នាយប៉ុស្តិននគរបាលរដ្ឋបាលឃុំស្វាយរលំ រងការចោទប្រកាន់ថា មិនអើពើក្នុងការបង្ក្រាបបទល្មើស និងបណ្តោយឱ្យជនដៃដល់រត់គេចខ្លួនទៀត ទោះជាជនសង្ស័យបានប្រើដែកឆាបចាក់ ទៅលើជនរងគ្រោះឲ្យរងរបួសធ្ងន់យ៉ាងណាក៏ដោយ។
អ្នកស្រីហេង សាវិន អាយុ៥២ឆ្នាំ មានទីលំនៅភូមិលេខ៥ ឃុំស្វាយរលំ ស្រុកស្អាង ខេត្តកណ្តាល បានមានប្រសាសន៍ប្រាប់អ្នកសារព័ត៌មានថា អ្នកស្រីមានការខកចិត្តចំពោះលោកអ៊ូច សុខ មេប៉ុស្តិនគរបាលស្វាយរលំជាខ្លាំង ខណៈដែលកូនរបស់ត្រូគាត់ត្រូវគេចាក់ ហើយបានទៅប្តឹងសុំការអន្តរាគមន៍ លោកនាយប៉ុស្តិ និយាយថា យប់ហើយចាំព្រឹកឡើងចាំចាត់ការ ហើយព្រឹកឡើងបានកោះហៅក្រុម ជនសង្ស័យចំនួន៣នាក់មកហើយ តែមិនឃុំខ្លួនហើយថែមទាំងដោះលែង ទុកឱកាសឱ្យជនដៃដល់រត់គេចខ្លួនអស់។
អ្នកស្រីបានបន្តថា កាលពីវេលាម៉ោង១៨និង៣០នាទី ព្រលប់ថ្ងៃទី២១ មិនា ២០១៥ កន្លងទៅ កូនប្រុសរបស់គាត់ឈ្មោះព្រី ស៊ីវិន អាយុ២២ឆ្នាំ និងមិត្តភ័ក្ត្រ២នាក់ទៀត បានជិះម៉ូតូទៅមើលល្ខោនក្នុងវត្តពោធិព្រឹក្ស។លុះទៅដល់ក្លោងទ្វារ ក៏ត្រូវជនដៃដល់មានគ្នា៦នាក់ ជិះម៉ូតូ៣គ្រឿង ប្រដាប់ដោយដំបង កាំបិត និងដែកឆាប ស្ទាក់វាយ កាប់ ចាក់ មកលើក្រុមកូនរបស់គាត់ ហើយបានចាក់ត្រូវកូន គាត់មួយដែកឆាបរងរបួសជាទម្ងន់ រួចក៏បានរត់គេចខ្លួនអស់ទៅ។ បន្ទាប់ពីកើយហេតុក៏បញ្ជូនកូនទៅមន្ទីរពេទ្យជ័យជំនះដើម្បីធ្វើការសង្គ្រោះ ហើយក៏បានប្តឹងនគរបាលប៉ុស្តិភ្លាមៗដែរ ប៉ុន្តែ ត្រូវបានលោកមេប៉ុស្តិ និយាយថា យប់ហើយមិនធ្វើការឱ្យទេ ចាំព្រឹកទៅ។ លុះព្រឹកឡើងគាត់ក៏បានមកដាក់ពាក្យបណ្តឹងម្តងទៀត ហើយនគរបាលក៏បានធ្វើការឃាត់ខ្លួនជនបង្កបីនាក់ក្នុងចំណោម៦នាក់ និងបានចាប់ទាំងជនដៃដល់ថែ
មទៀតផង រួមមានទីមួយឈ្មោះអាផៃ អាយុ១៨ឆ្នាំ រស់នៅភូមិលេខ៤ ( ជនដៃដល់ ) ទី២ឈ្មោះវណ្ណី ហៅលៀប អាយុ២០ឆ្នាំ មានទីលំនៅភូមិលេខ៤ និងទី៣ឈ្មោះអាបុល អាយុ២១ឆ្នាំ រស់នៅភូមិព្រែកតាព្រីង ឃុំសិត្បូរ៍។តែក្រោយពីសាកសួររួច លោកមេប៉ុស្តិ ក៏បានដោះលែងជនទាំង៣ឱ្យមានសេរីភាពអស់ទៅ ដោយមិនដឹងមូលហេតុ។ ចំណែកកូនប្រុសរបស់ខ្ញុំដោយសាររបួសធ្ងន់ពេក មួយថ្ងៃក្រោយមកត្រូវគ្រូពេទ្យបញ្ជូនទៅមន្ទីរពេទ្យ មិត្តភាពខ្មែរ សូវៀត ហើយឥឡូវនេះស្ថានភាពកាន់ធ្ងន់ធ្ងរទៅៗ មិនដឹងជាយ៉ាងណានោះទេ។
ចំណែកឯលោកអ៊ូច សុខ បានឆ្លើយយ៉ាងខ្លីតាមទូរស័ព្ទថា លោកមិនបានប្រព្រឹត្តិដូចការចោទប្រកាន់ទេ ហើយណាមួយបទល្មើសនោះ មិនជាក់ស្តែង ហើយក៏ហៅជនសង្ស័យមកគ្រាន់តែសាក សួរបឋម ប៉ុណ្ណោះ ហើយក៏បានបញ្ជូនសំណុំរឿងទៅអធិការដ្ឋាននគរបាលស្រុកស្អាង អស់ហើយដែរ។
គួរបញ្ជាក់ដែរថា លោកនាយប៉ុស្តិខាងលើ ត្រូវបានប្រជាពលរដ្ឋក្នុងមូលដ្ឋាននិយាយថា សំបូររឿងអាស្រូវមិនតិចទេ ហើយនៅពេលកើតមានរឿងរ៉ាងម្តងៗគេតែងតែគេចវេះយកឡេះមិនអស់មិនហើយគ្មានការទទួលខុសត្រូវណាមួយ ហើយដោយស៊ូរទ្រាំទង្វើរបែបនេះមិនបានប្រជាពលរដ្ឋ ធ្លាប់ទាំងបាននាំគ្នាផ្តិតស្នាមមេដៃ ធ្វើយកញ្ញាត្តិទៅស្នងការខេត្តកណ្តាលដើម្បីដកទំលាក់លោក អ៊ូច សុខមេស្តិ៍នគបាលស្វាយរលំថែមទៀតផង ៕
