ក្រុមចម្រុះច្រើនប្រទេសដឹកនាំដោយអារ៉ាប៊ិសាអ៊ូឌីត ធ្វើប្រតិបត្តិការយោធានៅយេម៉ែនប្រឆាំងពួកហ៊ូធីដែលវាយរុលមកក្រុងអាដេនពួកឧទ្ទាមស៊ីអីុតយេម៉ែន ហ៊ូធី កាលពីថ្ងៃទី២៨ មីនា វាយដណ្តើមយកបានព្រលានយន្តហោះអន្តរជាតិក្រុងអាដេន ក្រោយពីពួកជីវពលកុលសម្ព័ន្ធ 
បាក់ទ័ពដកថយចេញពីទីនោះ រួចបានវាយប្រហារលើវិមានប្រធានាធិបតី ខណៈប្រធានាធិបតី លោក Abd Rabbo Mansour Hadi រត់ចេញពីទីក្រុងនេះទៅកាន់កន្លែងសម្ងាត់មួយ ។ចំណែកបណ្តាយន្តហោះប្រយុទ្ធរបស់ពួកហ៊ូធី នាថ្ងៃទី២៥ មីនា បានបាញ់គ្រាប់រ៉ុក្កែត៣គ្រាប់លើអគារវិមានប្រធានាធិបតីនៅក្រុងអាដេន ។ប្រភពព័ត៌មានសន្តិសុខមូលដ្ឋាននិយាយថា ពួកជីវពលកុលសម្ព័ន្ធ ជាសម្ព័ន្ធមិត្តរបស់លោក Hadi បានចាកចេញពីបណ្តាទីតាំងពួកគេនៅជុំវិញព្រលានយន្តហោះក្រុងអាដេន ហើយលើកគ្នាទៅកាន់ខេត្ត Abyan ។ក្រោយពីពួកនេះចាកចេញ កងកម្លាំងរបស់ពួកហ៊ូធី ដែលលុកចូលក្នុងជំរំយោធាមួយចំនួនក្នុងក្រុងអាដេន ក៏ចូលត្រួតត្រាព្រលានយន្តហោះដែរ ។ប្រជាជនក្រុងអាដេនជាច្រើនរយនាក់ បានលើកគ្នាលុកចូលអគាររដ្ឋាភិបាល ព្រមទាំងក្នុងបណ្តាអគារវិមានប្រធានាធិបតី ដើម្បីប្រមូលយករបស់របរផ្សេងៗ ។ទន្ទឹមនឹងនេះ ការប្រយុទ្ធគ្នាយ៉ាងសាហាវនៅបន្តរវាងពួកឧទ្ទាមហ៊ូធី គាំទ្រដោយកងកម្លាំងសន្តិសុខ និងពួកជីវពលស្និទ្ធលោក Hadi ក្នុងខេត្ត Lahij ជាប់ក្រុងអាដេន ។
នាថ្ងៃដដែលនោះដែរ ពួកឧទ្ទាមហ៊ូធីវាយដណ្តើមត្រួតត្រាទាំងស្រុងនូវមូលដ្ឋានអាកាសចរណ៍យោធាយុទ្ធសាស្ត្រនៅ Lahij ហើយចាប់ខ្លួនរដ្ឋមន្ត្រីការពារប្រទេសយេម៉ែន ព្រមទាំងអ្នកទទួលខុសត្រូវជាន់ខ្ពស់ច្រើនរូបទៀត របស់កងទ័ពដែលស្មោះត្រង់នឹងលោក Hadi ។ចំណែកយន្តហោះប្រយុទ្ធរបស់ពួកឧទ្ទាមហ៊ូធី បានបាញ់គ្រាប់រ៉ុក្កែត៣គ្រាប់ ប្រឆាំងអគារវិមានប្រធានាធិបតីក្រុងអាដេន នាំឱ្យមានផ្សែងខ្មៅហុយចេញពីវិមានប្រធានាធិបតីនោះ ។ប្រភពយោធាមួយនិយាយថា កងឆ្មាំប្រធានាធិបតីបានប្រើកាំភ្លើងធំការពារអាកាស ដើម្បីបណ្តេញយន្តហោះប្រយុទ្ធទាំងនេះ ដែលហោះពីក្រុងសាណា មក ។ក្រុមចម្រុះនាំមុខដោយ
