ខេត្តសៀមរាប៖ សំណង់រឹងមាំគ្មានច្បាប់មួយកន្លែងនៅលើប្រព័ន្ធលូ ខណៈពេលកំពុងសាងសង់សំណង់រឹងមាំ មិនមានច្បាប់ទម្លាប់ហើយត្រូវបានពលរដ្ឋរិះគន់យ៉ាងចាស់ដៃ ទៅលើអាជ្ញាធរពាក់ព័ន្ទ ជាពិសេស សូរិយោដីខេត្តតែម្តង ប៉ុន្តែម្ចាស់មិនធ្វើតាមច្បាប់ដោយអាងខ្សែធំ
នៅពីខាងក្រោយខ្នង មើលទៅ ដូច្នេះទើបសំណង់មួយនេះធ្វើរួចដោយរលួន ។
សំណង់រឹង(ថ្ម)គ្មានច្បាប់មួយកន្លែង ដែលគ្មានសមត្ថកិច្ចចម្រុះណាមួយទៅធ្វើការផ្អាកឡើយ ប្រហែលពួគគេខ្លាចអំណាចម្ចាស់ផ្ទះនោះហើយមើលទៅ កាលពីពេលកន្លងទៅ ស្ថិតក្នុង សង្កាត់ស្វាយដង្គំ ,សង្កាត់ស្លក្រាមនិងសង្កាត់សាលាកំរើកក្រុងសៀមរាបដែលបានសាងសង់រួច ប្រមាណជាង៨០ភាគរយ ដោយពុំឃើញមានអាជ្ញាធរពាក់ព័ន្ធណាម្នាក់ចុះទៅត្រួតពិនិត្យឡើយ ជាពិសេស មន្ទីរសូរិយោដីនិងសំណង់ខេត្តសៀមរាប។
តាមប្រភពពីមន្ត្រីសូរិយោដីខេត្តបានឱ្យដឹងថា សំណង់មួយនេះបានសាងសង់ពុំមានច្បាប់អនុញ្ញាតនោះទេ ហើយម្ចាស់ពីមុនជាមន្ត្រីសូរិយោដីផងដែរ ទើបគ្មានសមត្ថកិច្ចពាក់ព័ន្ធណាម្នាក់ហានចេញមុខទៅផ្អាកកន្លែងនោះទេ។ប្រភពបានបន្តថា ការធ្វើសំណង់នេះឡើងគឺបានត្រឹមតែនាំគ្នាទៅអើតមើលពីខាងមុខតែប៉ុណ្ណោះគ្មានអ្នកណាហានចូឡទៅសួរនាំពីច្បាប់ទម្លាប់នោះទេ ដោយម្នាក់ៗខ្លាចបាត់តួនាទីខ្លួន ចំណែកនគរបាលប៉ុស្តិស្វាយដង្គំវិញខ្លាចធ្លាក់សក្កិពីលើស្មារ។មន្ត្រីបន្តទៀតថា ទោះបីមន្ទីរជំនាញតម្រូវឱ្យធ្វើច្បាប់ តែម្ចាស់នៅតែមិនព្រមធ្វើឡើយជាមួយគ្នានោះខាងជំនាញបានត្រឹមចុះទៅប្រាប់ជាច្រើនដងរួចហើយតែម្ចាស់នៅតែរឹងទទឹងឱ្យជាងធ្វើដដែល ។ប៉ុន្តែមន្ត្រីនោះបានប្រាប់រៀបរាប់ទៀតថា លោកបានត្រឹមតែប្រាប់ឲ្យទៅធ្វើច្បាប់ តែបើគេមិនទៅធ្វើក៏មិនដឹងធ្វើអ្វីគេដែរ។
ជុំវិញករណីសំណង់រឹងមាំធ្វើលើចំណីផ្លូវនិងលើប្រព័ន្ធលូនោះលោក សូ ប្លាតុង អភិបាលក្រុងសៀមរាបបានមានប្រសាសន៍ប្រាប់កោះសន្តិភាពនៅរសៀលថ្ងៃទី៣១ខែមិនានេះថា កាលពីពេលកន្លងមកលោកបានព្យាយាមចុះហាមឃាត់មួយចំនួន តែចំពោះករណីលួចលាក់ដែលលោកមិនបានដឹងនោះគឺលោកទទួលស្គាល់ថា ពិតជាមានមួយចំនួនមែន។លោកបន្តថា ករណីផ្ទះធ្វើលើប្រព័ន្ធលូនៅផ្លូវទៅផ្សារក្រោមនោះគឺជាផ្ទះរបស់លោក សារឿន ដែលបានដោះស្រាយគ្នា តែមិនត្រូវរហូតប្តឹងផ្តល់ឡើងដល់ទៅតុលាការខេត្តសៀមរាបហើយ ដូច្នេះរឿងនេះលោកមិនទាន់ដឹងថា យ៉ាងណានោះទេ ចំពោះសំណង់តូចតាច ឬធំនោះ បើមានអ្នក
រាយការមកលោក លោកនឹងចុះទៅអនុវត្តភ្លាមៗមិនទុកឲ្យពលរដ្ឋមើលនឹងភ្នែកទេ តែករណីមួយផ្សេងនោះគឺមានសំណង់របស់អ្នកធំ ខាងសមត្ថកិច្ចត្រឹមតែបានទៅអើតមើលតែប៉ុណ្ណោះមិនមានសិទ្ធហានហាមឃាត់គេទេ។
ទោះជាបែបនេះក្តីសម្រាប់សំណង់ធំៗនៅខេត្តសៀមរាប គេកត់សំគាល់ឃើញថា ជាច្រើនអាណត្តិមក ហើយ មានសំណង់ខ្លះសង់ដោយគ្មានច្បាប់ ហើយសង់រំលោភលើចំណីផ្លូវ និងពុំមានគម្លាតច្បាស់លាស់ពីរបងឬព្រុំ អ្នកជិតខាងនោះទេ ជាពិសេសគេឃើញមានមន្ត្រីមានអំណាចមួយចំនួនបានសាងសង់របង និង សំណង់រឹងមាំរំលោភលើដីចំណីផ្លូវយ៉ាងគឃ្លើន ធ្វើឲ្យមជ្ឍដ្ឋាននានាធ្វើការរិះគន់មិនដាច់ពីមាត់ថា ឲ្យតែមានលុយ មានអំណាចចង់សាងសាង់ខុសច្បាប់យ៉ាងណាក៏បានដែរ ទំនងជាមានអ្នកសើមមាត់សើម ក.ហើយមើលទៅ៕
