> បាត់ដំបង: មានអភូតហេតុចំឡែកមួយបានកើតឡើងនៅចំពីលើក្រុងបាត់ដំបង កាលពីព្រឹកថ្ងៃទី 1-4-15 រហូតដល់មានការភ្ញាក់ផ្អើលពីសំណាក់ប្រជាពលរដ្ឋគ្រប់រូប ដោយសារតែមានរូបរាងព្រះអាទិត្យបានរះឡើងចំនួន5បានបញ្ចេញពន្លឺយ៉ាងខ្លាំង ព្រមទាំងមានបាំងឆ័ត្រនៅចំកណ្តាលផងដែលធ្វើអោយមនុស្សម្នាទាំងឡាយ នាំគ្នាទូរស័ព្ទប្រាប់ទៅបងប្អូនអោយបានដឹងនូវអភូតហេតុនេះ។ដើមដំបូងនៃអភូតហេតុដ៏ចំឡែកនេះគឺ នៅម៉ោង8នាព្រឹកថ្ងៃទី1-4-15 ខណ:ពេលដែលព្រះអាទិត្យកំពុងតែរះពីទិសខាងកើត ព្រមទាំងបានបញ្ចេញពន្លឺយ៉ាងខ្លាំងផងនោះ ស្រាប់តែមានពន្លឺដូចឥន្ទនូរាងជារង្វង់មួយចំហៀងបានកើតមានឡើងនៅចំកណ្តាលដែលគេហៅថា “បាំងឆ័ត្រ”
> ស្របពេលជាមួយគ្នានោះដែរក៏មានព្រះអាទិត្យចំនួនពីរទៀតបានបញ្ចេញពន្លឺព្រមៗគ្នាព្រមទាំងមានខ្សែបន្ទាត់របស់ពន្លឺនោះអមជាមួយផង ដោយមួយនៅចំទិសនិរតី និងមួយទៀតគឺរះនៅទិសពាយ័ព្យដែលបានទាក់ទាញអោយមនុស្សផងទាំងឡាយចង់ដឹង ចង់ឃើញ ហើយក៏មានការងឿងឆ្ងល់ផងដែរ។
> មិនត្រឹមតែប៉ុណ្ណោះ គឺនៅម៉ោង8,30នាទីនាព្រឹកថ្ងៃដដែល ស្រាប់តែព្រះអាទិត្យទាំងនោះ
> បានបំបែកខ្លួនចេញមកចំនួនពីរបន្ថែមទៀត ដោយនៅអមសងខាងព្រះអាទិត្យពិតប្រាកដ ហើយក៏មានពន្លឺខ្លាំងជាងមុនទៀត ដោយមួយនៅចំទិសអគ្នេយ៍ និងមួយទៀតស្ថិតនៅទិសឥសាន្ត។
> គួរបញ្ជាក់ដែរថា ព្រះអាទិត្យទាំង5ដែលរះនិងបញ្ចេញរស្មីយ៉ាងខ្លាំងនេះ គឺហាក់បីដូចជា
> រះនៅក្នុងគន្លងអ្វីមួយព្រោះនៅចន្លោះពីព្រះអាទិត្យមួយទៅព្រះអាទិត្យមួយ គឺមានភ្ជាប់ដោយខ្សែពន្លឺព៌ណស យ៉ាងច្បាស់ ដែលបង្កើតបានជារង្វង់មួយនៅចំពីលើក្រុងបាត់ដំបងតែម្តង។ពាក់ព័ន្ធទៅនឹងអភូតហេតុដ៏ចំឡែកនេះដែរ ប្រជាពលរដ្ឋនៅឯខេត្តបន្ទាយមានជ័យដែលស្ថិតនៅជាប់នឹង
> ព្រុំប្រទល់គ្នាក៏មើលរូបភាពនេះមិនឃើញដែរ ពិសេសអ្នកដែលរស់នៅទីក្រុងភ្នំពេញក៏កាន់តែមើលលែងឃើញទៅទៀត ធ្វើអោយកម្ពុជាថ្មីយើងតាមប្រមាញ់យករូបភាពប៉ុន្តែព្រះអាទិត្យចំនួន3យើងអាចយករូបភាពរួមគ្នាបាន ដោយឡែកព្រះអាទិត្យចំនួនពីរទៀតដែលស្ថិតនៅតាមទិសផ្សេងៗគ្នាគឺយើងយកបានតែមួយៗដាច់ដោយឡែកពីគ្នាតែប៉ុណ្ណោះ។
> ទីបំផុតនៅវេលាម៉ោង9,30នាទីព្រឹកថ្ងៃដដែលរូបភាពទាំងនោះត្រូវបានរលាយបាត់ទៅវិញ
> ជាធម្មតា ដោយបន្សល់នូវព្រះអាទិត្យតែមួយដូចដើម ជុំវិញបញ្ហានេះ ឬក៏អភូតហេតុចំឡែកនេះយើងមានអាចរកអ្នកណាម្នាក់មកបំភ្លឺ ឬធ្វើការទស្សទាយបានឡើយ ដោយទុកអោយមិត្តអ្នកអានទាំងអស់ ធ្វើការសន្និដ្ឋានដោយខ្លួនឯងទៅចុះ ព្រោះរូបភាពនេះយើងទាំងអស់គ្នាក៏មិនដែលបានឃើញនូវព្រឹត្តិការដ៏កម្រនឹងមិនដែលមានកើតឡើងនៅលើភពផែនដីយើងនេះទាល់តែសោះ៕
