បុរសម្នាក់បានត្រូវសមត្ថកិច្ចឃាត់ខ្លួនបញ្ជូនទៅកាន់សាលាដំបូងខេត្តពោធិ៍ សាត់ពីបទប្រើប្រាស់និងលាក់ទុកអាវុធខុសច្បាប់បន្ទាប់ពីបុរសរូបនេះឈ្លោះគ្នាជាមួយអ្នកជិតខាងហើយបានប្រើពាក្យសំដីគំរាមគំហែងបំរុងបាញ់សម្លាប់ចោល ខណះនោះភាគីម្ខាងទៀតបានទៅប្ដឹង
ប៉ូលីសឲ្យជួយអន្តរាគមន៍លុះពេលប៉ូលីសចូលឆែកឆេរក្នុងផ្ទះឃើញលាក់ទុកអាវុធខុសច្បាប់ក៍ធ្វើការឃាត់ខ្លួនតែម្ដង។ លោកវរះសេនីយ៍ត្រីធាង លេងអធិការនគរបាលស្រុកវាលវែងឲ្យដឹងថាជនសង្ស័យឈ្មោះសៅ យ៉ុមភេទប្រុសអាយុ៥៣ឆ្នាំរស់នៅចំណុចស្រែអង្គ្រងស្ថិតក្នុងភូមិស្ទឹងថ្មីឃុំប្រមោយស្រុកវាលវែង។ឃាត់ខ្លួនតាមពាក្យបណ្ដឹងរបស់ប្រជាពលរដ្ឋឈ្មោះសុនដែលបានចោទប្រកាន់ថាឈ្មោះយ៉ុមខាងលើនេះកាលពីថ្ងៃទី២២ខែមីនាឆ្នាំ២០១៥បានប្រើពាក្យគំរាមបំរុងបាញ់គាត់សម្លាប់ចោល។លុះនៅថ្ងៃទី២៤ខែមីនាសមត្ថកិច្ចយើងក៍ចុះទៅឆែកឆេរក្នុងផ្ទះរបស់ឈ្មោះសៅ យ៉ុមស្រាប់តែរកឃើញវត្ថុតាងរួមមានអាវុធអាកាស្វាយបត់មួយដើមផលិតនៅប្រទេសចិនមានគ្រាប់ចំនួន១២គ្រាប់គុណភាព៥០%,ខ្សែរអន្ទាក់និងប្រដាប់ឆក់សត្វព្រៃមួយចំនួនទៀតក៍ធ្វើការឃាត់ខ្លួនតែម្ដងពីបទប្រើប្រាស់និងលាក់ទុកអាវុធខុសច្បាប់។
នៅចំពោះមុខសមត្ថកិច្ចជនសង្ស័យសៅ យ៉ុមបានសារភាពថាអាវុធអាកាស្វាយបត់នេះខ្លួនរើសបានក្នុងព្រៃកាលពីខែមិថុនាឆ្នាំ២០១៤មានគ្រាប់២០គ្រាប់ខណះពេលដើរដាក់អន្ទាក់សត្វព្រៃនៅចំណុចអូរក្រពើភូមិស្ទឹងថ្មីដែលគេដាក់ចោលនៅលើធាងសំឡាញ។ពេលនោះខ្លួនបានយកទៅលាក់ទុកនៅផ្ទះចំការចំណុចដាតាម៉ឹងព្រមទាំងបានយកទៅបាញ់សត្វប្រើសមួយក្បាលដែលជាប់អន្ទាក់មកលក់ឲ្យអ្នកភូមិទួលគ្រួសទៀតផង។មកដល់ថ្ងៃទី២៤ខែមីនាឆ្នាំ២០១៥នេះលោកឈ្លោះគ្នាជាមួយតាសុនដែលនៅជាប់ព្រំប្រទល់ដីគ្នា។ដោយខឹងខ្លាំងពេកខ្លួនបានប្រើពាក្យសម្តីសំឡុតបាញ់តាសុនសម្លាប់ចោលប៉ុន្តែមិនបានយកកាំភ្លើងកាន់នឹងដៃទេ។លុះមកដល់ថ្ងៃទី២៤ខែមីនាស្រាប់តែសមត្ថកិច្ចចូលទៅឆែកឆេរក្នុងផ្ទះរកឃើញអាវុធក៍ហៅខ្លួនលោកមកសួរនាំនិងឃាត់ខ្លួនតែម្ដង។
លោកវរះសេនីយ៍ទោម៉ូ លីដាប្រធានការិយាល័យព្រហ្មទណ្ឌកំរិតស្រាលនៃស្នងការដ្ឋាននគរបាលខេត្តពោធិ៍សាត់ឲ្យដឹងថាបន្ទាប់ពីសួរនាំជនសង្ស័យរួចយើងបានបង្កសំណុំរឿងបញ្ជូនទៅសាលាដំបូងនាព្រឹកថ្ងៃទី២៥នេះដើម្បីចាត់ការទៅតាមនិតិវិធី៕
