ខេត្តព្រះវិហារក្រុមចោរលួចគោក្របីឈានទៅប្រើប្រាស់អាវុធនិងបានត្រៀមមធ្យោបាយដឹកជញ្ជូនរួចជាស្រេចដើម្បីប៉ុនប៉ងបាញ់សម្លាប់ហ្វូងគោនៅតាមតំបន់ព្រៃដាច់ស្រយ៉ាលពីភូមិដែលប្រជាពលរដ្ឋមានទម្លាប់យកទៅព្រលែងចោលអោយដើរស៊ីស្មៅ។ករណីបាញ់ប្លន់នេះបានបន្សល់ទុកសត្វគោចំនួន៣ក្បាលស្លាប់នៅនឹងកន្លែងនៅវេលាម៉ោង៤រសៀលថ្ងៃទី ៣០ ខែ មិនា ឆ្នាំ ២០១៥នៅចំនុចស្រះទឹក ស្ថិតក្នុងភូមិ ត្មាតប៉ើយ ឃុំ ព្រីងធំ ស្រុកជាំក្សាន្តខេត្តព្រះវិហារ ។
តាមសេចក្ដីរាយការណ៍ពីសាក្សីដែលដឹងហេតុការណ៍បានអោយដឹងនៅព្រឹកថ្ងៃទី៣១មិនាថា គាត់បានឮសូរគ្រាប់កាំភ្លើងផ្ទុះចំនួន៤ទៅ៥គ្រាប់ដែលមានចំងាយពីកន្លែងគាត់ភ្ជួរដីប្រមាណ៥០០ម៉ែត្រ ដែលក្រុមចោរបានបាញ់សម្លាប់សត្វគោ ។បន្ទាប់មកគាត់បានទៅពិនិត្យមើលកន្លែងផ្ទុះអាវុធនោះស្រាប់តែឃើញគោចំនួន៣ក្បាលបានស្លាប់នៅនឹងកន្លែងហើយមានការភ្ញាក់ផ្អើលដល់ប្រជាពលរដ្ឋនិងម្ចាស់គោបាននាំគ្នាមកដល់កន្លែងកើតហេតុការណ៍រីឯក្រុមចោរបានរត់គេចខ្លួនដោយសុវត្ថិភាព។
សាក្សីបានបន្តរថា ក្រោយពេលក្រុមចោរបានបាញ់សំលាប់សត្វគោរួចហើយ គាត់បានឃើញរថយន្ត កាមរី ពណ៌ស១គ្រឿងបើកក្រឡឹងចុះក្រឡឹងឡើងចំនួន៣ជុំបម្រុងលើកគោទាំង៣ក្បាលនោះដាក់រថយន្ដរបស់ខ្លួនបន្ទាប់មកបានរត់គេចខ្លួនវិញព្រោះតែបែកការណ៍ដល់ប្រជាពលរដ្ឋនិងសមត្ថកិច្ចនគរបាលមូលដ្ឋាន ។សាក្សីនិយាយថាសមត្ថកិច្ចនគរបាលមូលដ្ឋានបានប្រគល់គោស្លាប់ទាំង៣ក្បាលនោះទៅអោយម្ចាស់វិញរីឯក្រុមចោរត្រូវសមត្ថកិច្ចនគរបាលកំពុងស្រាវជ្រាវតាមចាប់ខ្លួនយកមកផ្តន្ទាទោសតាមផ្លូវច្បាប់។
អ្នកសារព័ត៌មានមិនអាចជួបទំនាក់ទំនងសួរនាំលោកជាគឹមសេងអភិបាលស្រុកនិងជាប្រធានគណះបញ្ជាការឯកភាពស្រុកជាំក្សាន្ដបានទេដើម្បីចង់ដឹងថាលោកអភិបាលស្រុកមានវិធានការយ៉ាងណាដែរដើម្បីចូលរួមបង្ក្រាបលុបបំបាត់អោយមានប្រសិទ្ធភាពចំពោះសកម្មភាពក្រុមចោរលួចប្លន់គោក្របីរបស់ប្រជាពលរដ្ឋដែលតែងតែកើតមានទ្បើងជាញឹកញាប់លើទឹកដីស្រុកជាំក្សាន្តនោះ។អ្នកសារព័ត៌មានបានព្យាយាមហៅទូរស័ព្ទទៅគាត់ចូលចំនួន៣ដងប៉ុន្តែមិនមានអ្នកលើកទទួលនោះទេនៅព្រឹកថ្ងៃទី៣១មិនា២០១៥៕
