ភ្នំពេញ៖ រថយន្តកូរ៉ូឡាមួយគ្រឿង បើកក្នុងល្បឿនយ៉ាងលឿន ទាំងអ្នកបើកបរស្ថិតក្នុងស្ថានភាពស្រវឹងស្រាជោគជាំ បានទៅបុកជាមួយនឹងរថយន្តតាកូម៉ា ខណះដែលកំពុងបើកចេញពីខារ៉ាអូខេយីហោ ស្ពាននាគ ហើយរថយន្តកូរ៉ូឡា បានវិលមួយជុំ រងការខូចខាតនិង
បណ្តាលឱ្យនារីម្នាក់ ដែលជិះក្នុងរថយន្តរបួសបាក់ដៃ ។ ហេតុការណ៍នេះបានកើតឡើង កាលពីវេលាម៉ោង១២នឹង១០នាទីរំលងអាធ្រាត ឈានចូលថ្ងៃទី២៨ ខែមិនា ឆ្នាំ២០១៥ មុខខារ៉ាអូខេ ស្ពាននាគ ខាងជើងនឹងស្ពានជ្រោយចង្វារ តាមបណ្តោយផ្លូវជាតិលេខ៥ ស្ថិតក្នុងសង្កាត់ស្រះចក ខណ្ឌដូនពេញ ។
សាក្សីនៅកន្លែងកើតហេតុ បានឱ្យដឹងថា គេបានឃើញបុរសម្នាក់ បើករថយន្តកូរ៉ឡាពណ៍ទឹកប្រាក់ ពាក់ស្លាកលេខ ភ្នំពេញ 2G-1512 ក្នុងនោះមានប្រុសស្រី៣នាក់ រួមដំណើរជាមួយ បើកបរក្នុងល្បឿនយ៉ាងលឿន បានរេចង្កូតទៅបុករថយន្តតាកូម៉ា ពណ៍ទឹកប្រាក់មួយគ្រឿង ពាក់ស្លាកលេខ ភ្នំពេញ 2X-6719 ខណះដែលកំពុងបើកចេញពីខារ៉ាអូខេ យីហោ ស្ពាននាគ យ៉ាងពេញទំហឹង វិលត្រឡប់ក្បាលមកក្រោយវិញ បណ្តាលឱ្យរងការខូចខាតយ៉ាងដំណំ និងនារីម្នាក់ ដែលជិះក្នុងរថយន្តកូរ៉ូឡានោះ របួសធ្ងន់បាក់ដៃម្ខាង និង៣នាក់ទៀតរបួសស្រាល ។
ប្រភពដដែលបានបន្តថា ក្រោយកើតហេតុ សមត្ថកិច្ចមូលដ្ឋាន បានចុះមកអន្តរាគមន៍ដល់កន្លែងកើតហេតុ និងបានសហការជាមួយជំនាញ ស្ទូចយករថយន្តទាំង២គ្រឿង និងឃាត់ខ្លួនជនបង្ក ទៅការិយាល័យចរាចរណ៍ជើងគោក រាជធានីភ្នំពេញ រង់ចាំដោះស្រាយនាពេលក្រោយ ៕
