ភ្នំពេញ៖តាមបណ្តោយផ្លូវវេងស្រេង ភូមិត្រពាំងថ្លឹង សង្កាត់ចោមចៅ
យុវជន២នាក់បានរងរបួសធ្ងន់ធ្ងរ និងម្នាក់ទៀតរបួសស្រាល ត្រូវបានរថយន្តសាមុយដឹកយកទៅសង្គ្រោះនៅមន្ទីរពេទ្យភ្លាមៗ ដោយសារតែពួកគេជិះម៉ូតូបុកគ្នាយ៉ាងពេញទំហឹង នៅ
ចំណុចមុខបុរីពិភពថ្មី តាមបណ្តោយផ្លូវវេងស្រេង ស្ថិតក្នុងភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ កាលពីវេលាម៉ោង១១នឹង០៥នាទីយប់ ថ្ងៃទី២៩ ខែមិនា ឆ្នាំ២០១៥ ។
ប្រភពពត៌មាននៅកន្លែងកើតហេតុបានឱ្យដឹងថា មុនពេលកើតហេតុគេបានឃើញយុវជន២នាក់ជិះម៉ូតូ ស្តុបពីពណ៍ខៀវសមួយគ្រឿង ពាក់ស្លាកលេខ ភ្នំពេញ 1BQ-7073 ជិះឌុបគ្នាតាមបណ្តោយផ្លូវវេងស្រេង ទិសដៅពីកើតទៅលិចក្នុងល្បឿនយ៉ាងលឿន ពេលនោះមានយុវជនម្នាក់ទៀតជិះម៉ូតូសងកូរ៉េពណ៍ក្រហម ពាក់ស្លាកលេខ សៀមរាប 1F-1807 ទិសដៅបញ្ច្រាសទិសក្នុងល្បឿនលឿនដូចគ្នា មកដល់ចំណុចកើតហេតុ ក៏បានបុកគ្នាពេញទំហឹង បណ្តាលឱ្យរងរបួសធ្ងន់២នាក់ និងម្នាក់ទៀតរបួសស្រាល ត្រូវបានរថយន្តសាមុយដឹក យកទៅសង្គ្រោះនៅមន្ទីរពេទ្យទាំង៣នាក់ ។
ក្រោយមកសមត្ថកិច្ចមូលដ្ឋានបានចុះមកអន្តរាគមន៍ធ្វើការវាស់វែង យកម៉ូតូទាំង២គ្រឿងទៅរក្សាទុកនៅ អធិការដ្ឋាននគរបាលខណ្ឌពោធិ៍សែនជ័យ រង់ចាំដោះស្រាយនាពេលក្រោយ ៕
