ព្រះវិហារថ្មីដ៏ធំស្កឹមស្កៃជាងគេ ព្រមទាំងកសាងឡើងតាមបែបរចនាបថខ្មែរ និងក្បូរក្បាច់គួរឲ្យស្ញប់ស្ញែង ស្ថិតនៅក្នុងភូមិ-ឃុំសំរោងក្នុង ស្រុកឯកភ្នំ ខេត្តបាត់ដំបង ដែលមានតម្លៃទឹកប្រាក់សរុប ក្នុងការកសាងប្រមាណ៦៩០,៦៤៤ដុល្លារអាមេរិក ដែលបានចាប់ផ្តើមកសាង នៅក្នុងអំឡុងខែសីហា ឆ្នាំ២០០២ស្ថិតលើខ្នងភ្នំសិប្បនិមិត្ត ដែលមានទំហំ៣.៦០០ម៉ែត្រក្រឡា ព្រះវិហារបណ្តោយ២៨ម៉ែត្រ ទទឹង១៥ម៉ែត្រ និងកំពស់១៧ម៉ែត្រ ក្រោមគំនិតផ្តួចផ្តើមស្ថាបនាឡើងដោយ ឯកឧត្តម ឆាត់ លឿម សមាជិកព្រឹទ្ធសភាជាតិ និងការយកចិត្តទុកដាក់ ពីឯកឧត្តម ស ខេង អ្នកតំណាងរាស្ត្រមណ្ឌលខេត្តបាត់ដំបង និងជាប្រធានក្រុមការងារថ្នាក់ជាតិចុះជួយ
ខេត្ត ព្រមទាំងព្រះសង្ឃគណៈកម្មការ និងពុទ្ធបរិស័ទទីជិតឆ្ងាយទាំងអស់ ត្រូវបានដាក់សម្ពោធឲ្យប្រើប្រាស់ និងកាត់ឬសសីមា កាលពីព្រឹកថ្ងៃទី២៩ ខែមីនា ឆ្នាំ២០១៥ ក្រោមអធិបតីភាពដ៏ខ្ពង់ខ្ពស់ ឯកឧត្តម ស ខេង នាយករដ្ឋមន្ត្រីស្តីទី ។
តាមការលើកឡើង នូវប្រវត្តិកកើតឡើងវត្តសំរោងក្នុង ពីលោក មៀច សុំ អភិបាលស្រុកឯកភ្នំ បានឲ្យដឹងថា វត្តនេះបានកសាងឡើង ក្នុងអំឡុងឆ្នាំ១៧០៧ ។ ទីតាំងវត្តនេះ កាលដើមឡើយ គឺជាទីស្មសាន ប្រកបដោយព្រៃដើមឈើធំៗ ហើយក្នុងនោះ មានដើមសំរោងមួយដើមធំជាងគេ មានបន្ទាត់ផ្ចឹត២ម៉ែត្រ ។ ពេលកសាងវត្តនេះឡើង ដូនតាបានយកតាមលំនាំដើមសំរោងនេះ ដោយដាក់ឈ្មោះវត្តនេះថា៖ “ វត្តសំរោងក្នុង ”។
ឯកឧត្តម ស ខេង បានថ្លែងនូវការកោតសរសើរ ដល់ព្រះសង្ឃ គណៈកម្មការអាចារ្យវត្ត ដល់អ្នកស្ថាបនិក និងគំនិតផ្តួចផ្តើម ក្នុងការកសាងព្រះវិហារដ៏ធំជាងគេ ក្នុងខេត្តបាត់ដំបង ប្រកបដោយក្បូរក្បាច់ និងមានរចនាបថខ្មែរ ជាប្រវត្តិសាស្ត្រនេះឡើង សម្រាប់ជាគុណប្រយោជន៍ ក្នុងវិស័យព្រះពុទ្ធសាសនា ។
ឯកឧត្តម ក៏បានសំដែងអំណរគុណ ដល់សប្បុរសជនទាំងក្នុង និងក្រៅប្រទេស ដែលបានបរិច្ចាគ នូវធនធានទ្រព្យសម្បត្តិ ប្រាក់កាស ក្នុងការកសាងនូវសមិទ្ធផលនានា ទាំងវិស័យពុទ្ធចក្រ និងអាណាចក្រ ក្នុងទីអារាមនេះ ៕
