ខេត្តត្បូងឃ្មុំ៖ ក្រុមចោរប្រដាប់ដោយកាំភ្លើងK59១ដើមនិងមានគ្នា ២ នាក់ បានធ្វើសកម្មភាព ចូលបាញ់ប្លន់យក ទ្រព្យសម្បត្តិ របស់ប្រជាពលរដ្ឋ ដោយបានបាញ់គំរាម បណ្តាលឲ្យជនរងគ្រោះជាកូនប្រសារម្ចាស់ផ្ទះរងរបួសភ្លៅ១គ្រាប់ ហើយក្រោយពីរើកកាយមិនមាន
ទ្រព្យសម្បត្តិ ក៏ឆក់យកខ្សែកផ្លាកទីនរបស់កូនស្រីម្ចាស់ផ្ទះដែលមានតំលៃ៤០មឺុនរៀល ហើយ រត់គេចខ្លួនបាត់យ៉ាងរហ័ស។ ហេតុការណ៍នេះបានកើតឡើង កាលពី វេលាម៉ោង៧និង៣០នាទីយប់ថ្ងៃ ទី២៥ ខែមីនា ឆ្នាំ២០១៥ នៅភូមិនិគមក្រោម ឃុំស្រឡប់ ស្រុកត្បូងឃ្មុំ ខេត្តត្បូងឃ្មុំ។ប្រភពពីសមត្ថកិច្ចបានប្រាប់ឲ្យដឹងថា ផ្ទះដែលរងដោយអំពើប្លន់ឈ្មោះ តុល តុងភេទប្រុស អាយុ៥៣ឆ្នាំ ស្របពេលដែលសមាជិកក្រុមគ្រួសារកំពុងតែនៅជុំគ្នា មិនទាន់នឹងបិទទ្វារផងនោះក៏ស្រាប់តែមានក្រុមចោរប្រដាប់អាវុធ២នាក់បានដើរសំដៅ ចូលមកដល់ក្នុងផ្ទះ រួចដកកាំភ្លើងខ្លី K59 ភ្ជង់គំរាមបាញ់សម្លាប់ ប្រសិនបើអ្នកណាតដៃនោះ ។ប្រភពដដែលបន្តថា
គ្រានោះដោយសារកូនប្រសារប្រុសម្ចាស់ផ្ទះ មិនបានស្តាប់បង្គាប់ចោរទើបចោរបាញ់ចំនួន២គ្រាប់ចំភ្លៅ១គ្រាប់ រួចក្រុមចោរបានធ្វើសកម្មភាព រើកកាយរកទ្រព្យសម្បត្តិមិនឃើញមានហើយក៏ឆក់ផ្តាច់ខ្សែកផ្លាកទីពីកូនស្រីម្ចាស់ផ្ទះ១ខ្សែដែលមានតំលៃ៤០មឺុនរៀល រួចគេចខ្លួនបាត់តែម្តងយ៉ាងរហ័ស ។តាមប្រភពព័ត៌មានបានឲ្យដឹងបន្តថា វេលាម៉ោង ១៩:៣០ នាទី យប់ថ្ងៃទី២៥ ខែមីនា ឆ្នាំ២០១៥ មានជនល្មើស២ នាក់ស្លៀកពាក់ស៊ីវីល ពាក់អាវសៗប្រផេះ មាឌស្តើង កំពស់ប្រហែល ១,៦៥ ម៉ែត្រ អាយុប្រហែល 30 ឆ្នាំជាតិខ្មែរ មធ្យោបាយថ្មើរជើង ប្រដាប់ដោយកាំភ្លើងខ្លី K59 ប្រើគ្រាប់លុក កែច្នៃ ធ្វើសកម្មភាពចូល ប្លន់ទ្រព្យសម្បត្តិ នៅផ្ទះប្រជាពលរដ្ឋឈ្មោះ តុល តុង ភេទប្រុស អាយុ ៥៣ឆ្នាំ នៅភូមិឃុំ ខាងលើ ។
ប្រភពដដែលបានបន្តថា ក្នុងពេលធ្វើសកម្មភាព ជនល្មើសបានបាញ់ ចំនួន២គ្រាប់ បណ្តាលឲ្យជនរងគ្រោះ ឈ្មោះ អ៊ឹម ភាព ភេទប្រុស អាយុ ៣១ ឆ្នាំ ជាកូនប្រសារម្ចាស់ផ្ទះ បណ្តាលឲ្យ រងរបួសភ្លៅខាងឆ្វេង ហើយត្រូវ ក្រុមគ្រួសារ យកទៅព្យាបាល នៅមន្ទីរពេទ្យ សម្តេចម៉ែ (ក្រុងសួង) ។បច្ចុប្បន្ន កម្លាំងសមត្ថកិច្ចជំនាញកំពុង ធ្វើសកម្មភាព ត្រួតពិនិត្យ កន្លែងកើតហេតុ និងពង្រាយកម្លាំងជាច្រើន តាមគោលដៅ សំខាន់ៗ ស្វែងរកជនល្មើសដើម្បីចាប់ខ្លួនយកមកផ្តន្ទាទោសតាមច្បាប់៕
