ភ្នំពេញ: សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបានជំរុញឱ្យប្រទេសទាំងពីរ កម្ពុជា-ឡាវ បន្តពង្រឹងថែមទៀត នូវទំនាក់ទំនងកិច្ចសហប្រតិបត្តិការក្នុងនាមជាប្រទេសជិតខាងល្អនោះ។
លោក កៅ គឹមហួន រដ្ឋមន្ត្រីប្រតិភូអមនាយករដ្ឋមន្ត្រីបានប្រាប់ក្រុមអ្នកសារព័ត៌មាន បន្ទាប់ពីជំនួបសម្តែង ការគួរសមជាមួយសម្តេចតេជោ ហ៊ុន សែន ដែលធ្វើឡើងនៅវិមានសន្តិភាពនារសៀលថ្ងៃទី ២៣ ខែ មីនា ឆ្នាំ ២០១៥ ថា៖ នៅក្នុងជំនួបនោះ លោក សមកែវ ស៊ីឡាវង្ស រដ្ឋមន្ត្រីស្តីទី ក្រសួងសន្តិសុខសាធារណរដ្ឋប្រជាធិប តេយ្យប្រជាមានិតឡាវបានជម្រាបជូនសម្តេចតេជោនាយករដ្ឋមន្ត្រីអំពី លទ្ធផលនៃជំនូបរវាងក្រសួងសន្តិសុខឡាវ និង
ក្រសួងមហាផ្ទៃកម្ពុជាដែលភាគីទាំងពីរបានពិភាក្សា គ្នាយ៉ាងស៊ីជម្រៅទាក់ទិននឹងការផ្លាស់ប្តូរបទពិសោធន៍ ពីគ្នាទៅវិញទៅមកពិសេសលើទំនាក់ទំនង និង កិច្ចសហប្រតិបត្តិការនៃស្ថាប័នទាំងពីរសំដៅធ្វើយ៉ាងណារួមគ្នា ដោះស្រាយនូវរាល់បញ្ហាដែលនៅសេសសល់។ លោកក៏បានជម្រាបជូនសម្តេចតេជោអំពីការពិភាក្សាគ្នាយ៉ាង យកចិត្តទុកដាក់ជុំវិញការជំរុញឱ្យមានការផ្លាស់ប្តូរនិស្សិតនៃប្រទេស ទាំងពីរ ដើម្បីធ្វើការសិក្សានៅក្នុងប្រទេស រៀងខ្លួន។
សម្តេច តេជោនាយករដ្ឋមន្ត្រីបានសម្តែងនូវការវាយតម្លៃខ្ពស់ចំពោះលទ្ធផលនៃ កិច្ចប្រជុំរបស់ស្ថាប័នទាំង ពីរកម្ពុជា-ឡាវ ។ ជាមួយគ្នានេះសម្តេចតេជោបានស្នើសុំឱ្យភាគីទាំងពីរបន្តពិភាក្សា និង ធ្វើការជាមួយគ្នាឱ្យ កាន់តែស្អិតល្មួតទ្វេឡើងថែមទៀតក្នុងការពង្រឹងសន្តិសុខសណ្តាប់ធ្នាប់ សាធារណៈសម្រាប់ប្រទេសទាំងពីរ ក៏ដូច ជាសម្រាប់តំបន់ទាំងមូលផងដែរ។ សម្តេចតេជោមានប្រសាសន៍បន្តថាថ្វីត្បិតតែប្រទេសយើងទាំងពីរមានភូមិ ផងរបងជាមួយគ្នាក៏ពិតមែន ប៉ុន្តែរវាងប្រទេសយើងទាំងពីរមិនដែលមានអ្វីកើតឡើងនឹងគ្នាដូច ប្រទេសដទៃទៀត ដែលមានភូមិផងរបងជាមួយនោះទេ។
សម្តេច មានប្រសាសន៍បន្តថាដោយសារតែបញ្ហាសន្តិសុខត្រូវបានគ្រប ដណ្តប់នៅក្នុងបណ្តាប្រទេសក្នុង តំបន់និងពិភពលោកប្រទេសទាំងពីរកម្ពុជាឡាវត្រូវតែសហការគ្នាឱ្យ កាន់តែជិតស្និទ្ធថែមទៀតក្នុងការថែរក្សាសន្តិ សុខ ស្ថិរភាពទប់ស្កាត់នូវអំពើភេរវកម្មផ្សេងៗពិសេសថែរក្សាសន្តិសុខនិង ស្ថិរភាពសម្រាប់ប្រជាពលរដ្ឋ នៃប្រទេស ទាំងពីរធ្វើដំណើរឆ្លងដែន
ទៅមក ប្រកបអាជីវកម្ម ការនាំចេញនាំចូល និង ធ្វើទេសចររបស់ប្រជាជននៃប្រទេស ទាំងពីរ ក៏ដូចជា ភ្ញៀវអន្តរជាតិដែលបានធ្វើដំណើរឆ្លងកាត់ព្រំដែននៃប្រទេសទាំងពីរ ប្រកបដោយ សុវត្ថិភាពបំផុត សំដៅធ្វើយ៉ាងណាឱ្យទំនាក់ទំនងនៃប្រទេសទាំងពីរកម្ពុជាឡាវ កាន់តែជិតស្និទ្ធទ្វេឡើងថែមទៀត៕
