ខេត្ដស្វាយរៀង ៖ ប្រជាពលរដ្ឋជាច្រើនគ្រួសារបាននាំគ្នាជួយពន្លត់និងរាយការណ៏ដល់សមត្ថកិច្ចនគបាលមូលដ្ឋានខណៈដែលមានអគ្គីភ័យកំពុងឆាបឆេះព្រៃចេញពីវត្ដឧប្បលណ្ណារាម ហៅវត្ដធម្មយុទ្ធកាលពីវេលា
ម៉ោង១២និង៤៥នាទី ថ្ងៃទី២ ខែមេសា ឆ្នាំ២០១៥ ស្ថិតនៅ ក្នុងឃុំកៀនសាំង សង្កាត់- ក្រុងស្វាយរៀង ។យោងតាមសមត្ថកិច្ចនគបាលក្រុងស្វាយរៀងបានអោយដឹងថារហូតមកដល់រសៀលនេះគឺមានរថយន្ដពន្លត់ អគ្គីភ័យរបស់ស្នងការដ្ឋាននគរបាលខេត្ដស្វាយរៀងកំពុងជួយអន្ដរាគមន៍បាញ់ពន្លត់ភ្លើង ដែលកំពុងឆេះព្រៃដោយបានបាញ់ទឹកចំនួន៣រថយន្ដហើយភ្លើងក៏បានរលត់ទៅវិញប៉ុន្តែមិនបណ្ដាលអោយផ្ទះប្រជាពលរដ្ឋដែលនៅក្បែរនោះឆាបឆេះឬរងគ្រោះថ្នាក់ដល់អាយុជីវិតអ្វីឡើយ។
សមត្ថកិច្ចនគបាលបន្តទៀតថាដោយសន្និដ្ឋានជំហានដំបូងថា គឺមានអ្នកភូមិបាននាំក្រុមគ្រួសារមកសែនផ្នូរតាមទំនាមទំលាប់ប្រពៃណីរបស់ចិន-វៀតណាមនៅវត្ដឧប្បលណ្ណារាមនេះហើយក្រោយមកក៏បាននាំគ្នាចាំងស្មៅដែលដុះនៅជុំវិញផ្នូរអោយធំទូលាយរួចក៏បាន
ប្រមូលស្មៅដែលបានចាំងយកមកដុតនៅបរិវេណវត្ដ។បន្ទាប់មកក៏នាំគ្នាចាកចេញទៅអស់ដោយមានការធ្វេសប្រហេសមិនបានមើលភ្លើងដែលដុតនោះទើបបណ្ដាលអោយឆាប ឆេះនិងរាលដាលចេញពីបរិវេណវត្តទៅដល់ក្បែរផ្ទះអ្នកភូមិតែម្ដងទៅ។
សមត្ថកិច្ចនគបាលនិយាយថានេះពិតជាសំណាងហើយដែលភ្លើងឆេះព្រៃនេះមិនបានរាលដាលដល់ផ្ទះប្រជាពលរដ្ឋបើកុំតែមានសហការល្អជាមួយសមត្ថកិច្ចគ្រប់ស្ថាប័ណ្ណនិងអ្នកភូមិនាំគ្នាជួយបាញ់ពន្លត់ទាន់ពេលវេលានោះមិនដឹងជាមានផ្ទះណាខ្លះរងគ្រោះនិងខូចខាតទ្រព្យសម្បត្តិជាក់ជាមិនខានឡើយ។
