បុរសម្នាក់ និងនារី២នាក់ទៀតរួមដំណើរជាមួយបើករថយន្តសេរីទំនើបមួយគ្រឿងក្នុងល្បឿនលឿនដូន ហោះទាំងស្ថានភាពស្រវឹងស្រាជោគជាំបានបើកឡើងឃើញសួនច្បារនាគបាញ់ទឹកបណ្តាលឲ្យរងការខូចខាតយ៉ាងដំណំ។
ហេតុការណ៍នេះបានកើតឡើងកាលពីវេលាម៉ោង២និង២០នាទីទាប់ភ្លឺថ្ងៃទី២ ខែមេសា ឆ្នាំ២០១៥ នៅចំណុចសួនច្បារនាគបាញ់ទឹក តាមបណ្តោយផ្លូវព្រះសីហនុ កែងផ្លូវសុធារស ស្ថិតក្នុងសង្កាត់ទន្លេបាសាក់ ខណ្ឌចំការមន។
តាមសាក្សីនៅកន្លែងកើតហេតុបានឲ្យដឹងថា មុនពេលកើតហេតុគេបានឃើញរថយន្តសេរីទំនើប(ស្ព័រ)មួយគ្រឿង ពណ៌ស ពាក់ស្លាកលេខភ្នំពេញ2R-6119 បើកបរដោយបុរសម្នាក់និងនារី២នាក់រួមដំណើរជាមួយ ធ្វើដំណើរតាមបណ្តោយផ្លូវព្រះសីហនុ ក្នុងទិសដៅពីលិចទៅកើត ក្នុងល្បឿនលឿនដូនហោះ ខណៈមកដល់ចំណុចកើតហេតុបានបួងចង្កូតបត់ឆ្វេងទៅជើងតាមបណ្តោយផ្លូវសុធារស ដោយបួងចង្កូតមិនទាន់ក៏ជ្រុល ឡើងលើឃឿនសួនច្បារនាគបាញ់ទឹក បណ្តាលឲ្យរថយន្តរងការខូចខាតយ៉ាងដំណំ តែសំណាងល្អមិនមាន មនុស្សរងរបួស។
ក្រោយកើតហេតុសមត្ថកិច្ចមូលដ្ឋានបានចុះទៅអន្តរាគមន៍ដល់កន្លែងកើតហេតុ ប៉ុន្តែមិនបានធ្វើការឃាត់ខ្លួនអ្នកបើករថយន្តខាងលើនេះទេ ដែលបណ្តែតបណ្តោយឱ្យពួកគេនាំគ្នារើឥវ៉ាន់ចេញពីក្នុងរថយន្តបានដោយសេរី រួចឡើងជិះម៉ូតូគេចខ្លួនបាត់ស្រមោលតែម្តង ខណះសមត្ថកិច្ចនៅនឹងកន្លែងកើតហេតុជាច្រើននាក់ ធ្វើឱ្យប្រជាពលរដ្ឋនាំគ្នារិះគន់យ៉ាងខ្លាំងថា ពេលឃើញគេជាអ្នកមានជិះរថយន្តម៉ាកសេរីទំនើបដូចនេះ មិន ឃើញមានសមត្ថកិច្ចណាម្នាក់ហ៊ានចូលទៅជិតនោះទេ ប្រសិនបើបើកលឿនដូច្នេះប៉ះគេប៉ះឯងវិញទៅជា យ៉ាងណា ។
បន្ទាប់មករថយន្តខាងលើត្រូវបានសមត្ថកិច្ចសហការជាមួយជំនាញ ធ្វើការវាស់វែងស្ទូចយកទៅរក្សា ទុកនៅការិយាល័យចរាចរណ៍ជើងគោករាជធានីភ្នំពេញ រង់ចាំដោះស្រាយនាពេលក្រោយ ៕