អារ៉ាប៊ីសាអ៊ូឌីត ធ្វើប្រតិបត្តិការយោធានៅយេម៉ែនប្រទេសអារ៉ាប៊ីសាអ៊ូឌីត បានឆ្លើយតបតាមការអំពាវនាវសុំជំនួយរបស់ប្រធានាធិបតីយេម៉ែន លោក Hadi ។ ប្រទេសនេះ កាលពីថ្ងៃទី២៥ មីនា បានបើកធ្វើប្រតិបត្តិការយោធាមួយនៅយេម៉ែន ចូលរួមដោយប្រទេសជាង១០ ដើម្បីការពារលោក Hadi ។ នេះជាការប្រកាសរបស់ឯកអគ្គរាជទូតអារ៉ាប៊ីសាអ៊ូឌីត ប្រចាំក្រុងវ៉ាសុីនតោន លោក Del Al-Jubeir ។ក្រោយការប្រកាសនេះបន្តិច ប្រជាជនក្រុងសាណា រដ្ឋធានីយេម៉ែន រៀបរាប់ពីការទម្លាក់គ្រាប់បែកលើតំបន់ព្រលានយន្តហោះក្រុងសាណា ត្រួតត្រាដោយពួកហ៊ូធី ។ទោះបីយ៉ាងណា ឯកអគ្គរាជទូតរូបនេះ ពុំបញ្ជាក់ឈ្មោះបណ្តាប្រទេសដែលចូលរួមក្នុងប្រតិបត្តិការនេះឡើយ តែបញ្ជាក់ថា បានពិគ្រោះគ្នាជាមួយសម្ព័ន្ធមិត្តជាច្រើន ពិសេសសហរដ្ឋអាមេរិក ។ទន្ទឹមនឹងនេះ ប្រទេស៤នៅតំបន់ឈូងសមុទ្រពែរ្ស៍ គឺកាតា គុយវ៉ែត បារ៉ែន និងអេមីរ៉ាតអារ៉ាប់រួម ឱ្យដឹងកាលពីថ្ងៃទី២៥ មីនា ថា ពួកគេសម្រេចឆ្លើយតបតាមការអំពាវនាវរបស់លោក Hadi ជួយការពារប្រទេសយេម៉ែន និងប្រជាជនប្រទេសនេះ ប្រឈមមុខនឹងការឈ្លានពានរបស់ពួកជីវពលហ៊ូធី ។ប្រតិបត្តិការយោធាបរទេសនេះ ធ្វើឡើងខណៈដែលពួកជីវពលស៊ីអីុត ហ៊ូធី គាំទ្រដោយអុីរ៉ង់ កំពុងវាយរុលឆ្ពោះទៅដណ្តើមកាន់កាប់ក្រុងអាដេន ។ អ្នកនាំពាក្យម្នាក់របស់ពួកហ៊ូធី និយាយថា ការវាយប្រហារកាន់កាប់ក្រុងកំពង់ផែធំនេះ ប្រើពេលតែរាប់ម៉ោងប៉ុណ្ណោះ ។ អ្នកនាំពាក្យរូបនេះអះអាងពីការផ្តល់រង្វាន់ប្រមាណជា១០០.០០០ដុល្លារ សម្រាប់ការចាប់ខ្លួនលោក Hadi ។បណ្តារដ្ឋមន្ត្រីការបរទេសអារ៉ាប់ ត្រូវរួមប្រជុំគ្នានាថ្ងៃទី២៦ មីនា នៅទីក្រុងគែរ ដើម្បីពិភាក្សាពីវិបត្តិនៅយេម៉ែន ៕
