ខេត្តកំពង់ចាម៖ លោកសង្ឃ២អង្គ និងយុវជន៤នាក់ ដែលបាននាំគ្នា ចូលច្រៀងខារ៉ាអូខេមួយកន្លែងយីហោ «ធីតា» ស្ថិតនៅភូមិ ឃុំសូទិព្វ ស្រុកជើងព្រៃ ខេត្តកំពង់ចាម ត្រូវបានសម្មត្ថកិច្ចនគរបាលស្រុកជើងព្រៃឃាត់ខ្លួន ចាត់ការតាមច្បាប់ធម្មវិន័យកាលពីវេលាម៉ោង១និង០០នាទីយប់ថ្ងៃទី២៦ ខែមីនា ឆ្នាំ២០១៥ ។លោក ប្រាក់ សុគន្ធ អធិការស្រុកជើងព្រៃបានឲដឹងថា លោកសង្ឃ២អង្គ ដែលត្រូវបានសមត្ថកិច្ច ឃាត់ព្រះកាយនេះមានព្រះនាម ឡាច ហ៊ាន ព្រះជន្ម៤២ឆ្នាំ គង់នៅវត្តរស្មីសង្កែ (ស្រុងព្រៃឈ) និង ១អង្គទៀត ព្រះនាម ហែម បញ្ញា ព្រះជន២៤ឆ្នាំ គង់នៅវត្តព្រែកតាកុយ ។លោកបន្តថា ការឃាត់ខ្លួននេះបានធ្វើឡើងបន្ទាប់ពីមាន សេចក្តីរាយការណ៍ពីប្រជាពលរដ្ឋ នៅពេលដែលពួកគេឃើញ មានព្រះសង្ឃ ចូលច្រៀងខារ៉ាអូខេ លាយឡំជាមួយឧបាសក ហើយនៅក្នុងចំណោមមនុស្សដែលត្រូវសមត្ថកិច្ចឃាត់ខ្លួននេះ ក៏មានទាំងអតីតសង្ឃមួយអង្គ ដែលទើបនិងសឹក (លាចាកសិក្ខាបទ)ថ្មីៗនេះដែរ។លោកបានបញ្ជាក់ថាករណីនេះបុគ្គលសង្ឃដែលប្រាស់ចាកធម្មវិន័យនិងត្រូវប្រគល់ជូនទៅខាងមន្ត្រីសង្ឃចាត់ការតាមធម្មវិន័យនៃព្រះពុទ្ធសាសនា៕
ព្យាយាមជិះម៉ូតូវ៉ារថយន្តមួយគ្រឿងនៅពីមុខតែមិនផុត ទៅបុករថយន្តកុងតឺន័រពេញទំហឹង កិនស្លាប់ភ្លាមៗនៅនិងកន្លែងភ្នំពេញ៖ បុរសម្នាក់បានស្លាប់យ៉ាងអណោចអធមនៅនិងកន្លែងកើតហេតុបន្ទាប់ពីរូបគេនោះបានជិះម៉ូតូហុងដា ឌ្រីមសេ១២៥មួយគ្រឿងតាមបណ្តោយផ្លូវជាតិលេខ៣ទើបតែត្រឡប់មកពីធ្វើការវិញលុះមកដល់ចំណុចកើតហេតុបានព្យាយាមបើកវ៉ារថយន្តមួយគ្រឿងនៅពីមុខក៏ជ្រុលទៅបុកនិងរថយន្តកុងតឺន័រចំពីមុខពេញទំហឹងកិនស្លាប់ភ្លាមៗតែម្តង។ ហេតុការណ៏នេះកើតឡើងកាលពីវេលាម៉ោង៨និង៤០នាទីយប់ ថ្ងៃទី២៦ ខែមីនា ឆ្នាំ២០១៥ នៅតាម បណ្តោយផ្លូវជាតិលេខ៣ស្ថិតក្នុងភូមិទឹកថ្លាក្នុងសង្កាត់ក្រាំងពង្រខណ្ឌដង្កោ។សពត្រូវបានគេស្គាល់ឈ្មោះ ទ្រី សេងលី អាយុ២៧ឆ្នាំ មានមុខរបរជាកម្មកររោងចក្រ ស្នាក់នៅក្នុងភូមិស្លែង ឃុំថ្មី ស្រុកកណ្តាលស្ទឹង ខេត្តកណ្តាល។
ប្រភពពត៌មានពីកន្លែងកើតហេតុបានឲ្យដឹងថានៅមុនពេលកើតហេតុគេបានឃើញបុរសម្នាក់ជិះម៉ូតូមួយគ្រឿងម៉ាកហុងដាឌ្រីមសេ១២៥ពណ៌ខ្មៅពាក់ស្លាកលេខភ្នំពេញ 1CP-8257 ជិះតាមបណ្តោយផ្លូវជាតិលេខ៣ ក្នុងទិសដៅ ពីត្បូងទៅជើងក្នុងល្បឿនលឿនលុះមកដល់ចំណុចកើតហេតុដោយសភាពផ្លូវមានស្ថានភាពងងឹតគ្មានភ្លើងបំភ្លឺផ្លូវ បានព្យាយាមបើកវ៉ារថយន្តមួយគ្រឿងនៅពីមុខខណៈនោះក៏មានរថយន្តកុងតឺន័រមួយគ្រឿងរបស់ក្រុមហ៊ុនផែស្ងួត តេងឡាយក្បាលពណ៌បៃតងពាក់ស្លាកលេខភ្នំពេញ3B-3806 បើកដោយបុរសម្នាក់តាមបណ្តោយផ្លូវជាតិលេខ៣ ក្នុងទិសដៅពីជើងទៅត្បូងក្នុងល្បឿនលឿនដូចគ្នាវ៉ាកគេចមិនផុតទៅបុកចំពីមុខរថយន្តពេញទំហឹងបណ្តាលឲ្យ បុរសនោះប៉ើងអូសជាង១០មែត្របាក់ភ្លៅខាងឆ្វេងកំពិតលលាដ៍ស្លាប់ភ្លាមៗនៅនិងកន្លែងកើតហេតុតែម្តងចំណែកតៃកុងរថយន្តបានបើកទ្វារថយន្តលោតចុះពីលើរថយន្តរត់គេចខ្លួនបាត់ស្រមោល។
ក្រោយពេលកើតហេតុសមត្ថកិច្ចមូលដ្ឋានបានមកធ្វើចរាចរកុំអោយមានការកកស្ទះចរាចរពីព្រោះតែផ្លូវជាតិលេខ៣នេះមានសភាពងងឹតណាស់ព្រមទាំងធ្វើការវាស់វែងរថយន្តនិងម៉ូតូយកទៅរក្សាទុកនៅការិយាល័យចរាចរផ្លូវគោកនៃស្នងការដ្ឋាននគរបាលរាជធានីភ្នំពេញដើម្បីដោះស្រាយគ្នាទៅតាមផ្លូវច្បាប់។ចំណែកឯសពត្រូវបានសមត្ថកិច្ចប្រគល់ទៅអោយបងប្អូនសពដើម្បីយកទៅធ្វើបុណ្យទៅតាមប្រពៃណីយ៍ខ្មែរ៕
