាពបង់លុយថ្លៃជួលផ្ទះបែកគំនិតឆក់ទូរសព្ទប៉ូលីសឃាត់ខ្លួនបានកាលពីវេលាម៉ោង៩ព្រឹកថ្ងៃទី២៣ខែមីនាឆ្នាំ២០១៥នេះនៅតាមផ្លូវលេខ២៧៣ សង្កាត់ទួលសង្កែ ខណ្ឌប្ញស្សីកែវ បន្ទាប់ពីជនសង្ស័យធ្វើសកម្មភាពឆក់ទូរស័ព្ទដៃ
ពីអ្នករត់រ៉ឺម៉ក ម៉ូតូម្នាក់នៅសង្កាត់បឹងកក់1 ហើយព្យាយាមរត់គេចខ្លួន។
ប្រភពបានអោយដឹងថាជនសង្ស័យឈ្មោះចាប ម៉ៅ ភេទប្រុស អាយុ៤៣ឆ្នាំមន្ត្រីប៉ូលិសការិយាល័យបុគ្គលិកក្រសួងមហាផ្ទៃ ស្នាក់នៅផ្ទះជួលសង្កាត់ទួលសង្កែ ខណ្ឌប្ញស្សីកែវ។ ប្រភពបានអោយដឹងទៀតថា មុនពេលកើតហេតុ ជនសង្ស័យបានធ្វើសកម្មភាពឆក់ទូរស័ព្ទមួយគ្រឿងម៉ាកSamsung ពី អ្នករត់រ៉ឺម៉កម៉ូតូកំពុងឈប់និយាយទូរស័ព្ទលើផ្លូវនៅមុខ ស្ថានីយទី២ សង្កាត់បឹងកក់ទី១ បានសម្រេចហើយរត់ឆ្លងថ្នល់គេចខ្លួនទៅទិសដៅខាងជើង។ 
ខណៈពេលនោះអ្នករ៉ឺម៉កម៉ូតូបានស្រែកផ្អើលឆោឡោធ្វើឱ្យដឹងដល់ប៉ូលិសរៀប ចំសណ្តាប់ធ្នាប់នៅក្បែរនោះ និងប្រជាពលរដ្ឋនាំគ្នាដេញចាប់បានប្រគល់ឱ្យប៉ូលិសប៉ុស្តិ៍បឹង កក់ទី១ចាត់ការតាមនីតិវិធី ចំណែកទូរស័ព្ទត្រូវបានប្រគល់ឱ្យម្ចាស់វិញ។ ជនសង្ស័យបានសារភាពនៅចំពោះសមត្ថកិច្ចថាដោយសារតែ មូលហេតុដែលរូបគេដាច់ចិត្តធ្វើសកម្មភាពឆក់ទូរស័ព្ទដៃអ្នករត់រ៉ឺម៉កម៉ូតូ នេះដោយសារអត់លុយបង់ថ្លៃផ្ទះជួលគេចំនួន៥០ដុល្លារ ហើយប្រាក់ខែអត់ទាន់បើកទៀត៕
