បន្ទាយមានជ័យ៖ ក្នុងថ្ងៃតែ១ជនសង្ស័យចំនួន១៨នាក់ ត្រូវបានកម្លាំងសមត្ថកិច្ចប៉ូលីសនៃស្នងការនគរបាលខេត្តបន្ទាយមានជ័យ ធ្វើការឃាត់ខ្លួនដោយចោតប្រកាន់ពីបទ ជួញដូរនិងប្រើប្រាស់គ្រឿង ក្នុង២ករណីផ្សេងគ្នា កាលពីថ្ងៃទី ៣០ មីនា ២០១៥ ។
លោក ធិន ស៊ិនដេត នាយការិយាល័យប្រឆាំងគ្រឿងញៀននៃស្នងការនគរបាខេត្តបន្ទាយមានជ័យបានអោយដឹងថា ដោយទទួលបានផែនការពីលោក ឧត្តមសេនីយ៍ អាត់ ខែម ស្នងការនគរបាលខេត្តបន្ទាយមានជ័យលើបញ្ហាគ្រឿងញៀន ទើបកម្លាំងជំនាញសហការជាមួយអធិការគ្រប់ស្រុកក្រុងធ្វើការស្រាវជ្រាវ រហូតឈានដល់ការបង្ក្រាប់ករណីគ្រឿងញៀន
ចំនួន២ ដែល ករណីទី១កម្លាំងជំនាញប្រឆាំងគ្រឿងញៀនបានឃាត់ខ្លួនជនសង្ស័យចំនួន១៧នាក់ ដែល៧នាក់មានគ្រឿងញៀនជាប់ខ្លួន និងវត្ថុតាងរួមមាន ម្សៅក្រាមពណ៌សរថ្លាចំនួន២៣កញ្ចប់តូច ម៉ូតូចំនួន៦គ្រឿង និងសំភារៈជក់គ្រឿងញៀនមួយចំនួន នៅក្នុងផ្ទះសំណាក់ថ្មពេជ្រ ស្ថិតក្នុភូមិគាប សង្កាត់ទឹកថ្លា ក្រុងសិរីសោភ័ណ ខេត្តបន្ទាយមានជ័យ ។ ករណីទី២ កំលាំង
នគរបាលជំនាញព្រហ្មទណ្ឌនៃអធិការដ្ឋានស្រុកមង្គលបូរីបានឃាត់ខ្លួនជនសង្ស័យម្នាក់ និងវត្ថុតាងមាន ម្សៅក្រាមពណ៌សរថ្លា ១ថង់តូច ទូរស័ព្ទដៃ១គ្រឿង ម៉ូតូ១គ្រឿង ហើយការឃាត់ខ្លួននេះធ្វើឡើងនៅក្នុងភូមិជំទាវ ឃុំឬស្សីក្រោក ស្រុកមង្គលបូរី ខេត្តបន្ទាយមានជ័យ ។
លោកបន្តថា ក្នុងចំណោមជនសង្ស័យទាំង១៨នាក់មាន៨នាក់ត្រូវបានកសាងសំនុំរឿងបញ្ជូនទៅតុលាការ រីឯ១០នាក់ផ្សេងទៀតនឹងធ្វើពិសោធន៍ទៅលើទឹកនោមបើរកឃើញថា មានសារធាតុញៀនក្នុងខ្លួននឹងត្រូវបញ្ជូនទៅតុលាការដូចគ្នា ៕
