កំពង់ឆ្នាំង ៖ លោក ចេង ញ៉ាន់ អភិបាលរងខេត្តតំណាង ឯកឧត្តម ឈួរ ច័ន្ទឌឿន អភិបាលខេត្តកំពង់ឆ្នាំងព្រមទាំងលោកអភិបាលរងខេត្ត ប្រធានអង្គភាពជុំវិញខេត្តនិងកងកំលាំងទាំង៣ប្រភេទ នៅព្រឹកថៃ្ងទី៣០ ខែមីនា ឆ្នាំ២០១៥នៅក្នុងសាលាខេត្តកំពង់ឆ្នាំង បានទទួលគណៈប្រតិភូមួយក្រុមរបស់ទីក្រុងកិនថឺប្រទេសវៀតណាមដឹកនាំដោយ ឯកឧត្តម ត្រឹងវ៉ុ តជុង អនុលេខាបក្សទីក្រុងកិនថឺ និងឯកឧត្ត មហ្វាម វាំងហ៊ីវ ប្រធានក្រុមប្រឹក្សាគណៈកម្មាធិការប្រជាជនក្រុងកិនថឺ និងប្រតិភូអមដំណើរជាច្រើនរូបទៀតបានមកបំពេញទស្សនកិច្ចជាមិត្តភាពនៅខេត្តកំពង់ឆ្នាំង ដើម្បីរិតចំណងសាមគ្គីភាពរវាងខេត្តកំពង់ឆ្នាំងនិងទីក្រុងកិនថឺប្រទេសវៀតណាម។
មានប្រសាសន៍ស្វាគមន៍ក្នុងឱកាសនោះលោក ចេង ញ៉ាន់ បានថ្លែងថា៖វត្តមានរបស់ប្រតិភូរបស់ទីក្រុងកិនថឺប្រទេសវៀតណាមនៅពេលនេះបានបញ្ជាក់ច្បាស់ពីចំណងសាមគ្គីភាពមិត្តភាពរវាងប្រជាជននៃប្រទេសទាំង២កម្ពុជាវៀតណាម និយាយដោយឡែករវាងទីក្រុងកិនថឺនិងខេត្តកំពង់ឆ្នាំង អោយកាន់តែមានភាពរឹងម៉ាំនិងជិតស្និតថែមទៀត។លោកក៏បានរំលឹកឡើងវិញនូវការរួមសហការគ្នារវាងកម្ពុជាវៀតណាមបានផ្តួលរំលំរបបវាលពិឃាតប៉ុលពត នាំមកនូវជីវិតលើកទី២ជូនប្រជាជនកម្ពុជាទូទាំងប្រ ទេសនាថៃ្ង៧មករា ឆ្នាំ១៩៧៩ ដែលជាថៃ្ងប្រវត្តិសាស្ត្រមួយដែលប្រជាជនកម្ពុជាទូទាំងប្រទេសមិនអាចបំភ្លេចបានឡើយ។
ជាក់ស្តែងពេលចុងក្រោយនេះ ដោយសារតែនយោបាយឈ្នះឈ្នះរបស់សម្តេចតេជោសែនបានរំលាយអង្គការចាត់តាំងរបស់របស់ប្រល័យពូជសាសន៍ទាំងស្រុង ហើយធ្វើអោយប្រទេសកម្ពុជាមានស្ថេរភាពសន្តិភាពនិងការអភិវឌ្ឍន៍រីកចំរើនគ្រប់ទីកន្លែង។ក្នុងឱកាសនោះដែរលោក សូមអោយថ្នាក់ដឹកនាំទីក្រុងកិនថឺបន្តជួយដល់ខេត្តកំពង់ឆ្នាំង លើវិស័យបណ្តុះបណ្តាលធនធានមនុស្សជាបន្តទៀត។
ឯកឧត្តម ត្រឹង វ៉ុតជុង អនុលេខាបក្សទីក្រុងកិនថឺបានមានប្រសាសន៍កោតសរសើរចំពោះការរីកចំ
រើនយ៉ាងឆាប់រហ័សលើគ្រប់វិស័យក្រោមការដឹកនាំប្រកបដោយគតិបណ្ឌិតរបស់សម្តេចអគ្គមហាសេនាទាំងបី ជាប្រមុខដឹកដឹកនាំដ៏ឈ្លាសវៃរបស់គណបក្សប្រជាជនកម្ពុជា។ដោយឡែកខេត្តកំពង់ឆ្នាំងមានការអភិវឌ្ឍន៍និងរីកចំរើនយ៉ាងឆាប់រហ័សផងដែរ។
ឯកឧត្តមបានបន្តទៀតថាទីក្រុងកិនថឺនិងខេត្តកំពង់ឆ្នាំងនិងបន្តសហការយ៉ាងជិតស្និតជាមួយគ្នាបន្តទៀតដើម្បីចែករំលែកបទពិសោធន៍លើការអភិវឌ្ឍន៍ ចូលរួមយ៉ាងសកម្មក្នុងការកាត់បន្ថយភាពក្រីក្ររបស់ប្រជាជននៃប្រទេសយើងទាំងពីរអោយ មានកំរិតទាបបំផុត។ចំពោះសំណើររបស់លោក ចេង ញ៉ាន់អភិបាលរងខេត្តកំពង់ឆ្នាំងសុំជួយបណ្តុះបណ្តាលធនធានមនុស្ស ឯកឧត្តម និងយកទៅពិនិត្យពិភាក្សាជាមួយថ្នាក់នាំក្រុងកិនថឺ ដើម្បីបន្តជួយបណ្តុះបណ្តាលធនធានមនុស្សតាមការស្នើសុំ។
ចុងបញ្ចប់លោក ចេង ញ៉ាន់ បានជូនពរនិងសូមប្រសិទិ្ធពរជ័យសិរីមង្គលគ្រប់ប្រការដល់ថ្នាក់ដឹកនាំខេត្តកំពង់ឆ្នាំងមន្ត្រីរាជការ កងកំលាំងប្រដាប់អាវុធ ប្រជាពលរដ្ឋទូទាំងខេត្តកំពង់ឆ្នាំងក្នុងឱកាសចូលឆ្នាំថ្មីប្រពៃណីខែ្មរខាងមុខនេះ ។គណៈប្រតិភូក៏បានផ្តល់ជូននូវថវិកាចំនួន៥ពាន់ដុល្លាដល់ខេត្តកំពង់ឆ្នាំងនិងជូនវត្ថុអនុស្សាវរីយ៍ដល់ថ្នាក់ដឹកនាំខេត្ត និងថ្នាក់នាំមន្ទីរអង្គភាពជុំវិញខេត្តកំពង់ឆ្នាំង ដែលបានអញ្ជើញមកចូលរួមផងដែរ៕
