កំពង់ឆ្នាំង៖ស្នងការដ្ឋាននគរបាលខេត្តកំពង់ឆ្នាំង ធ្វើការប្រគល់ឧបករណ៍ឆក់ត្រីចំនួន៧៦២គ្រឿង និងសំណាញ់ឆក់មួយគ្រឿងទៀត ជូនសមត្ថកិច្ចរដ្ឋបាលជលផលក្រោយពីបានផ្សព្វផ្សាយនូវសេចក្តីណែនាំលេខ០៩ ចុះថ្ងៃទី១៤ ខែមករា ឆ្នាំ២០១៥ របស់ឯកឧត្តម ឈួរ ច័ន្ទ
ឌឿន អភិបាលខេត្តកំពង់ឆ្នាំងដល់ប្រជាពលរដ្ឋ ស្តីពីការចាត់វិធានការណ៍លុបបំបាត់ឧបករណ៍ឆក់ត្រីរួចមក។ការប្រគល់ជូនឧបករណ៍ឆក់ត្រីនេះ បានធ្វើឡើងនៅព្រឹកថ្ងៃទី០១ ខែមេសា ឆ្នាំ២០១៥ ក្នុងស្នងការដ្ឋាននគរបាលខេត្ត ដោយមានការចូលរួមពីលោក ជុន ថារិទ្ធ ស្នងការរងនគរបាលខេត្ត លោក លី ឡា នាយរងខ័ណ្ឌរដ្ឋបាលជលផលកំពង់ឆ្នាំង និងលោក ជិន សុផាត នាយការិយាល័យនគរបាលបង្ក្រាបបទល្មើសសេដ្ឋកិច្ច។
លោក ជុន ថារិទ្ធ ស្នងការនៃស្នងការដ្ឋាននគរបាលខេត្តកំពង់ឆ្នាំងបានថ្លែងអោយដឹងថា៖ក្នុងការចាត់វិធានការណ៍លុបបំបាត់ឧបករណ៍ឆក់ត្រី តាមសេចក្តីណែនាំលេខ០៩របស់ឯកឧត្តមអភិបាលខេត្តអាជ្ញាធរស្រុកក្រុងទាំង៨បានចាត់វិធានការណ៍ គឺការចុះផ្សព្វផ្សាយក្នុងវេទិកាគោលនយោបាយភូមិឃុំមានសុវត្ថិភាពនិងបានចុះចែកសេចក្តីណែរនាំជូនប្រជាពលរដ្ឋតាមផ្ទះ និងមុខសញ្ញាឆក់ត្រីបានជាច្រើនម៉ឺនសន្លឹក។ក្នុងនោះដែរនគរបាលប៉ុស្តិរដ្ឋបាលសហការជាមួយសមត្ថកិច្ចជំនាញរដ្ឋបាលជលផល ចុះស្រង់មុខសញ្ញាដែលមានឧបករណ៍ឆក់ត្រីនៅក្នុងស្រុកក្រុងទាំង៨។
ក្រោយពីអាជ្ញាធរស្រុកក្រុង បានអនុវត្តចលនាប្រជាពលរដ្ឋតាមខ្លឹមសាលិខិតដែលបានចែកជូនរួចមក ឧបករណ៍ឆក់ត្រីចំនួន៧៦២គ្រឿង ត្រូវបានប្រជាពលរដ្ឋតាមបណ្តាស្រុកក្រុងទាំង៨ ស្ម័គចិត្តយកមកប្រគល់ជូនសមត្ថកិច្ចប៉ុស្តិរដ្ឋបាលវិញ ហើយថ្ងៃនេះស្នងការដ្ឋានបានប្រគល់ឧបករណ៍ឆក់នេះជូនខ័ណ្ឌរដ្ឋបាលជលផលជាអ្នកចាត់ការបន្ត។
លោក លី ឡា បានបញ្ជាក់អោយដឹងទៀតថា៖ក្នុងការអនុវត្តនូវសេចក្តីណែនាំនេះ ខ័ណ្ឌរដ្ឋបាលជលផលខេត្តបានសហការជាមួយគណៈបញ្ជាការឯកភាពរដ្ឋបាលស្រុកក្រុងទាំង៨ជាប្រចាំ និងបានលើកវិធានការសំរាប់អនុវត្តបន្ត ទី១គឺគណៈបញ្ជាការឯកភាពរដ្ឋបាលស្រុកក្រុង ត្រូវប្រើប្រាស់កំលាំងសរុប វិធានការណ៍សរុប មធ្យោបាយសរុបដោយសហការជាមួយកងកំលាំងទាំង៣ បន្តអនុវត្តអោយបានខ្លាំងក្លា និងផុលផុសបន្ថែមទៀត។ទី២គឺត្រូវចុះជួបមុខសញ្ញា ផ្ទាល់ដល់ផ្ទះតែម្តង និងធ្វើកិច្ចសន្យាអោយបញ្ឈប់ការប្រព្រឹត្តបទល្មើស។ទី៣គឺត្រូវប្រើវិធានការណ៍ឃ្លាំមើលទាំងមុខសញ្ញាដែលបានប្រគល់អោយហើយ និងមុខសញ្ញាដែលកំពុងលាក់ទុកឧបករណ៍ឆក់។ដោយឡែកឧបករណ៍ឆក់ត្រីដែលសមត្ថកិច្ចជំនាញរដ្ឋបាលជលផល អាជ្ញាធរ និងកងកំលាំងទាំងបីប្រមូលបានមានរហូតដល់៩២៨គ្រឿង និងសំណាញ់ឆក់១គ្រឿងទៀត ហើយឧបករណ៍នេះនឹងត្រូវបំផ្លាញចោលនៅវេលាថ្ងៃស្អែក។
វិធានការណ៍ទាំង៣ចំណុចខាងលើនេះ អាជ្ញាធរស្រុកនឹងបន្តអនុវត្តរហូតតទៅ ហើយខ័ណ្ឌរដ្ឋបាលជលផលនឹងធ្វើការបូកសរុបម្តងទៀតបន្តបន្ទាប់ ដើម្បីដឹងថាតើការស្ម័គចិត្តរបស់ប្រជាពលរដ្ឋក្នុងការប្រគល់នូវឧបករណ៍ល្មើសនេះបានប៉ុនណា ហើយលោកបានអំពានាវដល់បងប្អូនប្រជាពលរដ្ឋបឈ្ឈប់ជាបន្ទាន់នូវការផលិត ទិញ លក់ ដឹកជញ្ជូន រក្សាទុកឧបករណ៍ឆក់ត្រី ដែលអ្នកប្រព្រឹត្តត្រូវប្រឈមនឹងការផ្តន្ទាទោសក្រោមបទល្មើសជលផលថ្នាក់លេខ២ ត្រង់មាត្រាទី១០០ ចំណុច៤ ដែលត្រូវដាក់ពន្ធនាគារពី១ឆ្នាំទៅ៣ឆ្នាំ ឬពិន័យជាប្រាក់ពី៥លានទៅ៥០លានរៀល។ដោយឡែកអ្នកកំពុងប្រើប្រាស់ឧបករណ៍ឆក់ត្រីវិញ ត្រូវប្រឈមនឹងការផ្តន្ទាទោសក្រោមបទល្មើសជលផលថ្នាក់លេខ១ ត្រង់មាត្រាទី៩៨ ចំណុច៤ ដែលត្រូវដាក់ពន្ធនាគារពី៣ឆ្នាំទៅ៥ឆ្នាំ និងវត្ថុតាងទាំងអស់ត្រូវរឹបអូសជាសម្បត្តិរដ្ឋ ឬបំផ្លាញចោល៕
