ខេត្តសៀមរាប៖ នគរបាល ខេត្តសៀមរាប នៅ រសៀលថ្ងៃទី៣០មីនានេះ បានបង្ហាញមុខ អ្នកជួញដូរគ្រឿងញៀន៤នាក់ បញ្ជូនទៅស្ថាប័នតុលាការ ក្រោយពីរឆែករកឃើញវត្ថុតាង។
លោកវរសេនីយ៍ទោ អ៊ុំ សាអាត នាយការិយាល័យ ប្រឆាំងគ្រឿងញៀន នៃស្នងការនគរបាល 
ខេត្តសៀមរាប បានឲ្យដឹងថា ជនសង្ស័យ ទាំង៤នាក់ត្រូវបាន សមត្ថកិច្ចធ្វើការឃាត់ ខ្លួននៅម៉ោង៩និង៣០នាទី ព្រឹកថ្ងៃទី២៩មីនាឆ្នាំ២០១៥ ត្រង់ចំណុចផ្ទះជួល ក្រុមទី៦ ភូមិ សាលាកន្សែង សង្កាត់ស្វាយដង្គុំ ក្រុងសៀមរាប ដោយបាន សហការជាមួយ កម្លាំង នគរបាល ព្រហ្មទណ្ឌ កំរិតស្រាល និងនគរបាល ប៉ុស្ដិ៍សង្កាត់ស្វាយដង្គុំ។
លោកនាយការិយាល័យ ប្រឆាំងគ្រឿងញៀន បន្ថែមថា មនុស្ស ប្រុសស្រីទាំង៤នាក់ ដែលសមត្ថកិច្ច ឃាត់ខ្លួនពាក់ព័ន្ទគ្រឿងញៀន ទី១ឈ្មោះ សុវ៉ាន់គីម ភេទប្រុស អាយុ២១ឆ្នាំ មានទីលំនៅភូមិ ស្ទឹងថ្មី សង្កាត់ស្វាយដង្គុំ ក្រុងសៀមរាប (ជួញដូរ) ទី២ឈ្មោះឆោមនីសា ហៅទីភេទស្រី អាយុ១៩ឆ្នាំ មានទីលំនៅ ភូមិ បន្ទាយស្រី ឃុំដំដែក ស្រុកសូទ្រនិគម ខេត្តសៀមរាប (សំរួលប្រើប្រាស់) ទី៣ឈ្មោះស៊ុន រស្មី ហៅវិទ័រ ភេទប្រុសអាយុ ១៥ឆ្នាំ មានទីលំនៅ ភូមិស្ទឹងថ្មី សង្កាត់ស្វាយដង្គុំ ក្រុងសៀមរាប (រក្សាទុកប្រើប្រាស់) ទី៤ឈ្មោះ ចាន់រក្សា ហៅមួយ ភេទស្រី ទីលំនៅ ភូមិចាន់ស ស្រុកសូទ្រនិគម ខេត្តសៀមរាប(ប្រើប្រាស់)។
មន្ត្រីប្រឆាំងគ្រឿងញៀនបន្ថែមថា ក្រោយ ឃាត់ខ្លួន សមត្ថកិច្ច ឆែកឆេរ ឬកឃើញ វត្ថុតាង រួមមាន ម្សៅមេតំហ្វេតាមីន ចំនួន ១១កញ្ចប់តូច ទំងន់២,៤ក្រាម ទូរស័ព្ទដៃ ០៣គ្រឿង ដាវមួយដើម និងឧបរណ៍ ប្រើប្រាស់មួយចំនួន។ ជនសង្ស័យត្រូវបានកសាងសំណុំរឿង បញ្ជូនទៅកាន់ សាលាដំបូង ខេត្តសៀមរាប នៅរសៀលថ្ងៃទី៣០មីនាឆ្នាំ២០១៥នេះ ដើម្បីអនុវត្តទៅតាមផ្លូវច្បាប់៕
