បន្ទាយមានជ័យៈ ពលករខ្មែរដែលឆ្លងដែនទៅធ្វើការនៅប្រទេសថៃហើយស្លាប់ដោយមូលហេតុផ្សេង ៗ ចំនួន២៩នាក់ត្រូវបានបញ្ជូនត្រលប់មកកម្ពុជាវិញនេះបើគិតត្រឹមថ្ងៃទី២៦ មីនា នៃ៣ខែដើមឆ្នាំ២០១៥ ដែលចំនួននោះបើធៀបទៅនិងឆ្នាំ២០១៤ មានចំនួន១៤៨នាក់ ។
យោងតាមរបាយការណ៍របស់ប៉ូលីសខេត្តបន្ទាយមានជ័យបានអោយដឹងថា ពលករខ្មែរដែលតែងតែធ្វើការនៅប្រទេសថៃ ភាគច្រើនទាំងស្របច្បាប់ និងមិនស្របច្បាប់ បានចេញតាមច្រកអន្តរជាតិប៉ោយប៉ែត និងច្រករបៀងនានាតាមព្រំដែននៃខេត្តបន្ទាយមានជ័យ ហើយក្នុងនោះការចាប់បញ្ជូនរបស់សមត្ថកិច្ចថៃ ក៏តែងបញ្ជូនមកវិញតាមច្រកមួយនេះដែរ ជាក់ស្តែង២ថ្ងៃជាប់គ្នានៅថ្ងៃទី២៥-២៦ មីនា នេះ មានសព្វពលករខ្មែរចំនូន២នាក់ ដែលម្នាក់មានឈ្មោះ នី លី ភេទប្រុស អាយុ២៥ឆ្នាំ ទីលំនៅភូមិទំនុបក៥ សង្កាត់ក្រុងប៉ោយប៉ែ បានចូលទឹកដីថៃធ្វើជាកម្មករសំណង់ នៅទីក្រុងបាងកក់ បានចងករសម្លាប់ខ្លួន ។ ចំណែកសព្វម្នាក់ទៀតមានឈ្មោះ អំ ផេក ភេទប្រុស អាយុ៤២ឆ្នាំ មានទីលំនៅភូមិសន្ទូងលាប ឃុំព្រៃខ្មេះ ស្រុងមេសាង ខេត្តព្រៃវែង ជាកម្មករថែសួនក្នុងខេត្តក្រាធី បានស្លាប់ក្នុងបន្ទប់ទឹក ។ សព្វទាំង២ត្រូវបានបងប្អូនមកទទួលយកទៅធ្វើបុណ្យតាមប្រពៃណី ។
ដោយឡែកបើតាមនគរបាលខេត្តបន្ទាយមានជ័យទទួលបាន ចំនួនពលករខ្មែរដែលស្លាប់ក្នុងទឹកដីថៃ ហើយត្រូវបានបញ្ជូនមកតាមច្រកទ្វារអន្តរជាតិ ក្នុង៣ខែដើមឆ្នាំ២០១៥នេះមានចំនួនដល់ទៅ២៩នាក់ហើយ ដោយភាគច្រើនអ្នកដែលស្លាប់ ដោយសារ ខ្យល់គរ គាំងបេះដូង ឆក់ខ្សែរភ្លើង គ្រោះថ្នាក់ចរាចរ ៕
