កំពងធំៈ ក្រោមការយកចិត្តទុកដាក់ ពីសំណាក់ ឯកឧត្តម អ៊ុត សំអន អភិបាលខេត្តកំពង់ធំ បានផ្តោតសារៈសំខាន់ទៅលើផ្នែកអនាម័យ ទីក្រុងស្អាត មានអានាម័យល្អ និងជម្រុញឲ្យមន្ត្រីរាជការ អង្គការសង្គមស៊ីវិល កងកម្លាំងប្រដាប់អាវុធ សិស្សានុសិស្ស ចូលរួមសំអាតបរិស្ថាន ដើម្បីលើកកម្ពស់សោភ័ណភាពក្រុងស្ទឹងសែន ក៏ដូចជាការត្រៀមអបអរសាទរ ក្នុងពិធីបុណ្យចូលឆ្នាំ ប្រពៃណីខ្មែរ ដែលកំពុងតែរំកិលខិតមកយ៉ាងឆាប់ខាងមុខនេះ។
សកម្មភាពការធ្វើពលកម្មនេះ ដោយមានការចូលរួមកម្លាំង ពីសំណាក់តំបន់ប្រតិបត្តិការសឹករងកំពង់ធំ ចំនួន ជាង២០០នាក់ បូករួមនឹងកម្លាំងអាជ្ញាធរក្រុង និងកម្លាំងអធិការក្រុងស្ទឹងសែន ប្រជាការពារ ព្រមទាំងសិស្ស ប្រជាពលរដ្ឋ ជាង៦០០នាក់ ចូលរួមក្នុងអត្តពលកម្មនេះ តែដោយឡែកនៅតាមមន្ទីរអង្គរភាព គ្រប់ស្ថាប័ន បាននាំគ្នាប្ររព្វពិធីអត្តពកម្មនៅតាមមុខមន្ទីររាងៗខ្លួន ។
ឯកឧត្តម ឧត្តមសេនីយ៍ត្រី សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ បានឲ្យដឹងថា កាដឹកនាំកម្លាំងមកជួយសំអាតបរិស្ថាននេះ គឺជាការផ្សាភ្ជាប់នូវចំណងសាមគ្គី រវាងអាជ្ញាធរក្រុង អាជ្ញាធរខេត្ត និងមន្ត្រីអង្គការសង្គមស៊ីវិល ដើម្បីបំផុសចលនាមហាជន ទូទាំងខេត្តកំពង់ធំ ចូលរួមសំអាតនូវបរិស្ថានមុខផ្ទះរបស់ខ្លួន ម្យ៉ាងទៀតនោះមន្ត្រីនៃកងយោធពលខេមរៈភូមិន្ទ គឺជាកម្លាំងអន្តរាគមន៍របស់ខេត្ត បានត្រៀមចូលរួមគ្រប់សកម្មភាព ទាំងការថែរក្សា អភិរក្ស និងបង្ក្រាបបទល្មើស និងចូលរួមសហការគ្រប់សកម្មភាពរបស់ខេត្ត ជាពិសេសវិញនោះ ថ្ងៃចូលឆ្នាំថ្មីបាននិងរំកិលមក ប្រជាប្រុសស្រី ក្នុងទឹកដីខេត្តកំពង់ធំ រីករាយទទួល ភ្ញៀវជាតិ និងអន្តរជាតិ មកកំសាន្តខេត្តកំពង់ធំនេះ។
លោក ហុក រិន អភិបាលក្រុងស្ទឹងសែន បានឲ្យដឹងថា កម្លាំងប្រដាប់អាវុធ និងអាជ្ញាធរ ក្រុង ខេត្ត និងព្យាយាមកាត់បន្ថយទំលាប់ចាស់របស់ប្រជាពលរដ្ឋ ជាពិសេសនៅតាមមុខផ្ទះរបស់គាត់ ឲ្យមានការថែរក្សា នូវអនាម័យ ដើម្បីជួយគ្នាគិត ជួយគ្នាធ្វើ ជួយគ្នាសំអាត ដើម្បីសុខភាព អានាម័យ ក៏ដូចជាការលើកកម្ពស់ សោភ័ណភាពមុខមាត់ ក្រុងស្ទឹងសែន ក្នុងពិធីបុណ្យចូលឆ្នាំ និងការចូលរួមសហការនៃ គឺត្រូវបានចាប់អនុវត្តជារៀងរហូត ស្របតាមគោលនយោបាយរបស់រាជរដ្ឋាភិបាល និងក្រសួងទេសចរណ៍ ផងដែរ។
ដោយ ប៊ុន រដ្ឋា
