បន្ទាយមានជ័យៈ មន្ត្រីអាវុធហត្ថខេត្តបន្ទាមានជ័យ ទទួលបានវគ្គហ្វឹកហ្វឺន និងផែនការការពារសន្តិសុខសណ្តាប់ធ្នាប់ ក្នុងឱកាសបុណ្យចូលឆ្នាំខ្មែរខាងមុខ ។ ពិធីនេះធ្វើឡើងកាលពីថ្ងៃទី២៣ មីនា ២០១៥ នៅទីបញ្ជាការដ្ឋាអាវុធហត្ថខេត្តបន្ទាយមានជ័យ ។
លោក ឱ បូរិន្ទ មេបញ្ជាការអាវុធហត្ថខេត្តបន្ទាយមានជ័យ បានអោយដឹងថា ដោយយោងតាមផែនការហ្វឹកហ្វឺនលេខ ៧៥/២០១៥ ផ.ក ចុះថ្ងៃទី២៥ ខែធ្នូ ឆ្នាំ ២០១៤ របស់នាយឧត្តមសេនីយ៍អគ្គមេបញ្ជាការរងកងយោធពលខេមរភូមិន្ទ និងជាមេបញ្ជាការអាវុធហត្ថលើផ្ទៃប្រទេស ទើបអាវុធហត្ថខេត្តបន្ទាយមានជ័យ បង្កើតវគ្គបំប៉ននេះ ។
វគ្គហ្វឹកហ្វឺននេះមានរយៈពេលចាប់ពីថ្ងៃទី ២៣ មីនា ដល់ ថ្ងៃទី ០៦ មេសា ២០១៥ ហើយក្នុងវគ្គបំប៉ននេះមានសិក្ខាកាមចំនួន១១០នាក់ ចាប់ពីថ្នាក់មន្ត្រី ដល់នាយ នាយរងអាវុធហត្ថ ។ ការហ្វឹកហាត់ចែកជា៣មាន ការហ្វឹកហាត់លំហាត់របៀបជួរទ័ព ការរក្សាសណ្តាប់ធ្នាប់ ការសង្គ្រោះបឋម ។
លោកបន្តទៀតថា ការហ្វឹកហាត់គឺជាការចំបាច់បំផុតរបស់កងកំលាំង ហើយដើម្បីអោយយល់ដឹង សិក្ខាកាមទាំងអស់ត្រូវយកចិត្តទុកដាក់ពីក្បួនច្បាប់ និងអនុវត្តអោយបានត្រឹមត្រូវ ។ ព្រោះមេរៀនទាំងនេះមិនត្រឹមតែសង្គ្រោះប្រជាពលរដ្ឋប៉ុណ្ណោះទេ យើងអាចជួយដល់ក្រុមគ្រួសារ និងខ្លួនឯងផងដែរ ។ ក្រៅពីការណែនាំដល់សិក្ខាកាមលោក ក៏បានដាក់បទបញ្ជាដល់មេ មេបញ្ជាការអាវុធហត្ថគ្រប់ស្រុក ក្រុង ស្នាក់ការ ត្រូវធ្វើផែនការការពារពិធីបុណ្យចូលឆ្នាំ ប្រពៃណីជាតិនាពេលខាងមុខ ៕
