ដោយមានអាត្រាមនុស្សស្លាប់ ក្នុងករណីគ្រោះថ្នាក់ចរាចរណ៍ មានការកើនឡើងគួរអោយព្រួយបារម្ភ និងដើម្បីបញ្ជៀបច្បាប់ចរាចរណ៍ផ្លូវគោកថ្មី ក៍ដូចជារួមគ្នាកាត់បន្ថយនូវគ្រោះថ្នាក់ចរាចរណ៍ នាយការិយាល័យកណ្តាល សណ្តាប់ធ្នាប់ នៃស្នងការដ្ឋាននគរបាល ខេត្តកំពង់ឆ្នាំង
បានចុះមកធ្វើការផ្សព្វផ្សាយ ច្បាប់ចរាចរណ៍ផ្លូវគោកថ្មី ដល់សិស្សវិទ្យាល័យ ព្រះបាទសុរាម្រឹត ចំនួន៧៧០នាក់ ដែលបានធ្វើឡើង ក្រោមអធិបតីភាព លោក ឡុច វណ្ណារ៉ា ស្នងការរងនគរបាលខេត្ត នៅក្នុងវិទ្យាល័យ ព្រះបាទសុរាម្រឹត ក្រុងកំពង់ឆ្នាំង។
លោក ឡុច វណ្ណារ៉ា ស្នងការរង និងជាប្រធានការិយាល័យ កណ្តាលសណ្តាប់ធ្នាប់ នៃស្នងការដ្ឋាននគរបាលខេត្តកំពង់ឆ្នាំង បានថ្លែងទៅកាន់យុវសិស្សទាំងអស់ថា នៅក្នុងខេត្តកំពង់ឆ្នាំង ឆ្នាំ២០១៤ ករណីគ្រោះថ្នាក់ចរាចរណ៍ បានកើតឡើងចំនួន២៣០លើក កើនឡើងជាងឆ្នាំ២០១៣ ៥២លើក ស្មើនឹង២៩% និងគ្រោះថ្នាក់ផ្លូវទឹក៦លើក បណ្តាលអោយស្លាប់មនុស្សចំនួន១១០នាក់ របួស៤៦២នាក់ ខូចរថយន្ត១០១គ្រឿង ម៉ូតូ២៤៧គ្រឿង កង់៦គ្រឿង យានយន្តផ្សេងៗ១០គ្រឿង និងកាណូត១១គ្រឿង ។ មូលហេតុនៃគ្រោះថ្នាក់ចរាចរណ៍ គឺបណ្តាលមកពីបើកបរហួសល្បឿនកំណត់ បើកជែងក្នុងស្ថានភាពស្រវឹង និងបើកបរក្នុងស្ថានភាពគ្រោះថ្នាក់ ។ ចំណែកក្នុងត្រីមាសទី១ ដើមឆ្នាំ២០១៥នេះ ករណីគ្រោះថ្នាក់ចរាចរណ៍ កើតឡើងចំនួន៤២លើក ថយជាងឆ្នាំ២០១៤ ចំនួន២០លើក បណ្តាលអោយមនុស្សស្លាប់ ចំនួន២៤នាក់ របួស៦៣នាក់ ខូចរថយន្ត១៧គ្រឿង ម៉ូតូ៤៣គ្រឿង ។
លោកបានបន្តថា ពាក់ព័ន្ធនឹងតួលេខខាងលើនេះ សូមអោយប្អូនៗ ជាអ្នកប្រើប្រាស់ផ្លូវ អនុវត្តអោយបាននូវច្បាប់ចរាចរណ៍ផ្លូវគោក ចេះយោគយល់អធ្យាស្រ័យគ្នា គោរពផ្លាកសញ្ញាចរាចរណ៍ កុំបើកជែងក្នុងស្ថានភាពគ្រោះថ្នាក់ ពាក់មួកសុវត្ថិភាព ក្នុងពេលបើកបរ មានសុជីវធម៌ ក្នុងពេលបើកបរ ប្រកបដោយសុវត្ថិភាព និង គ្រប់ម៉ូតូទាំងអស់ សូមអោយមានកញ្ចក់មើលក្រោយ ។
ការផ្សព្វផ្សាយច្បាប់ចរាចរណ៍ផ្លូវគោក ក្នុងពេលនេះ ធ្វើឡើងក្នុងគោលបំណង បញ្ជៀប និងជុំរុញលើកទឹកចិត្តដល់សិស្សានុសិស្ស និងអ្នកពាក់ព័ន្ធ ដែលមានតួនាទីយ៉ាងសំខាន់ មិនអាចខ្វះបាន ក្នុងការផ្សព្វផ្សាយបន្ត ដល់ក្រុមគ្រួសារ អំពីច្បាប់ចរាចរណ៍ផ្លូវគោកថ្មី ប្រកបដោយគុណភាព និងស៊ីជំរៅ មានការអប់រំ អំពីការគោរពច្បាប់ ផលប៉ះពាល់ដល់សេដ្ឋកិច្ចសង្គមជាតិ និងគ្រួសារដែលជាបន្ទុកធ្ងន់ធ្ងរ ដល់សេវាសុខាភិបាល ចំពោះជនរងគ្រោះ ព្រោះគ្រោះថ្នាក់ចរាចរណ៍ បានធ្វើអោយខាតបង់សេដ្ឋកិច្ចជាតិ ជាច្រើនរយលានដុល្លាក្នុង១ឆ្នាំៗ ដែលមានទំហំធំធេងហួសពីការស្មាន ក្នុងពេលដែលរដ្ឋាភិបាល និងប្រជាពលរដ្ឋយើង កំពុងតែតស៊ូ ដើម្បីកាត់បន្ថយភាពក្រីក្រ ។
ម្យ៉ាងវិញទៀត ការផ្សព្វផ្សាយនេះ ក្នុងគោលបំណងកែប្រែឥរិយាបទ អាក្បកិរិយា អ្នកប្រើប្រាស់ផ្លូវ អោយប្រកាន់យកនូវការគោរពច្បាប់ និង ទទួលខុសត្រូវ ក្នុងពេលមានគ្រោះថ្នាក់កើតឡើង ។ ដោយការបើកបរ ត្រូវមានការអធ្យាស្រ័យយោគយល់គ្នា នោះទើបអាចកាត់បន្ថយបាន គ្រោះថ្នាក់ចរាចរណ៍ ជាពិសេសត្រូវតែពាក់មួកសុវត្តិភាព ទើបកាត់បន្ថយគ្រោះថ្នាក់ ស្លាប់និងរបួសទាំងអស់ខាងលើនេះបាន ៕
