បុរសម្នាក់ត្រូវបានប៉ូលីសចាប់ខ្លួន កសាងសំណុំរឿង បញ្ជូនទៅតុលាការ កាលពីថ្ងៃទី២ ខែមេសា ឆ្នាំ ២០១៤ ដោយសារបុរសនេះ បានចូលទៅលួចលុយ របស់លោកសង្ឃនៅក្នុងកុដិ វត្តស្វាយអំពារ ស្ថិតនៅឃុំអង្កាញ់ ស្រុកព្រៃកប្បាស ខេត្តតាកែវ កាលពីថ្ងៃទី ៣១ ខែមិនា ២០១៤ កាលពី
វេលាម៉ោង ១១និង៣០ នាទី ពាក់កណ្តាលអាធ្រាត ។
លោក ជុំ ឈឿន អធិការស្រុកព្រៃកប្បាស បានឱ្យដឹងថា ជនសង្ស័យឈ្មោះ ប៉ិច រស្មី ភេទប្រុស អាយុ២២ឆ្នាំ រស់នៅភូមិស្នោ ឃុំស្នោ ស្រុកព្រៃកប្បាស ខេត្តតាកែវ បានចូលទៅលួចលុយលោកសង្ឃ ចំនួន ១២ម៉ឺនរៀល ។ ខណៈពេលដែលកំពុងតែធ្វើសកម្មភាពលួច ក៏ត្រូវកូនសិស្សលោក និងតាអាចារ្យ ចាប់បាន រួចប្រគល់មកឱ្យប៉ូលីសចាត់ការទៅតាមច្បាប់ ។
ជនសង្ស័យបានសារភាពថា រូបគេពិតជាបានលួចលុយ របស់លោកសង្ឃចំនួន ១២ម៉ឺនរៀលប្រាកដមែន ៕
