ខេត្តសៀមរាប៖កម្លាំងសមត្ថកិច្ចចំរុះរួមមានៈប៉េអ៊ឹម,និងកំម្លាំងនគរបាល ការិយាល័យព្រហ្មទណ្ឌកំរិតស្រាល,អធិការក្រុងសៀមរាបនិងនគរបាលប៉ុស្តិ ដែលដឹកនាំផ្ទាល់ដោយលោក ជួនសុបញ្ញា ព្រះរាជ្ញអាជ្ញារងអមសាលាដំបូងខេត្តបានឱ្យកម្លាំងជំនាញតាមដានមុខសញ្ញាជនសង្ស័យកាច់សោ.ក.ម៉ូតូបានសម្រេច នៅមុខភូមិគ្រឹះអង្គរប៊ូទិក កាលពីថ្ងៃទី២៣ខែមិនាក្នុងភូមិមណ្ឌល៣ សង្កាត់ស្លក្រាម ។ហើយឃាត់ខ្លួនជនសង្ស័យបាន២នាក់រួមនិងវត្ថុតាងដែលជនសង្ស័យបានធ្វើសកម្មភាព ប្រតិបត្តការនេះបានធ្វើ ឡើងនៅវេលាម៉ោង៩និង៣០នាទីថ្ងៃទី២៣ខែមិនាឆ្នាំ២០១៥ស្ថិតនៅចំនុចមុខទី បញ្ជាការកងរាជអាវុធហត្ថក្រុង ពីខាងកើតរង្វង់មូលអង្គរឃ្យុងយូភូមិព្រៃគុយ សង្កាត់អំពិល ក្រុងសៀមរាប ខណៈជនសង្ស័យកំពុងកាច់ស្លាកលេខគ្រវែងចោល។
លោកអនុសេនីយឯក នួន ស័ក្កចំរើនរិទ្ធ អធិការរងទទួលបន្ទុកព្រហ្មទណ្ឌក្រុងសៀមរាបបានប្រាប់នៅថ្ងៃទី២៤ខែមិនានេះថាបន្ទាប់ពីមានបណ្តឹងរបស់ពលរដ្ឋ កម្លាំងនគរបាលក្រុងបានសហការដ៏ល្អពីកម្លាំងជំនាញមានដូចជាៈប៉េអ៊ឹម,កម្លាំងការិយាល័យព្រហ្មទណ្ឌកំរិតស្រាល,និងនគរបាលប៉ុស្តិតាមដានស្រាវជ្រាវរហូតឈានទៅដល់ធ្វើការឃាត់ខ្លួនជនសង្ស័យបាន២នាក់នៅចំនុចមុខទីបញ្ជាការកងរាជអាវុធហត្ថក្រុង ខណៈពួកគេកំពុងកាច់ដោះស្លាកលេខ
បោះចោល ពេលឃើញកម្លាំងប៉ុស្តិចុះល្បាតក៏នាំគ្នារត់ពួនក្នុងព្រៃ ទុកម៉ូតូចោល ពេលនោះកម្លាំងរបស់យើងក៏ដេញតាមចាប់បានភ្លាមៗរួចបញ្ជូនមកកាន់អធិការក្រុងដើម្បីសួរនាំ។ លោកបន្តថា ជនសង្ស័យទាំង២នាក់មានឈ្មោះ ហែម ម៉ៅ ភេទប្រុសអាយុ២៥ឆ្នាំ រស់នៅភូមិបន្ទាយចាស់ សង្កាត់ស្លក្រាម(ជាអ្នកធ្វើសកម្មភាពលួចម៉ូតូ)ហើយឈ្មោះ ហែម ម៉ៅនេះជាអ្នកប្រប្រាស់គ្រឿងញៀនផងដែរនិងទី២/ឈ្មោះ គង់ ចន្ថា ហៅកាណា ភេទប្រុសអាយុ៣២ឆ្នាំ
ស្នាក់នៅភូមិសាលាកន្សែង សង្កាត់ស្វាយដង្គំ(ជាអ្នកមើលផ្លូវ)ហើយពួកគេទាំង២នាក់បានធ្វើសកម្មភាពយកដែកអក្សរTកាច់សោ.កម៉ូតូម៉ាកហុងដាសេ១២៥ពណ៌ខ្មៅ ស៊េរីឆ្នាំ២០១១ពាក់ស្លាកលេខភ្នំពេញ ១AW.៤២៤៤ របស់ជនរងគ្រោះនៅមុខភូមិគ្រឹះអង្គរប៊ូទិក។
លោកបន្តទៀតថា ជនរងគ្រោះដែលជាម្ចាស់ម៉ូតូមានឈ្មោះ អ៊ិន ចយ ភេទប្រុសអាយុ ២៩ឆ្នាំជាបុគ្គលិកចុងភៅភោជនីយដ្ឋាន ប៊ូទិកអង្គរ រស់នៅភូមិកើតហេតុខាងលើ ដែលជនរងគ្រោះបានទុកម៉ូតូនៅពីមុខកន្លែងធ្វើការ។បច្ចុប្បន្នជនសង្ស័យទាំង២នាក់ត្រូវបានសមត្ថកិច្ចជំនាញកសាងសំណុំរឿងបញ្ជូនទៅតុលាការដើម្បីចាត់ការតាមនិតិវិធីច្បាប់ ចំណែកម៉ូតូសមត្ថកិច្ចប្រគល់ឱ្យម្ចាស់ដើមវិញ៕
ដោយ គឿនវ៉េត
