ខេត្តប៉ៃលិន ៖ ជនសង្ស័យជាជនជាតិថៃម្នាក់ឆ្លងដែនមកលួចម៉ូតូជនជាតិខ្មែរ ត្រួវបានសមត្ថកិច្ចកងរាជអាវុធហត្ថខេត្តប៉ៃលិន សហការជាមួយសមត្ថកិច្ចកងរាជអាវុធហត្ថស្រុកកំរៀង ខេត្តបាត់ដំបង ចាប់ឃាត់ខ្លួន តាមពាក្យបណ្តឹងរបស់ម្ចាស់ម៉ូតូពីបទលួចកាលពីព្រឹកថ្ងៃទី
៣១ ខែមីនា ឆ្នាំ២០១៥ ស្ថិតនៅភូមិផ្សារព្រំ ឃុំស្ទឹងកាច់ ស្រុកសាលាក្រៅ ខេត្តប៉ៃលិន ។
ហេតុការណ៍ចាប់ឃាត់ខ្លួនជនសង្ស័យជាចោរជនជាតិថៃនេះ បានធ្វើឡើងកាលពីវេលាម៉ោង ២រសៀលថ្ងៃទី៣១ ខែមីនា ឆ្នាំ២០១៥ ស្ថិតក្នុងភូមិដួង ឃុំបឹងរាំង ស្រុកកំរៀង ខេត្តបាត់ដំបង ។
ប្រភពព័ត៌មានបានឱ្យដឹងថា ជនសង្ស័យឈ្មោះ ឆ័យ យ៉ានុត ភេទប្រុស អាយុ៣២ឆ្នាំ ជាជនជាតិថៃ រស់នៅភូមិប៉ានយ៉ក ឃុំមឿង ស្រុករ៉ាក់យ៉ង ខេត្តរ៉ាក់យ៉ង ប្រទេសថៃ ។
ចំណែកម្ចាស់ម៉ូតូឈ្មោះ ហ៊ុយ ប៊ុនថន ភេទប្រុស អាយុ៣៤ឆ្នាំ មុខរបរជាយោធា រស់នៅភូមិផ្សារព្រំ ឃុំស្ទឹងកាច់ ស្រុកសាលាក្រៅ ខេត្តប៉ៃលិន និងម៉ូតូដែលជនសង្ស័យលួចម៉ាកវ៉េវអាលហ្វា ពណ៌ខ្មៅ ពាក់ស្លាកលេខ ប៉ៃលិន 1A-6503 ។
តាមប្រភពបានឱ្យដឹងថា មុនពេលកើតហេតុ គេឃើញជនសង្ស័យ ជាជនជាតិថៃខាងលើបានដើរចេញចូលតាមច្រកទ្វារអន្តរជាតិព្រំជារៀងរាល់ថ្ងៃ ដោយមានសាក់រូបពេញដងខ្លួនតាំងពីក្បាលរហូតដល់ចុងជើង ហើយក្នុងមួយថ្ងៃៗ ដើរពីកន្លែងមួយ ទៅកន្លែងមួយមានបំណងលួចទ្រព្យសម្បត្តិប្រជាពលរដ្ឋ ។ ចោរឆ្លងដែននេះ បានមកស្នាក់នៅភូមិផ្សារព្រំ ឃុំស្ទឹងកាច់ អស់រយៈពេលជាងមួយឆ្នាំមកហើយ ជួនកាលឆ្លងទៅស្រុកថៃ ពេលខ្លះមកខ្មែរវិញ លុះនៅពេលកើតហេតុរូបគេ បានឃើញម៉ូតូជនរងគ្រោះទុកចោល នៅមុខផ្ទះមិនឃើញម្ចាស់ ក៏ធ្វើសកម្មភាពលួចតែម្តង ។ ពេលលួចបានជនសង្ស័យរូបនេះបានជិៈម៉ូតូមកទិសខាងកើត យ៉ាងលឿនបាត់ស្រមោល ហើយត្រូវម្ចាស់ម៉ូតូដាក់ពាក្យបណ្តឹងទៅកងរាជអាវុធហត្ថខេត្តប៉ៃលិន ដោយសហការជាមួយអាវុធហត្ថខេត្តបាត់ដំបង ធ្វើការឃាត់ខ្លួនបាននៅស្រុកកំរៀង ។
បើតាមសម្តីកងរាជអាវុធហត្ថខេត្តប៉ៃលិន បានឲ្យដឹងថា ក្រោយពីទទូលពាក្យបណ្តឹងពីជនរងគ្រោះថា មានករណីចោរលួចម៉ូតូ នៅភូមិផ្សារព្រំ ហើយជនសង្ស័យបានជិះសំដៅទៅស្រុកកំរៀង ទើបសហការជាមួយកងរាជអាវុធហត្ថស្រុកកំរៀងចាំស្ទាក់ ឃាត់ខ្លួនមុខសញ្ញា បានសម្រេច នៅភូមិដួង ឃុំបឹងរាំង ស្រុកកំរៀងតែម្តង ។
បច្ចុប្បន្នជនសង្ស័យ ជាចោរឆ្លងដែនជនជាតិថៃ ត្រួវកម្លាំងការិយាល័យស្រាវជ្រាវបទល្មើសព្រហ្មទណ្ឌនៃបញ្ជាការដ្ឋានកងរាជអាវុធហត្ថខេត្ត រៀបចំសំណុំរឿងបញ្ជូនទៅតុលាការខេត្តប៉ៃលិន ដើម្បីចាត់ការតាមផ្លូវច្បាប់ ៕
